ខេត្តព្រៃវែង ៖ ក្រោយពីប្រមូលផលស្រូវ ប្រជាកសិករជាច្រើនគ្រួសារនៅក្នុងឃុំជាខ្លាង ស្រុកស្វាយអន្ទរ ខេត្តព្រៃវែង បានងាកមកបន្តដាំដំណាំអំពៅលើផ្ទៃដីម្នាក់ៗចាប់ពី១ហិកតារហូតដល់៦ហិកតា ដើម្បីរកប្រាក់ចំណូលជួយផ្គត់ផ្គង់ជីវភាពគ្រួសារបន្ថែម។ ប៉ុន្តែអ្វីដែលធ្វើអោយកសិករខកចិត្តនោះ គឺនៅក្នុងឆ្នាំនេះ អំពៅបានផលល្អបង្គួរ តែតម្លៃវិញ គឺធ្លាក់ថោកទ្វេដង ដោយ១ហិកតាឈ្មួញចុះមកម៉ៅដល់ចំការបានតម្លៃត្រឹមតែជាង១០លានរៀលទៅ២០លានរៀលប៉ុណ្ណោះ។
ខណៈដែលតម្លៃអំពៅឆ្នាំមុនៗ មានឈ្មួញចុះមកម៉ៅដល់ចំការដូចគ្នា ក្នុង១ហិកតាតម្លៃចាប់ពីជាង២០លានរៀលទៅជាង៣០លានរៀលឯណោះ ទៅតាមអំពៅល្អ ឫមិនល្អ។ នេះបើយោងតាមកសិករអ្នកដាំអំពៅនៅឃុំជាខ្លាង ស្រុកស្វាយអន្ទរ បានលើកឡើងប្រាប់អ្នកសារព័ត៌មានប្រហាក់ប្រហែលគ្នា កាលពីព្រឹកថ្ងៃទី៨ ខែកញ្ញា ឆ្នាំ២០២១។
កសិករបញ្ជាក់បន្ថែមថា ដំណាំអំពៅក្តាមនេះ ប្រើរយៈពេលប្រហែល១ឆ្នាំទើបបានប្រមូលផល រីឯបទពិសោធដាំអំពៅនេះ ម្នាក់ៗមិនក្រោម៦-៧ឆ្នាំទៅជាង១០ឆ្នាំនោះទេ ដែលខ្លះជួលដីគេធ្វើ និងខ្លះទៀតដាំលើដីខ្លួនឯង។ ហើយចំពោះការប្រកបមុខរបរដាំអំពៅកន្លងមកនេះ ក៏វាអាចកាត់បន្ថយការទៅធ្វើការងារចំណាក់ស្រុកនាំអោយបែកបាក់ឃ្លាតឆ្ងាយពីប្រពន្ធកូនចៅ និងជួយផ្តល់ប្រាក់ចំណូលជួយលើកស្ទួយសេដ្ឋកិច្ចជីវភាពគ្រួសារបានធូរធាមួយកម្រិតផងដែរ។
កសិករបញ្ជាក់ទៀតថា ស្រាប់តែជំងឺកូវីដ១៩ រីករាលដាលនេះ ធ្វើអោយហាងឆេងអំពៅធ្លាក់ថ្លៃទ្វេដង រយៈពេល២ឆ្នាំចុងក្រោយនេះ ដែលធ្វើកសិករជួបការលំបាកក្នុងការខាតបង់ទាំងពេលវេលា និងថវិកា ហើយបើអ្នកខ្លះមានដីខ្លួនឯងនោះវាខាតមធ្យមទេ តែបើងំអ្នកខ្លះជួលដីគេធ្វើវិញ ហើយយកលុយធនាគារឯកជនមកធ្វើជាដើមទន់ទៀតនោះ ប្រាកដជាវ័នករជាក់ជាមិនខានឡើយ។
ដូច្នេះកសិករសូមសំណូមពរអោយស្ថាប័នពាក់ព័ន្ធ ជាពិសេសប្រមុខរាជរដ្ឋាភិបាល មេត្តាជួយរកទីផ្សារអោយអំពៅពួកគាត់បានថ្លៃបន្តិច និងសូមជួយអោយ ប្រេង សាំង ជី ចុះថ្លៃផង ព្រោះបច្ចុប្បន្ន អំពៅធ្លាក់ថ្លៃ រីឯប្រេង សាំ និងជី នៅតែថ្លៃដដែល។
លោក អ៊ុក សំណាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង បានប្រាប់អោយដឹងតាមទូរស័ព្ទថា កាលពីពេលឆ្នាំកន្លងទៅ ក្រោយពីប្រមូលផលស្រូវរួច កសិករមួយចំនួននៅឃុំជាខ្លាង បានងាកមកដាំអំពៅដែលជាដំណាំមួយងាយស្រួលថែ ហើយប្រើទឹកតិច នៅលើផ្ទៃដីសរុបប្រមាណជាង៦០០ហិកតា។ តែដោយសារជំងឺកូវីដ១៩ វាយលុកខ្លាំងធ្វើអោយទីផ្សារអំពៅមានការធ្លាក់ចុះ កសិករដាំអំពៅក៏មានការថយចុះនៅសល់ផ្ទៃដីសរុបត្រឹមតែប្រមាណ៥៩១ហិកតាប៉ុណ្ណោះ។ សម្រាប់តម្លៃក៏មានការថយចុះដែរ ដោយក្នុង១ហិកតាជាង១០លានរៀល ទៅជាង២០លានរៀល។ ខណៈកាលពីមិនមានកូវីដ១៩ អំពៅមានហាងឆេង១ហិកតា បានតម្លៃចាប់ពីជាង២០លានរៀលទៅជាង៣០លានរៀល៕
ចែករំលែកព័តមាននេះ