ខេត្តកំពត ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍បញ្ជាក់ថា ភូមិអភិវឌ្ឍន៍យោធិនពិការកោះស្លា នៅសល់ផ្ទះ២២ខ្នង។ ខ្ញុំត្រៀមលក្ខណសម្បត្តិសម្រាប់បងប្អូនយើង បើមានធ្លាក់ខ្លួនពិការនៅសមរភូមិប្រាសាទព្រះវិហារ គឺបងប្អូនទាំងនោះនឹងត្រូវមករស់នៅកន្លែងនេះ។
សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់បែបនេះ កាលពីព្រឹកថ្ងៃទី៥ ខែមីនា ឆ្នាំ២០១១ ក្នុងឱកាសដែលសម្តេច និងលោកជំទាវបណ្ឌិត អញ្ជើញជាអធិបតីភាពដ៏ខ្ពង់ខ្ពស់ក្នុងពិធីសំណេះសំណាលសួរសុខទុក្ខយោធិនពិការ និងសម្ពោធវិទ្យាល័យប៊ុន រ៉ានី ហ៊ុន សែន កោះស្លា ដែលមាន២ជាន់ ១២បន្ទប់ និងអគារសម្ភព១ខ្នង នៅភូមិអភិវឌ្ឍន៍យោធិនពិការកោះស្លា ស្ថិតក្នុងស្រុកឈូក ខេត្តកំពត។
សម្តេចតេជោនាយករដ្ឋមន្ត្រីមានប្រសាសន៍បន្តថា ផ្ទះទាំង២២ខ្នងនោះ ក្នុងករណីដែលមានអ្នកពិការថ្មី ហើយដែលបាត់បង់សមត្ថភាពនឹងត្រូវបញ្ជូនមកកាន់កន្លែងនេះ។ នេះជាការត្រៀមរៀបចំសំណាញ់សុត្ថិភាពមួយដែលខ្ញុំចង់បង្ហាញអំពីកម្មវិធីនយោបាយ បញ្ជាក់អះអាងនូវការរៀបចំសំណាញ់សុវត្ថិភាពដោះស្រាយអ្នកដែលពិការជាន់មុន និងរៀបចំស្ថានភាពនៃអ្នកដែលពិការថ្មី ព្រោះពួកឈ្លានពានទឹកដីរបស់យើងវាមិនដែលចោលក្បួនទេ។
សម្តេចតេជោនាយករដ្ឋមន្ត្រីមានប្រសាសន៍បញ្ជាក់ថា ការមកកាន់ទីនេះ គឺមិនមែនគ្រាន់តែបញ្ជូនបងប្អូនចេញពីមណ្ឌលពិការកៀនស្វាយ ឱ្យរួចផុតតែពីដៃនោះទេ ខ្ញុំមិនធ្វើបែបនេះទេ។ ដូច្នេះ ខ្ញុំមានការទទួលខុសត្រូវតាមដានមើលអំពីចលនានៃការវិវត្តជីវភាពរស់នៅរបស់បងប្អូនដែលបានមកតាំងទីលំនៅថ្មីនៅទីនេះ មិនមែនគ្រាន់តែមកដាក់ឱ្យរួចពីដៃ ធ្វើផ្ទះហើយប្រគល់ដីរួច ទីចុងបំផុតបោះបង់ចោល ទីបំផុតអ្នកទាំងនោះធ្លាក់នៅក្រោមបន្ទាត់នៃភាពក្រីក្រនោះទេ។ បន្ថែមពីលើនោះ សំខាន់គឺការសិក្សារបស់កូនចៅអស់លោក លោកស្រីជាយោធិនដែលត្រូវបានទទួលការយកចិត្តទុកដាក់ ដូច្នេះ ហេដ្ឋារចនាសម្ព័ន្ធទាំងអស់ត្រូវតែរៀបចំ ក្មួយៗសិស្សានុសិស្សដែលជាកូនចៅរបស់ប្រជាពលរដ្ឋនៅតំបន់នេះ ក៏ដូចជាកូនយុទ្ធជនពិការដែរ គឺធានាថា ក្មួយៗទាំងអស់នឹងបានចូលរៀនយ៉ាងហោចណាស់៩ឆ្នាំ និងបន្តសិក្សានៅមធ្យមសិក្សាកំរិត២ទៀត។
