ចាប់ពីថ្ងៃទី២២ ដល់៣១ មករា យុវសិស្សសាលារៀនសុវណ្ណភូមិ បានចូលរួមក្នុងកម្មវិធី ASEAN Exploration Program ដែលរៀបចំដោយ The Prince Royal’s College នៃព្រះរាជាណាចក្រថៃ ។ សិស្សឆ្នើមសាលារៀនសុវណ្ណភូមិទាំង៩រូប បានចែករំលែកនូវការសិក្សារបស់ខ្លួន និងទទួលបានមកវិញនូវបទពិសោធន៍ដ៏មានតម្លៃ ពីកម្មវិធីដែលមានរយៈពេល១០ថ្ងៃនេះ ។ គួរបញ្ជាក់ផងដែរថាកម្មវិធី ASEAN Exploration Program ត្រូវបានរៀបចំឡើងក្នុងគោលបំណងផ្តល់ឱកាសដល់សិស្សានុសិស្សសមាជិកអាស៊ានទាំងអស់នូវ៖
១-ការចែករំលែកវប្បធម៌ ទំនៀមទម្លាប់របស់ប្រទេសអាស៊ាននីមួយៗ
២-ការស្វែងយល់អំពីវិធីសាស្ត្រ ក្នុងការសិក្សារបស់សិស្សានុសិស្សដែលមកពីប្រទេសផ្សេងៗគ្នា
៣-ការស្វែងយល់ពីដំណើរការនៃការធ្វើដំណើរទៅក្រៅប្រទេស
៤-ការសិក្សាពីវប្បធម៌ ទំនៀមទម្លាប់ ការរស់នៅរបស់ជនជាតិនីមួយៗ តាមរយៈការស្នាក់នៅផ្ទាល់ជាមិត្តភក្តិ ដែលមកពីប្រទេសផ្សេងគ្នា (Homestay)
៥-ការទស្សនាកម្សាន្តនៅកន្លែងទេសចរណ៍ល្បីៗនៅក្នុងប្រទេសតំបន់អាស៊ាន
នេះបញ្ជាក់ឱ្យឃើញថា សាលារៀនសុវណ្ណភូមិបានយកចិត្តទុកដាក់ក្នុងការពង្រឹង និងពង្រីកកម្មវិធីសិក្សារបស់ខ្លួន តាមរយៈការរឹតចំណងមិត្តភាពជាមួយដៃគូអន្តរជាតិ ។ តាមរយៈដៃគូអន្តរជាតិ សិស្សានុសិស្សរបស់សាលារៀនសុវណ្ណភូមិមានឱកាសទៅធ្វើទស្សនកិច្ចសិក្សា និងទទួលបានអាហារូបករណ៍ទៅសិក្សានៅក្រៅប្រទេស ជាពិសេសប្រទេសដែលមានការអភិវឌ្ឍខ្លាំងក្នុងវិស័យអប់រំ ។ សាលារៀនសុវណ្ណភូមិនឹងបន្តរៀបចំកម្មវិធីផ្លាស់ប្តូរការសិក្សានេះទៅកាន់ប្រទេសផ្សេងៗទៀត នាពេលដ៏ខ្លីខាងមុខ ។
គួរបញ្ជាក់ផងដែរថា នៅខែមីនាខាងមុខនេះ សាលារៀនសុវណ្ណភូមិនឹងរៀបចំកម្មវិធីបោះជំរំអាស៊ាន (ASEAN CAMP 2016) ដែលនឹងចាប់ផ្តើមនៅទីក្រុងភ្នំពេញ និងបញ្ចប់នៅខេត្តសៀមរាប ៕
ចែករំលែកព័តមាននេះ