ខេត្តស្ទឹងត្រែង ៖ មនុស្សមួយក្រុមមានគ្នា៩ នាក់ ដែលអះអាងខ្លួនថាជាអ្នកសារព័ត៌មាន ត្រូវបានកម្លាំងកងរាជអាវុធឃាត់ខ្លួន ដើម្បីសាកសួរកាលពីវេលាថ្ងៃត្រង់ នាថ្ងៃទី ៧ ខែកញ្ញា ឆ្នាំ ២០២១ ក្រោយត្រូវបានចោទប្រកាន់ថា ពាក់ព័ន្ធករណីទារលុយចំនួន ៤០០០ដុល្លារ ពីរថយន្តដឹកគ្រឿងឈើផ្ទះចាស់ចំនួន ។
តាមប្រភពព័ត៌មានអោយដឹងថាមនុស្សប្រុសមួយក្រុមដែលអះអាងថាជា អ្នកសារព័ត៌មានទាំងនោះមានគ្នា១០នាក់ ត្រូវបានចោទប្រកាន់ថា បានទៅបណ្តាក់គ្នាទារលុយពីរថយន្តដឹកគ្រឿងឈើជាផ្ទះចាស់ៗត្រូវគេទិញហើយរុះរើ ដឹកឆ្លងទៅខេត្តផ្សេងទៀត ។ សមត្ថកិច្ចបានឱ្យដឹងថា ផ្ទះចាស់ៗទាំងនោះ ក្រោយឈ្មួញដើរប្រមូលទិញបាន គឺត្រូវរុះរើ និងសុំច្បាប់អនុញ្ញាតិពីអាជ្ញាធរមានសមត្ថកិច្ច ទើបលើកដាក់រថយន្តដឹកទៅខេត្តផ្សេងទៀត ដូចជាខេត្ត ព្រៃវែង ស្វាយរៀង តាកែវ កំពតជាដើម។
សមត្ថកិច្ចដែលបានចុះប្រតិបត្តិការឃាត់នេះបានបញ្ជាក់ថា ឈើនៅរថយន្តនោះសុទ្ធសឹងជាផ្ទះចាស់ៗ ដែលឈ្មួញប្រមូលទិញរួចរុះរើដឹកចេញពីខេត្តស្ទឹងត្រែង។ សមត្ថកិច្ចដដែលបន្តថាឈើផ្ទះចាស់នៅលើរថយន្តទាំងនោះមុនពេលលើកដាក់រថយន្តរដ្ឋបាលព្រៃឈើបានត្រួតពិនិត្យរួចរាល់ហើយ ពុំបង្កប់ឈើឆៅអត់ច្បាប់នោះឡើយ។ តែដល់ពេលគេលើក ដាក់រថយន្តគ្រប់គ្រាន់ហើយ និងរៀបចេញដំណើរក៏ស្រាប់មានមនុស្សមួយក្រុម ដែលអះអាងថាជា ក្រុមសារព័ត៌មានទៅទារលុយម្ចាស់រថយន្តចំនួន៤០០០ដុល្លារ តែម្ចាស់គេប្រាប់ថា ពុំមានលទ្ធភាពដល់ថ្នាក់ហ្នឹងទេ ទោះលក់ឈើចាស់ហ្នឹងទាំងអស់ក៏មិនបានដល់៤០០០ដុល្លាហ្នឹងដែរ បើប្រេងសាំងតិចតួច គឺអាចជូនបាន តែពួកគាត់មិនព្រមក៏បណ្តាក់គ្នាមកទារម្តងមួយក្រុមៗ ហើយដេញតាមរថយន្តរហូតតាំងពីព្រំប្រទល់ខេត្តស្ទឹងត្រែង និងព្រះវិហារមកដល់ច្រកចូលជាំធំ ស្រុកថាឡាបរិវ៉ាត់ រួចមនុស្សមួយក្រុមដែលដេញតាមឡានដឹកឈើចាស់ៗនោះ បានប្តឹងទៅអាវុធហត្ថផ្ទៃប្រទេសនិង អាវុធហត្ថខេត្ត ទើបកម្លាំងចុះសហការជាមួយរដ្ឋបាលព្រៃឈើទៅពិនិត្យរថយន្តនោះទៀត តែពួកគេទាំងនោះរត់គេចពីសមត្ថកិច្ចវិញ ។
ដោយគ្មានមូលហេតុនៃការប្តឹងទៅសមត្ថកិច្ចច្បាស់លាស់ ហើយបែរជារត់គេច ទើបកម្លាំងអាវុធហត្ថតាមឃាត់មកសាកសួរតែម្តង។ សមត្ថកិច្ចដដែលនេះថា ខណៈចុះទៅពិនិត្យរថយន្តដឹកឈើ តាមការប្តឹងរបស់ក្រុមអ្នកសារព័ត៌មាននោះ ក្រុមសារព័ត៌មានទាំង នោះបានបើករថយន្តរត់គេច ដោយ ២នាក់ ត្រូវឃាត់នៅស្រុកថាឡាបរិវ៉ាត់ និង៧នាក់ទៀត ក្រោមការសហការជាមួយអាវុធហត្ថស្រុកឆែបខេត្ត ព្រះវិហារ ត្រូវបានឃាត់ខ្លួនបាននៅមុខបន្ទាយអាវុធហត្ថស្រុក និងម្នាក់ទៀតរត់គេចខ្លួន។