ពាក់ព័ន្ធនឹងបញ្ហាទឹក សម្តេចតេជោនាយករដ្ឋមន្ត្រីមានប្រសាសន៍ថា ត្រូវដោះស្រាយបន្ទាន់ និងបានប្រគល់ភារកិច្ចជូនក្រសួងអភិវឌ្ឍន៍ជនបទ កសាងអណ្តូងស្នប់បន្ថែមចំនួន៣០ទៀត ព្រមទាំងស្តារស្រះដែលមានស្រាប់បន្ថែមទៀត។ ទន្ទឹមនេះ សម្តេចស្នើឱ្យក្រសួងធនធានទឹកធ្វើការសិក្សាស្ទឹងសំបួរ តើតំបន់ស្ទាក់ទឹកកន្លែងណា ដែលអាចធ្វើបានដើម្បីបំរើឱ្យប្រជាជននៅតំបន់នេះ ដើម្បីឱ្យប្រជាជននៅតំបន់នេះមានទឹកប្រើប្រាស់គ្រប់គ្រាន់ផងដែរសម្រាប់ស្រោចស្រពវិស័យកសិកម្ម។ ដូច្នេះផ្នែកទឹកនេះត្រូវតែជាអាទិភាពក្នុងការដោះស្រាយបន្ត។ ទាក់ទងនឹងការសាងសង់សាលាឃុំ សម្តេចតេជោនាយករដ្ឋមន្ត្រីបានស្នើទៅលោកអភិបាលខេត្តកំពតថា ការសាងសង់គួរតែកុំដាក់នៅក្នុងមណ្ឌលនេះ ព្រោះការបោះឆ្នោតគឺការបោះសមាមាត្រ សម្តេចព្រួយបារម្ភក្រែងមានការមកបង្កហេតុពីបក្សប្រឆាំង នាំឱ្យមានបញ្ហាបណ្តាលមកពីការជេរដល់យុទ្ធជនពិការ។
សម្តេចតេជោមានប្រសាសន៍សង្កត់ធ្ងន់ថា ខ្ញុំស្អប់ណាស់ចំពោះអ្នកដែលប្រមាថមើលងាយអ្នកពិការ សូម្បីតែខ្ញុំក៏ត្រូវគេប្រមាថជាច្រើនលើកមកហើយ ប៉ុន្តែអ្នកដែលប្រមាថអ្នកពិការគង់តែងាប់…។ ខ្ញុំជាជនពិការម្នាក់ដែរ ខ្ញុំត្រូវតែការពារ ហើយម្យ៉ាងទៀតវាអសីលធម៌ ព្រោះជនពិការគេគោរពណាស់ ឥឡូវសូម្បីតែច្បាប់សម្រាប់ជនពិការត្រូវដាក់កូតាសម្រាប់ឱ្យទទួលយកជនពិការចំពោះស្ថាប័នរដ្ឋ និងក្រុមហ៊ុន។ មនុស្សដែលប្រមាថជនពិការ បើឱ្យដឹកនាំប្រទេសវិញគឺរលាយ កុំថាឱ្យដឹកនាំប្រទេស ឱ្យធ្វើជាមេភូមិក៏វារលាយដែរ សូម្បីតែគ្រួសាររបស់គេក៏មិនត្រូវគ្នាដែរ។ គួរណាស់ត្រូវតែមានចិត្តអាណិតអាសូរដល់ជនពិការ ហើយអ្នកទាំងនេះទៀត ពិការដោយសារជាតិ ដោយសារសាសនា។ បើសិនជាកុំមានចម្បាំង យើងក៏មិនមានអ្នកពិការទេ។
