ខេត្តបាត់ដំបង ៖ មនុស្សមិនមែនជាសត្វទេ សំរាប់សត្វធាតុពិតជាធ្វើអ្វីៗទៅតាមសភាវគតិជាសត្វ តែមនុស្សមិនអាចធ្វើទៅរួចទេ ប៉ុន្តែទោះបីជាបែបណាសកម្មភាពខ្លះបានធ្វើឱ្យមានការហួសចិត្តនឹកស្មានមិនដល់ដូចជាករណី២ខាងក្រោមនេះវាបានកើតឡើង គឺបុរសម្នាក់ពង្រត់ប្រពន្ធគេពីខេត្តតាកែវ ដល់ខេត្តបាត់ដំបង និងប៉ុន្មានថ្ងៃក្រោយប្តីតាមមកយកប្រពន្ធទៅវិញ ឯករណីមួយទៀតបុរសម្នាក់ឆក់ឱកាសប្តីគេកំពុងផឹកស្រាស្រវឹងក៏បន្លំធ្វើជាប្តីប៉ុនប៉ងរួមរ័ក តែវាធម្មតាទេ មនុស្សម្នាក់ៗមិនដែលមានសកម្មភាពដូចគ្នាទេ សូម្បីតែក្លិនក៏មិនដូចគ្នាផង ទីបំផុតពេលបន្លំេនបនិត្យនោះក៏មានការសង្ស័យពេលបើកភ្លើងទើបដឹងថា ជាចោរលួចបេះដូង។ ខាងក្រោមនេះ គឺជាសេចក្តីរាយការណ៍ព័ត៌មានទាក់ទិននឹងរឿងរ៉ាវខាងលើ។
- ពង្រត់ប្រពន្ធគេមកនេបនិត្យ
បុរសដាច់យ៉ៃម្នាក់ត្រូវបានកំលាំងនគរបាលព្រហ្មទណ្ឌនៃស្នងការដ្ឋានខេត្តធ្វើការឃាត់ខ្លួនកាលពីវេលាម៉ោង៦ល្ងាច ថ្ងៃទី២៧ តុលា នៅចំណុចមុខផ្ទះសំណាក់ លីហុក ស្ថិតនៅភូមិកម្មករ សង្កាត់ស្វាយប៉ោ ក្រុងបាត់ដំបង បន្ទាប់ពីមានសេចក្តីរាយការណ៍ថា បុរសនេះបានពង្រត់ស្ត្រីម្នាក់ដែលមានប្តីរួចហើយ មកពីខេត្តតាកែវ រួមជាមួយកូនស្រីអាយុ៤ឆ្នាំម្នាក់ផង មកក្រេបទឹកឃ្មុំនៅខេត្តបាត់ដំបង ហើយកំពុងស្នាក់នៅក្នុងផ្ទះសំណាក់ខាងលើនេះ។
ក្រុមសមត្ថកិច្ចបានបញ្ជូនបុរសលួចប្រពន្ធគេ និងស្ត្រីដែលលួចមានសហាយស្មន់ក្បត់ចិត្តប្តីនោះទៅកាន់ការិយាល័យនគរបាលប្រឆាំងការជួញដូរមនុស្ស និងការពារអនីតិជនភ្លាមៗដែរ ដើម្បីធ្វើការសាកសួរ។ នៅចំពោះមុខសមត្ថកិច្ចបុរសដាច់យ៉ៃនោះប្រាប់ថា ខ្លួនឈ្មោះម៉ាន់ រើន អាយុ៣១ឆ្នាំ រស់នៅភូមិព្រៃស្វាយ ឃុំរាំងកេសី ស្រុកសង្កែ ខេត្តបាត់ដំបង។ ដោយឡែកស្ត្រីដែលក្បត់ប្តីឈ្មោះយ៉ែម ចាន់នឿន អាយុ២៧ឆ្នាំ និងប្តីឈ្មោះយន់ ពៅ អាយុ៣៨ឆ្នាំ មានកូនស្រីមួយអាយុ៤ឆ្នាំ រស់នៅស្រុកកោះអណ្តែត ខេត្តតាកែវ។
