ខេត្តកំពង់ចាម ៖ កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ត បានបង្ក្រាបក្មេងជក់ថ្នាំញៀន១ក្រុម ដែលមានគ្នាចំនួន៧នាក់ នៅក្នុងបន្ទប់ផ្ទះជួលមួយស្ថិតនៅភូមិទី១ សង្កាត់វាលវង់ ក្រុងកំពង់ចាម កាលពីវេលាម៉ោង៨ និង៣០នាទី យប់ថ្ងៃទី៧ មីនា ២០១១ ។ ការបង្ក្រាបនេះបានរឹបអូសថង់ប្លាសិ្ទកដាក់ថ្នាំញៀនប្រភេទម្សៅក្រាម ពណ៌ស (មេតំហ្វេតាមីន) ចំនួន២កញ្ចប់ ឧបករណ៍ជក់ថ្នាំញៀនចំនួន២ ព្រមទាំងទុយោមួយចំនួនទៀត ។
លោកវរសេនីយ៍ត្រីសោម រស់ ប្រធានការិយាល័យប្រឆាំងគ្រឿងញៀនខេត្តបានប្រាប់ថា តាមកម្លាំងមូលដ្ឋានបានរាយការណ៍មកថាមានក្រុមក្មេងមួយចំនួនបាននាំគ្នាមកជក់ថ្នាំញៀននៅក្នុងបន្ទប់ផ្ទះជួលរបស់ឈ្មោះមាន គង់ ភេទប្រុសអាយុ៥៩ឆ្នាំ រស់នៅភូមិសង្កាត់ខាងលើ បន្ទាប់មកបានចាត់ឱ្យកម្លាំងក្រោមឱវាទតាមឃ្លាំមើល ។ លោកវរសេនីយ៍ត្រីបានបន្តថា នៅវេលាល្ងាចថ្ងៃទី៧ មីនា បានឃើញក្មេង១ក្រុមកំពុងតែនាំគ្នាផឹកស៊ីនៅក្នុងបន្ទប់មួយដែលមានគ្នាចំនួន៥នាក់រហូតដល់វេលាម៉ោង៨ និង៣០នាទីយប់ឃើញមនុស្សកើនដល់ទៅ៧នាក់ កំពុងតែធ្វើសកម្មភាពជក់ថ្នាំញៀន ។
សមត្ថកិច្ចនគរបាលបានចុះទៅឡោមព័ទ្ធចាប់បានទាំងអស់មិនមានអ្នកណាម្នាក់រត់រួចនោះទេ រួមមាន១-ឈ្មោះភី សុផុន ភេទប្រុសអាយុ១៥ឆ្នាំ រស់នៅភូមិស្ពាន ឃុំដារ ស្រុកមេមត់ ២-ឈ្មោះវីវ៉ា ភេទប្រុស អាយុ២៧ឆ្នាំ រស់នៅភូមិថ្នល់បែកលិច ឃុំស្វាយទាប ស្រុកចំការលើ ៣-ឈ្មោះហាន រ៉ា ភេទប្រុស អាយុ១៦ឆ្នាំ រស់នៅភូមិស្ពាន ឃុំដា ស្រុកមេមត់ ៤-ឈ្មោះហួត គឹមហេន ភេទប្រុស អាយុ២៥ឆ្នាំ រស់នៅភូមិទួលវិហារ ឃុំជីរោទី២ ស្រុកត្បូងឃ្មុំ ៥-ឈ្មោះឈឿន បញ្ញា ភេទប្រុស អាយុ១៩ឆ្នាំ នៅភូមិទន្លេបិទ ឃុំទន្លេបិទ ស្រុកត្បូងឃ្មុំ ៦-ឈ្មោះស៊ុំ ណារិទ្ធ ភេទប្រុស អាយុ១៩ឆ្នាំ រស់នៅភូមិទន្លេបិទដែរ ៧-ឈ្មោះឈិន ធារី ភេទប្រុស អាយុ១៩ឆ្នាំ រស់នៅភូមិទន្លេបិទ ឃុំទន្លេបិទដូចគ្នា ។ ក្រោយការចាប់ខ្លួន ក៏បាននាំមកកាន់ស្នងការដ្ឋាននគរបាលខេត្តទាំងយប់ ដើម្បីធ្វើការស្រាវជ្រាវរកប្រភពដែលក្រុមយុវជនទាំងនេះបានទិញ តើទិញថ្នាំញៀនមកពីណា? ដើម្បីសុំគោលការណ៍ពីលោកស្នងការនគរបាលខេត្តចេញទៅបង្រ្កាបកន្លែងលក់នោះបន្តទៀត ។
លោកវរសេនីយ៍ត្រីសោម រស់ ប្រធានការិយាល័យប្រឆាំងគ្រឿងញៀនខេត្តបានបញ្ជាក់ថានៅក្នុងផែនការជាយុទ្ធសាស្រ្តឆ្នាំ២០១១នេះរូបលោកនឹងប្រមូលក្តាប់ឱ្យបាននូវបញ្ជីចំនួនអ្នកជក់ថ្នាំញៀនទាំងអស់ ធ្វើយ៉ាងណាសំដៅ ដើម្បី១-កាត់បន្ថយការផ្តត់ផ្គង់គ្រឿងញៀន ២-លុបបំបាត់ទីផ្សារគ្រឿងញៀន ។ កត្តាទាំងនេះធ្វើឱ្យរួចផុតពីការប្រើប្រាស់គ្រឿងញៀនសម្រាប់ទីផ្សារគ្រឿងញៀន និងមិនដុតលុយចោល ។ លោកវរសេនីយ៍ឯកជឹម សេងហុង ស្នងការរងនគរបាលខេត្តទទួលផែនកណ្តាលយុត្តិធម៌ មានប្រសាសន៍ឱ្យកោះសន្តិភាពដឹងដែរថា ក្រុមយុវជនទាំង៧នាក់នេះមិនមែនជាអ្នកដែលមានទីលំនៅក្នុងក្រុងកំពង់ចាមនោះទេ សុទ្ធតែមកពីតាមបណ្តាស្រុកដូចជាមេមត់ ស្រុកចំការលើនិងស្រុកត្បូងឃ្មុំ ។ មានអ្នកខ្លះបានមកជួលបន្ទប់នៅភូមិទី១ សង្កាត់វាលវង់ស្នាក់នៅ ។ ក្រុមយុវជនទាំង៧នាក់នេះ ត្រូវបញ្ជូនទៅកាន់សាលាដំបូងខេត្តចាត់ការតាមនីតិវិធី ៕
ចែករំលែកព័តមាននេះ