AFP កាលពីពេលថ្មីៗកន្លងមកផ្សាយថា ប្រទេសប្រេស៊ីលបានប្រកាសអាសន្នដល់ស្ដ្រីមានផ្ទៃពោះឱ្យចៀសវាងចូលរួមទស្សនាការប្រកួតអូឡាំពិកដែលរៀបចំឡើងនៅថ្ងៃទី៥ សីហា ខាងមុខ ក្នុងក្រុងរីយ៉ូដឹហ្សាណារ៉ូ ក្រោយពីអង្គការសុខភាពពិភពលោក(WHO) ប្រកាសថា គ្រោះអាសន្នវីរុសZika កើតមានជាអន្តរជាតិ។
លោក ជែក វែកន័រ ប្រធានក្រុមការងារលោកប្រធានាធិបតីប្រេសីុល បណ្ជាក់ថា ស្ដ្រីមានគភ៌មានហានិភ័យខ្ពស់ពេលឆ្លងវីរុស Zika។ នេះមិនមែនជាការបំភ័យដល់អ្នកធ្វើដំណើរទៅចូលរួមទស្សនាការប្រកួតកីឡាអូឡាំពិកទេ ។ ចំណែកលោកថូម៉ាស់បាក ប្រធានគណៈកមា្មធិការអូឡាំពិកអន្ដរជាតិថ្លែងថា ការប្រកាសអាសន្នរបស់WHO ធ្វើឱ្យមានការយល់ដឹងកាន់តែច្បាស់ពីវីរុសZika និងលទ្ធភាពទប់ទល់វីរុសមានកាន់តែខ្លាំង ។
លោកបញ្ជាក់ថា គណៈកមា្មធិការរអូឡាំពិកអន្ដរជាតិ នឹងសហការជាមួយគណៈកម្មាធិការអូឡាំពិកប្រេស៊ីល និងអង្គការសុខភាពពិភពលោក(WHO)ធ្វើរឿងនេះឱ្យបានដិតដល់ ។ ទោះបីយ៉ាងណា ទម្រាំដល់ពេលប្រកួតគឺដល់ពេលរដូវរងារបស់ប្រេស៊ីល និងជាអំឡុងពេលដែលមូសមិនរីកដុះដាលធ្វើឱ្យមានជំនឿចិត្ដថា កត្ដាទាំងអស់នេះនឹងអំណោយផលល្អដល់កីឡាករ និងអ្នកចូលទស្សនាការប្រកួតកីឡាអូឡាំពិក ៕
ចែករំលែកព័តមាននេះ