នៅក្នុងការិយាល័យនគរបាលព្រហ្មទណ្ឌបុរសឈ្មោះម៉ាន់ រើន បាននិយាយប្រាប់សមត្ថកិច្ចថាខ្លួន និងស្ត្រីឈ្មោះចាន់នឿន នេះទើបស្គាល់គ្នាបានប្រហែលជាង១០ថ្ងៃប៉ុណ្ណោះ ខណៈដែលខ្លួនទៅលេងផ្ទះបងធម៌នៅឯខេត្តតាកែវ។ បុរសកំហូចនេះបន្តថា ស្ត្រីឈ្មោះចាន់នឿន និងប្តីបានជួលខ្លួនឱ្យជួយធ្វើផ្ទះ គឺគ្រានោះហើយ ដែលខ្លួន និងស្ត្រីចាន់នឿន បានមានទំនាក់ទំនងស្នេហាជាមួយគ្នា ហើយបបួលគ្នារត់មកផ្ទះរបស់ខ្លួននៅឯខេត្តបាត់ដំបងតែម្តង។ ពួកខ្លួនពង្រត់គ្នាកាលពីថ្ងៃទី២៥ តុលា មកដេកនៅផ្ទះរបស់ខ្លួនបាន២យប់ស្គាល់រសជាតិទឹកឃ្មុំសល់តែកាក៦ដង។ លុះថ្ងៃទី ២៧ តុលា បបួលគ្នាមកដេកផ្ទះសំណាក់លីហុក ក៏ត្រូវប្តីគេមកទាន់ប្រាប់សមត្ថកិច្ចឱ្យចាប់ខ្លួនតែម្តង។
ជាមួយគ្នានេះដែរ ស្ត្រីឈ្មោះយ៉ែម ចាន់នឿន បានបំភ្លឺជុំវិញរឿងនេះដែរថា ខ្លួនធ្វើបែបនេះ ដោយសារខឹងនឹងប្តីពេលឈ្លោះគ្នាម្តងៗ ចេះតែបង្ខំខ្លួនឱ្យយកប្តីទៀតទៅ ទើបខ្លួនក្តៅក្រហាយរត់តាមប្រុសដាច់យ៉ៃនេះ មួយគ្រាសិន។ ម្យ៉ាងទៀតដោយសារតែបុរសរូបនេះពួកែលួងលោមផងដែរ តែគេគ្មានប្រាក់មួយសេនជាប់ខ្លួនទេ។ ទោះបីជាបែបណាលោកកុយ ហ៊ាង ប្រធានការិយាល័យប្រឆាំងការជួញដូរមនុស្ស និងការពារអនីតិជនបានថ្លែងថា បើយោងតាមផ្លូវច្បាប់គូស្នេហ៍ពង្រត់គ្នានេះ ត្រូវជាប់ចោទពីបទសហាយស្មន់ ហើយត្រូវមានទោស។ តែដោយសារបុរសជាប្តីប្តឹងសុំយក តែប្រពន្ធទៅវិញតែប៉ុណ្ណោះ ទើបលោកស្នងការសំរេចឱ្យបុរសនោះរួចខ្លួនទៅ។
- បន្លំរួមរ័កប្រពន្ធគេជាប់ចោទរំលោភ
យុវជនម្នាក់រងការប្តឹងចោទប្រកាន់ថា បានចាប់ប្រពន្ធគេរំលោភសេពសន្ថវៈ ហើយត្រូវនគរបាលការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋានខេត្តឃាត់ខ្លួនកសាងសំណុំរឿងបញ្ជូនទៅតុលាការកាលពីរសៀលថ្ងៃទី២៨ តុលា។ ជនសង្ស័យត្រូវចាប់ខ្លួនមួយថ្ងៃក្រោយពីបានប្រព្រឹត្តបែបនោះកាលពីវេលាម៉ោង២ និង៣០នាទីរំលងអធ្រាត្រថ្ងៃទី២៦ តុលា នៅក្នុងផ្ទះរបស់ស្ត្រីរងគ្រោះស្ថិតនៅឃុំអូរតាគី ស្រុកថ្មគោល។ ជនសង្ស័យឈ្មោះញ៉ាន សួស អាយុ២២ឆ្នាំ រីឯស្រ្តីរងគ្រោះឈ្មោះស.