ខេត្តស្ទឹងត្រែង ៖ ជុំវិញរឿងរ៉ាវធ្វើផ្លូវ អត់ធ្វើលូ រូចខូចផ្លូវអស់ពេលមានភ្លៀងធ្លាក់ខ្លាំង អត់មានលូសម្រាប់ទឹកហូរចូល នៅតែជាប្រធានបទក្តៅ រងការរិះគន់មិនឈប់មិនឈរ ។ ប្រជាពលរដ្ឋរស់នៅ ភូមិព្រែក និងភូមិរាជានុកូល ក្រុងស្ទឹងត្រែង បានលើកឡើងថាអំពីរឿងធ្វើផ្លូវអត់ធ្វើលូ ថា នៅពេលភ្លៀងធ្លាក់ម្តងៗ គឺដឹងតែផ្លូវត្រូវជន់ដោយជំនន់ទឹកភ្លៀង ហើយជំនន់ទឹកភ្លៀងនឹងហូរកាត់លើផ្លូវ យ៉ាងសន្ធប់ បណ្តាលឲ្យកំណាត់ផ្លូវមួយចំនួនរងការខូចខាតក្លាយជាជង្ហុក ឯចិញ្ចើមផ្លូវត្រូវដាច់រសាត់ទៅតាមទឹកផងដែរ ។
ជាក់ស្តែងកំណាត់ផ្លូវចំណុចគីឡូ២ កងចក្រ ទឹកភ្លៀងបានហូរច្រោះ បណ្តាលឲ្យបាក់ដាច់ចិញ្ចើមផ្លូវ និងកន្លែងខ្លះក្លាយទៅ ជាជង្ហុកជ្រៅៗ អូរជាប់របងមន្ទីវប្បធម៌និងវិចិត្រសិប្បៈ ក៍ត្រូវកម្លាំងទឹកហូរបុករងការខូចខាតផងដែរ។
តាមការសង្កេតឃើញរបស់ប្រជាពលរដ្ឋបានបន្ត ទៀតថា កំណត់ផ្លូវ១ខ្សែទៀត ត្រង់ចំណុច សត្តឃាតដ្ឋានចាស់ ពេលភ្លៀងធ្លាក់ម្តងៗទឹកហូរកាត់ផ្លូវ រហូតស្ទើរនឹងអាចជិះទូកបាន។ ហើយ ផ្លូវកៅស៊ូ១ខ្សែ នេះ រងការខូចខាតជាជង្ហុកធំច្រើនកន្លែងអស់រយ:ពេលជាច្រើនឆ្នាំ មកហើយ ពុំមានឃើញការថែទាំ ឬជួសជុលអោយប្រជាពលរដ្ឋឆ្លងកាត់ងាយស្រួសនោះទេ ស្របពេលផ្លូវបេតុងនិងផ្លូវកៅស៊ូមួយចំនួនរត់កាត់ មុខផ្ទះលោកធំៗកុំថាឡើយចុះចំណោតភ្នំនិងឡើងខ្នងភ្នំនោះ។
យ៉ាងណាមិញ រឿងរ៉ាវធ្វើផ្លូវអត់ធ្វើលូ រហូតផ្លូវខូចក្លាយជាជង្ហុកជ្រៅ មិនមែនមានតែផ្លូវ២ខ្សែខាងលើនេះទេ គឺមានច្រើនផ្លូវច្រើនខ្សែទៀតនៅក្នុងក្រុង ដែលត្រូវទឹកភ្លៀងហូរកាត់ក្រោយពេល ភ្លៀងធ្លាក់ម្តងៗ។ ពលរដ្ឋលើកឡើងទៀតថា ចំពោះមូលហេតុ សំខាន់ដែលធ្វើឲ្យហូរកាត់ផ្លូវដូច្នេះ ដោយសារធ្វើផ្លូវ តែមិនមានដាក់ប្រព័ន្ធលូបង្ហូរទឹក។
ទាក់ទិននឹងការធ្វើផ្លូវមិនដាក់លូនេះ មន្ត្រីខេត្តស្ទឹងត្រែងមួយរូប បានឲ្យដឹងថា ដោយសារតែថវិកាមានសម្រាប់ធ្វើផ្លូវប៉ុណ្ណោះ តែពុំមានថវិកា សម្រាប់ធ្វើលូនោះទេ ហើយបើចង់ដាក់លូបន្ថែម ទាល់តែធ្វើគម្រោងស្នើទៅថ្នាក់លើម្តងទៀត ។
ឆ្លើយតបនិងបញ្ហានេះ លោក ម៉ែន គុង នាយករងរដ្ឋបាលខេត្តនិងជាអ្នកនាំពាក្យរបស់សាលាខេត្តស្ទឹងត្រែង បានប្រាប់កោះសន្តិភាពថា លោកគ្រាន់តែបញ្ជាក់បានថា «សម្រាប់ផ្លូវក្នុងប្រជុំជនក្រុងឥឡូវនេះ ជាគោលការណ៍ គឺត្រូវដាក់ក្នុងគម្រោងរបស់ខេត្ត ទៅតាមគម្រោងអាទិភាព ថាត្រូវធ្វើអីមុន នៅក្នុងខេត្ត ពេលចេញកម្មវិធីវិនិយោគ ៣ ឆ្នាំ រំកិល ឬចេញគម្រោងវិនិយោគសាធារណៈរបស់ខេត្ត ដែលស្របទៅតាមក្របខណ្ឌអភិវឌ្ឍន៍នៃផែនការអភិវឌ្ឍន៍របស់ខេត្ត»។
ដូច្នេះពាក់ព័ន្ធរឿងធ្វើផ្លូវ អត់ធ្វើលូ រហូតផ្លូវត្រូវខូចខាតវិញ ដោយសារតែទឹកភ្លៀងហូរកាត់នោះ មិនដឹងថាពេលណាអាចនឹងដោះស្រាយចប់ទេ ៕
ចែករំលែកព័តមាននេះ