ខេត្តពោធិ៍សាត់ ៖ មានការភ្ញាក់ផ្អើលទាំងកណ្តាលថ្ងៃត្រង់ ខណៈពេលដឹងថា មានមន្ត្រីប៉េអឹមស័ក្តិធំម្នាក់ ដេកស្លាប់ក្នុងបន្ទប់ផ្ទុះម៉ាស្សាមួយ បន្ទាប់ពីធ្វើសរសៃ និងកោសជប់រួច ។ ករណីនេះបានកើតឡើងនៅផ្ទះម៉ាស្សាមួយកន្លែង ដែលមានយីហោដៃពិសេសធ្វើសរសៃតាមបែបបុរាណ ស្ថិតក្នុងភូមិចំការចេកខាងជើង សង្កាត់ផ្ទះព្រៃ ក្រុងពោធិ៍សាត់វេលាម៉ោង១ និង៣០នាទីរសៀលថ្ងៃទី៧ កុម្ភៈ ២០១១ ។
តាមប្រភពពីប៉ូលិសក្រុងពោធិ៍សាត់ឱ្យដឹងថា ជនរងគ្រោះឈ្មោះម៉ៅ វណ្ណា ភេទប្រុស អាយុ៥៣ឆ្នាំ មានឋានន្តរស័ក្តិវរសេនីយ៍ឯកជាមេបញ្ជាការរងកងរាជអាវុធហត្ថខេត្តពោធិ៍សាត់ទទួលបន្ទុកនាយសេនាធិការ ។ ស្ត្រីម្ចាស់ផ្ទះម៉ាស្សាឱ្យដឹងថា ជនរងគ្រោះតែងមកម៉ាស្សាកោសជប់នៅហាងរបស់គាត់ជាញឹកញាប់ ហើយនៅថ្ងៃកើតហេតុនោះម៉ោងប្រហែល១០ និង៣០នាទីព្រឹកជនរងគ្រោះបានចូលមកម៉ាស្សា ។ បន្ទាប់ពីសហការីធ្វើសរសៃ និងកោសជប់ខ្យល់រួច មន្ត្រីប៉េអឹមនោះមិនទាន់ចេញទៅភ្លាមទេ គឺសុំបន្ទប់សំរាកមួយសន្ទុះសិន។ ស្ត្រី ម្ចាស់ផ្ទះមិនបានចាប់អារម្មណ៍ទេ ព្រោះនឹកស្មានថា គាត់សំរាន្តលក់មិនឱ្យកូនចៅដាស់ទេ។ លុះរហូតដល់ម៉ោង១ និង៣០នាទីរសៀលមានមន្ត្រីប៉េអឹម២នាក់មកសួរគាត់រកមន្ត្រីប៉េអឹមនោះក៏ចង្អុលឱ្យទៅបើកបន្ទប់មើល ស្រាប់តែភ្ញាក់ផ្អើលថា ស្លាប់បាត់ទៅហើយ។
តាមព័ត៌មានពីមន្ត្រីប៉េអឹមម្នាក់ឱ្យដឹងថា កាលពីព្រឹកមិញ បន្ទាប់ពីគោរពទង់ជាតិរួច ជនរងគ្រោះបានប្រាប់ថា ហាក់ដូចជាថប់ៗដង្ហើមក៏ចូលបន្ទប់ឱ្យខ្លួនអង្រួនដើមទ្រូងបានធូរស្បើយ រួចក៏បើករថយន្តចេញទៅក្រៅបាត់ ។ រហូតដល់ម៉ោង១១និង៣០នាទី ជនរងគ្រោះបានទូរស័ព្ទមកប្រាប់ថា មិនស្រួលខ្លួនទៅឱ្យគេកោសជប់សិន។ នៅម៉ោង១២ និង៣០នាទី ខ្លួនបានទូរស័ព្ទហៅគាត់ឱ្យមកហូបបាយ តែទូរស័ព្ទយ៉ាងណាក៏មិនលើកដែរ ។ ភ្លាមនោះខ្លួនមានការសង្ស័យក៏មករកនៅកន្លែងម៉ាស្សាខាងលើ ក៏ជួបព្រឹត្តិការណ៍បែបនេះតែម្តង ។
តាមការធ្វើកោសល្យវិច័យរបស់គ្រូពេទ្យបញ្ជាក់ថា ជនរងគ្រោះស្លាប់ដោយខ្យល់គរ បណ្តាលឱ្យដាច់សរសៃឈាម និងគាំងបេះដូង ប៉ុន្តែមិនមានការរួមរ័កទេ ។ ប្រភពព័ត៌មានឱ្យដឹងថា កាលពីល្ងាចថ្ងៃទី៦ លោកម៉ៅ វណ្ណា មានជំងឺលើសឈាមទៅព្យាបាលនៅមន្ទីរពេទ្យខេត្តម្តងហើយ ។ ពេលបានធូរស្រាលបន្តិចគួបផ្សំគ្មានប្រពន្ធកូនមើលថែផងនោះ គាត់ក៏ចេញពីមន្ទីរពេទ្យវិញ ។ លុះស្អែកឡើងក៏ជួបគ្រោះថ្នាក់ស្លាប់ដោយដាច់សរសៃឈាម និងគាំងបេះដូងនៅកន្លែងម៉ាស្សាតែម្តង ។ សាកសពត្រូវបានប្រគល់ឱ្យគ្រួសារយកទៅធ្វើបុណ្យនៅស្រុកកំណើតឯខេត្តបន្ទាយមានជ័យ ៕
ចែករំលែកព័តមាននេះ