រាជធានីភ្នំពេញ៖ក្រោយពីមានការអំពាវនាវស្វែងរកថវិកាដើម្បីផ្គត់ផ្គង់ជួយមន្ទីរពេទ្យគន្ឋបុប្ផានោះរួចមក មន្ទីរពេទ្យទន្តសាស្រ្តរំចង់បានបរិច្ចាគថវិកាផ្ទាល់២០លានរៀល
រាជធានីភ្នំពេញ៖ក្រោយពីមានការអំពាវនាវស្វែងរកថវិកាដើម្បីផ្គត់ផ្គង់ជួយមន្ទីរពេទ្យគន្ឋបុប្ផានោះរួចមក មន្ទីរពេទ្យទន្តសាស្រ្តរំចង់បានបរិច្ចាគថវិកាផ្ទាល់២០លានរៀលនិងបុគ្គលិកមន្ទីរពេទ្យរំចង់ប្រមាណ២០នាក់ បានស្ម័គ្រចិត្តបរិច្ចាគឈាមដើម្បីជួយសង្គ្រោះអ្នករងរបួសរឺអ្នកជំងឺធ្ងន់ធ្ងរជូនដល់មន្ទីរពេទ្យគន្ឋបុប្ផាទី៤ នៅរាជធានីភ្នំពេញ កាលពីល្ងាចថ្ងៃទី ០១ ខែកុម្ភៈ ឆ្នាំ២០១៦ ។
អគ្គនាយកមន្ទីរពេទ្យទន្តសាស្រ្តរំចង់ លោកទន្តបណ្ឌិត ទិត ហុងយឺ បានមានប្រសាសន៍ថាការបរិច្ចាគថវិកាថ្ងៃនេះ ដើម្បីជាការអបអរសាទរគំរប់ខួប២០ឆ្នាំរបស់មន្ទីរពេទ្យទន្តសាស្ត្ររំចង់ ។ លោកថាមន្ទីពេទ្យទន្តសាស្ត្ររំចង់ បានធ្វើបរិច្ចាគថវិកាផ្ទាល់ខ្លួនចំនួន២០លានរៀលជូនដល់មន្ទីរពេទ្យកុមារគន្ធបុប្ផា ដើម្បីផ្តល់លទ្ធភាពដល់មន្ទីរពេទ្យបន្តរក្សាបាននូវសេវាព្យាបាលមានគុណភាពសំរាប់កុមារ និងស្រ្តីកម្ពុជាជារៀងរហូត ។
ជាមួយគ្នានោះដែរគណៈគ្រប់គ្រង និងបុគ្គលិករបស់មន្ទីរពេទ្យទន្តសាស្ត្ររំចង់ ក៍បានអំពាវនាវនិងលើកទឹកចិត្តដល់សាធារណជនទាំងអស់ ចូលរួមបរិច្ចាគឈាម ដើម្បីជួយសង្គ្រោះជីវិតកុមាររងគ្រោះ និងអ្នកជំងឺគ្រប់វ័យដែលត្រូវការឈាមជាចាំបាច់ ។ លោកអគ្គនាយកមន្ទីទេព្យលើកឡើងទៀតថារយៈពេល២០ឆ្នាំកន្លងមកនេះ”រំចង់”បានពុះពារគ្រប់បែបយ៉ាងដើម្បីផ្តល់ជូននូវសេវាពេទ្យធ្មេញដែលមានគុណភាព និងបច្ចេសទេសខ្ពស់ជូនដល់អតិថិជនជាតិ និងអន្តរជាតិ និងត្រូវបានទទួលស្គាល់គុណភាពស្តង់ដាអន្តរជាតិ ប្រកបដោយភាពល្បីល្បាញជាពេទ្យធ្មេញល្អបំផុតនៅក្នុងរាជធានីភ្នំពេញ ។
បើតាមលោកវេជ្ជបណ្ឌិត Beat Richner(បេអាត រីច្នឺ) ប្រធាននិងស្ថាបនិកនៃមន្ទីរពេទ្យគន្ធបុប្ផា បានបង្ហាញនៅក្នុងរបាយការណ៍មួយដែលផ្សព្វផ្សាយនៅក្នុងហេ្វសប៊ុកផ្ទាល់ខ្លួនថា ក្នុងរយៈពេល២៤ឆា្នំកន្លងមកនេះ ពោលគឺចាប់តំាងពីឆ្នាំ១៩៩២មក មន្ទីរពេទ្យគន្ធបុប្ជាបានចំណាយថវិកាអស់ចំនួន៥៦៣លានដុល្លារហើយ ក្នុងបេសកកម្មសង្គ្រោះជីវិតកុមារក្រីក្ររបស់កម្ពុជា ។ បើតាម លោក បេអាត រីច្នឺ ក្នុងចំណោមថវិកាទាំង៥៦៣លានដុល្លារនោះ ៨៦,៤ភាគរយ គឺជាវិភាគទានសប្បុរសជនដែលភាគច្រើនមកពីប្រជាជនរស់នៅក្នុងប្រទេសស្វីស ៤,៧ភាគរយ បានមកពីការចូលរួមវិភាគទានរបស់រាជរដ្ឋាភិបាលកម្ពុជា និង៨,៩ភាគរយបានមកពីការចូលរួមវិភាគទានរបស់រដ្ឋាភិបាលស្វីស ។ របាយការណ៍ដដែលបានបង្ហាញទៀតថា ក្នុងរយៈពេល២៤ឆ្នាំកន្លងមកនេះ មានកុមារឈឺចំនួន១៤,៨៣៧,១៥៥នាក់ ដែលបានទទួលការពិនិត្យ ព្យាបាលនៅក្នុងផ្នែកពិគ្រោះជំងឺក្រៅ និងកុមារដែលមានជំងឺនិងរបួសធ្ងន់ៗ មានចំនួន១,៥១៦,៤៧១នាក់ ត្រូវបានជួយសង្គ្រោះ និងបានជាសះស្បើយនៅមន្ទីរពេទ្យគន្ធបុប្ផា ។ ៨០ភាគរយនៃកុមារដែលមានជំងឺធ្ងន់ធ្ងរទាំងនោះ នឹងគ្មានសំណាងល្អឡើយប្រសិនបើមិនបានដាក់ឲ្យសម្រាកនៅមន្ទីរពេទ្យទេនោះ។ សម្រាប់ផ្នែកសម្ភពវិញ មានស្ត្រីចំនួន១៩២,៨៩៧នាក់មកសម្រាលកូន និងមានការពិនិត្យតាមដានផ្ទៃពោះចំនួន ១,៣៩០,៣២៣ដង នៅក្នុងផ្នែកពិគ្រោះជំងឺក្រៅនៃសម្ភព ។
គួរបញ្ជាក់ថា ក្នុងមួយថ្ងៃ មន្ទីរពេទ្យគន្ធបុប្ផា ត្រូវចំណាយថវិកាចំនួន១២ម៉ឺនដុល្លារដើម្បីព្យាបាលជំងឺដោយឥតគិតថ្លៃដល់កុមារកម្ពុជា ៕
ចែករំលែកព័តមាននេះ