វ អាយុ២១ឆ្នាំ មានប្តី និងមានកូន១។ លោកអ៊ុយ រិទ្ធ នាយនគរបាលប៉ុស្តិ៍ឃុំអូរតាគីបញ្ជាក់ថា ជនសង្ស័យត្រូវចាប់ខ្លួនមួយថ្ងៃបន្ទាប់ពីស្ត្រីរងគ្រោះប្តឹងចោទប្រកាន់។ ខណៈស្រវឹងធ្លាក់ភ្នែក ជននោះបន្លំធ្វើប្តីរបស់ស្ត្រីរងគ្រោះ ហើយលូនចូលមុងដើម្បីរួមរ័ក តែនាងស្រែកឱ្យគេជួយក្រោយពីរួមរ័កបានបន្តិចខុសទំលាប់របស់ប្តី ធ្វើឱ្យនាងមានការសង្ស័យថា មិនមែនជាប្តីរបស់ខ្លួន។
តាមការស្រង់សំដីរបស់សមត្ថកិច្ចឱ្យដឹងថា ឈ្មោះសួស បានផឹកស៊ីនាយប់នោះជាមួយអ្នកជិតខាងរួមជាមួយប្តីស្ត្រីរងគ្រោះផង។ លុះពេលរំលងអធ្រាត្រក្នុងគ្រាដែលបុរសជាប្តីកំពុងស្រវឹងខ្លាំង ជននោះឆ្លៀតឱកាសរំដោះខ្លួនចេញពីវង់ផឹកស៊ីមុនទៅបន្លំដេកជាមួយស្ត្រីរងគ្រោះ។ ពេលនោះគេមិននិយាយឮៗទេ ហើយស្ត្រីរងគ្រោះនឹកស្មានថា ប្តីខ្លួន ព្រោះងងឹតក៏សំងំឱ្យគេស្ទាបអង្អែលតាមចិត្ត។ ទោះបីជាបែបណាក្តី ពេលចាប់ផ្តើមរួមរ័កបានបន្តិចនាងមានការសង្ស័យរឿងប្តីសិប្បនិម្មិតនេះស្រាតខោត្រឹមជង្គង់ ព្រោះរាល់លើកមិនដែលស្រាតខោពាក់កណ្តាលបែបនេះទេ ។ នាងបញ្ឈប់សកម្មភាពភ្លាមស្ទុះទៅបើកភ្លើងមើលមុខជនសង្ស័យស្រាប់តែដឹងច្បាស់មិនែមនប្តីរបស់ខ្លួនក៏ស្រែកឆោឡោឱ្យគេជួយតែម្តង។ គ្រានោះជនសង្ស័យលើកខោរត់គេចបាត់ភ្លាម។
នៅមុខសមត្ថកិច្ចជនសង្ស័យនិយាយថា ពេលផឹកស៊ីប្តីនារីនោះប្រើគេឱ្យទៅយកសាច់ក្លែមនៅផ្ទះរបស់ខ្លួន លុះពេលចូលទៅក្នុងផ្ទះគេដើរបុកបង្គោលមុងដួលក្បែរនោះ តែគេមិនបានធ្វើអ្វីលើប្រពន្ធគេទេ។ លោកគុយ ហ៊ាង ប្រធានការិយាល័យប្រឆាំងការជួញដូរមនុស្ស និងការពារអនីតិជនបញ្ជាក់ថា ចំលើយរបស់ជនសង្ស័យគឺគ្រាន់តែឆ្លើយដោះខ្លួនប៉ុណ្ណោះ៕
ចែករំលែកព័តមាននេះ