ទាក់ទិនហេតុនេះ បើតាមប្រភពព័ត៌មានអោយដឹងថាកន្លង មកក្រុមឈ្មួញបានប្រើប្រាស់រូបភាពទិញផ្ទះចាស់ៗ ហើយរុះរើសុំច្បាប់ដឹកចេញ តែសកម្មភាពជាក់ស្តែងគឺប្រមូលទិញឈើអាដោយរណាយន្ត មកវ៉ៃដែកគោលបត់ ហើយយកទៅត្រាំទឹកប្រឡាយឬស្រះ រហូតដល់ស្រគាំសាច់ទើប ស្រង់ដាក់លាយជាមួយគ្រឿងផ្ទះចាស់ ព្រោះមិនពិបាកមើល៍ផ្ទះចាស់គឺមានដំណាប់ខ្នៀប លក លាក់ តែឈើបន្លំពុំមាន ដំណាប់ ខ្នៀប លក លាក់ឡើយ គ្រាន់តែវ៉ៃដែកគោលបត់ បន្លំតែប៉ុណ្ណោះ។ ម្យ៉ាងទៀតសកម្មភាពការប្រមូលទិញផ្ទះចាស់របស់ឈ្មួញនេះគឺរាប់ឆ្នាំមកហើយ ដឹកមួយឆ្នាំទល់មួយឆ្នាំមិនដែលស្បើយសោះ តើស្រុកមួយនោះមានខ្នងផ្ទះចាស់ប៉ុន្មានម៉ឺនខ្នងដែលត្រូវលក់ទើមឈ្មួញទិញមិនអស់ទាល់តែសោះបែបហ្នឹង។
ករណីនេះកម្លាំងកងរាជអាវុធហត្ថខេត្តស្ទឹងត្រែងក៏បាន កសាងសំណុំរឿងពីបទគំរាមទារប្រាក់ពីប្រជាពលរដ្ឋ ដឹកឈើផ្ទះចាស់ ទៅសាងសង់កន្លែងថ្មី ។ ក្រុមអ្នកសារព័ត៌មានទាំង៩នាក់នោះមានឈ្មោះដូចខាងក្រោម
១ – ឈ្មោះ សំ រដ្ឋា ភេទប្រុស អាយុ ៣១ ឆ្នាំ ជាអ្នកសារព័ត៌មាន កាន់បណ្ណសំគាស់ខ្លួន ចេញដោយអគ្គនាយកដ្ឋានព័ត៌មាន និងសោតទស្សន៌ (តែពិនិត្យតាម QR Code មិនមានអត្តសញ្ញាណ ) ២ – ឈ្មោះ ច្រេស សុខុន ភេទ ប្រុស អាយុ ៤១ ឆ្នាំ ជាអ្នកសារព័ត៌មានកាន់បណ្ណសំគាស់ខ្លួនចេញដោយអគ្គនាយកដ្ឋានព័ត៌មាន និងសោតទស្សន៌ ( ពិនិត្យតាម QR Code មិនមានអត្តសញ្ញាណ ) ៣ – ឈ្មោះ អឿន សុខខេង ភេទប្រុស អាយុ ៣៦ ឆ្នាំ ជាអ្នកសារ ព័ត៌មាន កាន់បណ្ណសំគាស់ខ្លួនចេញដោយ អគ្គនាយកដ្ឋានព័ត៌មាន និងសោតទស្សន៌ ( ពិនិត្យតាម QR Code មិនមានអត្តសញ្ញាណ ) ៤ -ឈ្មោះ អ៊ិត រិទ្ឋី ភេទប្រុស អាយុ៤៧ ឆ្នាំ ជាអ្នកសារព័ត៌មាន ៥ – ឈ្មោះ បុល ថៃ ភេទប្រុស អាយុ ២២ ឆ្នាំ ជាអ្នកសារព័ត៌មាន ៦- ឈ្មោះ លី ធា ភេទប្រុស អាយុ ៤១ឆ្នាំ ជាអ្នកសារព័ត៌មាន ៧ -ឈ្មោះ ណុប ប៊ុនធីម ភេទប្រុស អាយុ៤២ ឆ្នាំ ជាអ្នកសារពព័ត៌មាន ៨ – ឈ្មោះ គង់ សុធារើន ភេទប្រុស អាយុ ៤៣ឆ្នាំ ជាអ្នក និពន្ឋនាយរងអ្នកសារព័ត៌មាន ៩ – ឈ្មោះ លី វ៉ាន់ ភេទប្រុស អាយុ ៣៦ ឆ្នាំ ជាជំនួយការចាងហ្វាង ។
ក្រុមអ្នកសារពព័ត៌មានទាំង៩នាក់ខាងលើ ត្រូវបានបញ្ជូនមកទីបញ្ជាការដ្ឋានកងរាជអាវុធហត្ថខេត្ត ដើម្បីសកសួរ និងកសាងសំណុំរឿងបញ្ជូនទៅតុលាការអនុវត្តតាមនីតិវិធីច្បាប់ ៕
ចែករំលែកព័តមាននេះ