ក្នុងឱកាសនោះ សម្តេចតេជោ និងលោកជំទាវបណ្ឌិត ក៏បានចែកអំណោយ និងសំភារ ថវិកាសម្រាប់ឧបត្ថម្ភជូនដល់គ្រួសារយោធិនពិការភូមិអភិវឌ្ឍន៍កោះស្លា៣១៧គ្រួសារ នាយទាហាន នាយទាហានរង និងពលទាហានចំនួន២៣៤គ្រួសារ ដោយក្នុង១គ្រួសារៗទទួលបានស្មើៗគ្នា គឺទឹកក្រូច១កេស, មីយើង១កេស, ប្រេងឆា៥លីត្រ, អំបិលអុីយ៉ូត១០គីឡូក្រាម, សារុង២, មុងនីឡុង១, អង្ករ៥០គីឡូក្រាម, ត្រីខ១២កំប៉ុង, ប៊ីចេង១គីឡូក្រាម, ស្ករស៥គីឡូក្រាម, ក្រមា២, ភួយពោះគោ១ និងថវិកា២០ម៉ឺនរៀល។ គ្រូបង្រៀនចំនួន៥៦នាក់ និងគ្រូពេទ្យ៣៣នាក់ ក៏បានទទួលសំភារ និងថវិកាដូចគ្រួសារយោធិនពិការដែរ។ សិស្សានុសិស្ស១.៣៧៤នាក់ ក្នុងម្នាក់ៗទទួលបានសៀវភៅ២ក្បាល ប៊ិច១ដើម និងថវិកា៥ពាន់រៀល។ ចំពោះម៉ូតូវីវ៉ាចំនួន២៦គ្រឿង ក្នុងនោះលោកគ្រូ អ្នកគ្រូបាន២៥គ្រឿង និង១គ្រឿងជូនដល់លោកគ្រូពេទ្យ។
ចំពោះអ្នកជំងឺសម្រាកនៅក្នុងមន្ទីរពេទ្យចំនួន២០នាក់ ក្នុងម្នាក់ៗទទួលបានទឹកក្រូច១កេស, មី១កេស, ត្រីខ១២កំប៉ុង, ទឹកដោះគោឆៅ២៤កំប៉ុង, ស្ករស៥គីឡូក្រាម, សារុង១, ក្រមា១ និងថវិកា១០ម៉ឺនរៀល។
លោកឧត្តមសេនីយ៍ទោ ទិត្យ ម៉េងឡុង តំណាងភូមិអភិវឌ្ឍន៍យោធិនពិការកោះស្លា បានធ្វើសេចក្តីរាយការណ៍អំពីជីវភាពរស់នៅ និងការរីកចម្រើននៅភូមិអភិវឌ្ឍន៍ បន្ទាប់ពីយោធិនពិការ និងក្រុមគ្រួសារបានមករស់នៅរយៈពេល៣៥ខែ គឺតាំងពីឆ្នាំ២០០៨មក។ របាយការណ៍លោកឧត្តមសេនីយ៍ទោបានបង្ហាញថា ជីវភាពរស់នៅរបស់យោធិន និងក្រុមគ្រួសារកាន់តែល្អប្រសើរពីមួយថ្ងៃទៅមួយថ្ងៃ ហើយការដាំដុះដំណាំគ្រប់ប្រភេទ ការចិញ្ចឹមសត្វលើផ្ទៃដីដែលបានចែកជូនបងប្អូន គឺការបង្កបង្កើនផលបានប្រមាណ៨៥%។
លោកឧត្តមសេនីយ៍ទោបន្តថា នៅឆ្នាំ២០១១នេះ យោធិនពិការនឹងអាចសម្រេចបាន១០០% លើផ្ទៃដីដែលបានចែកជូន ដើម្បីប្រែក្លាយជីវភាពរស់នៅរបស់ក្រុមគ្រួសារឱ្យកាន់តែល្អប្រសើរថែមទៀតឆ្លើយតបនូវគុណបំណាច់ដែលមិនអាចកាត់ថ្លៃបានរបស់សម្តេចអគ្គមហាសេនាបតីតេជោ ហ៊ុន សែន និងលោកជំទាវបណ្ឌិត ប៊ុន រ៉ានី ហ៊ុន សែន ដែលបានគិតគូរខ្ពស់ និងជួយឧបត្ថម្ភគ្រប់បែបយ៉ាងដល់យោធិនពិការ និងក្រុមគ្រួសារ គ្រូពេទ្យ គ្រូបង្រៀន ក្នុងភូមិអភិវឌ្ឍន៍យោធិនពិការកោះស្លានេះ។ ទន្ទឹមនេះ លោកក៏បានសំណូមពរដល់សម្តេចតេជោ និងលោកជំទាវបណ្ឌិត សូមជួយដោះស្រាយទឹកឱ្យបានគ្រប់គ្រាន់ក្នុងការប្រើប្រាស់ និងស្រោចស្រពវិស័យកសិកម្មក្នុងការបង្កបង្កើនផលក្នុងតំបន់អភិវឌ្ឍន៍យោធិនពិការនេះ៕
ចែករំលែកព័តមាននេះ