ខេត្តព្រៃវែង៖ កសិករចិញ្ចឹមជ្រូកសាច់ នៅក្នុងភូមិជាខ្លាង ឃុំជាខ្លាង ស្រុកស្វាយអន្ទរ ខេត្តព្រៃវែង សម្តែងនូវទឹកចិត្តសប្បាយរីករាយ ខណ:ជ្រូករបស់ពួកគាត់ លក់បានថ្លៃបន្តិច។ នៅពេលនេះ…
ខេត្តព្រៃវែង៖ កសិករចិញ្ចឹមជ្រូកសាច់ នៅក្នុងភូមិជាខ្លាង ឃុំជាខ្លាង ស្រុកស្វាយអន្ទរ ខេត្តព្រៃវែង សម្តែងនូវទឹកចិត្តសប្បាយរីករាយ ខណ:ជ្រូករបស់ពួកគាត់ លក់បានថ្លៃបន្តិច។ នៅពេលនេះ ជ្រូករបស់កសិករចិញ្ចឹម លក់បានថ្លៃពី ១៣០០០រៀល ទៅ ១៤០០០រៀល គឺឡើងថ្លៃបន្តិច។ ប៉ុន្តែចំណីជ្រូក ក៏ឡើងថ្លៃដែរ សព្វថ្ងៃ។
កសិករចិញ្ចឹមជ្រូកសាច់លក់ បានលើកឡើងប្រហាក់ប្រហែលគ្នាថា ក្រៅពីមុខរបរធ្វើស្រែចំការបន្តិចបន្តួច ពួកគាត់ក៏ងាកមកចិញ្ចឹមជ្រូកមេ និងជ្រូកសាច់លក់នេះ ម្នាក់ៗ ខ្លះជាង ២០ឆ្នាំ ខ្លះជាង ១០ឆ្នាំមកហើយ។ ដោយបបរត្រកួន និងអង្ករលាយជាមួយចំណីរបស់ក្រុមហ៊ុន អោយស៊ីប្រើរយ:ពេលត្រឹមតែជាង ៣ខែប៉ុណ្ណោះ គឺបានទម្ងន់ ១ក្បាល ចាប់ពី ៨០ ទៅ ១០០គីឡូក្រាម ឈ្មួញមកចាប់ដល់ផ្ទះ ក្នុង ១គីឡូក្រាម តម្លៃ ១៣០០០រៀល ទៅ ១៤០០០រៀល។
កសិករខ្លះ មិនចង់ទុកកូនជ្រូកចិញ្ចឹមសាច់ ហើយពេលជ្រូកកើតរួច គ្រាន់តែបំប៉នវាបន្តិច លក់កូនអោយគេ ក៏បានតម្លៃ ១ក្បាល ជាង ៣០ម៉ឺនរៀលដែរ។
កសិករបញ្ជាក់បន្ថែមទៀតថា កាលពីមុនអ្នកភូមិជាខ្លាងនេះ ចិញ្ចឹមជ្រូកមេ និងជ្រូកសាច់សឹងតែគ្រប់ផ្ទះ។ ប៉ុន្តែដោយសារមានការនាំចូលសត្វជ្រូករស់ពីប្រទេសជិតខាងច្រើន ធ្វើអោយតម្លៃជ្រូកកសិករខ្មែរ ធ្លាក់ថ្លៃថោកកប់ពពក ហើយណាមួយ ជ្រូកមានជំងឺផង កសិករក៏បោះបង់ ផ្អាកមុខរបរចិញ្ចឹមជ្រូកនេះ មួយរយ:ទៅ។
ឥឡូវរាជរដ្ឋាភិបាលបិទមិនអោយមានការនាំចូលសត្វជ្រូករស់ពីប្រទេសជិតខាង ទើបធ្វើអោយជ្រូកក្នុងស្រុក ឡើងថ្លៃ រយ:ពេល ២ឆ្នាំចុងក្រោយនេះ។ ពួកគាត់ខ្លះ ក៏ចាប់ផ្តើមចិញ្ចឹមជ្រូកវិញ ដែលបានជួយលើកស្ទួយជីវភាពគ្រួសារ បានធូធារមួយកម្រិត។ រីឯកសិករខ្លះទៀត មិនមានដើមទុន ក៏លែងចិញ្ចឹម រហូតមកទល់បច្ចុប្បន្ននេះ។
ទន្ទឹមនឹងជ្រូកកសិករ ឡើងថ្លៃបន្តិចនោះដែរ ស្រាប់តែចំណីជ្រូក ក៏ឡើងថ្លៃហួសកម្រិតដែរ ដោយ ១បេ តម្លៃរហូតដល់ ១១៦០០០រៀលឯណោះ ខណ:ពីមុនតម្លៃត្រឹមតែ ១០៣០០០រៀល ក្នុង ១បេ ដែលធ្វើអោយកសិករត្អូញត្អែគ្រប់ៗគ្នា។
ដូច្នេះកសិករចិញ្ចឹមជ្រូក ក៏សូមសំណូមពរដល់អាជ្ញាធរស្ថាប័នពាក់ព័ន្ធ ជាពិសេសប្រមុខរាជរដ្ឋាភិបាល មេត្តាជួយសម្រួលបញ្ចុះតម្លៃចំណីបន្តិច និងជួយរឹតបន្តឹងបន្ថែម កុំអោយមានការនាំចូលជ្រូកពីប្រទេសជិតខាងបន្តទៀត ដើម្បីអោយជ្រូកខ្មែរ បានថ្លៃ៕
ចែករំលែកព័តមាននេះ