ខេត្តបន្ទាយមានជ័យ ៖ គ្រួសារបុរសពិការជើងមួយរូបនៅខេត្តបន្ទាយមានជ័យ បានដាក់ពាក្យបណ្តឹងជាមួយប៉ូលិសប្រឆាំងការជួញដូរមនុស្ស ដោយចោទប្រកាន់អនុភូមិមួយរូបថា បានចាប់រំលោ.ភកូនស្រីរបស់ខ្លួនទើបតែមានអាយុ១៤ឆ្នាំ ហើយថែមទាំងរឹបអូសយកដី ដែលរាជរដ្ឋាភិបាលប្រគល់ជូនជនពិការពីក្រុមគ្រួសាររបស់ខ្លួនទៀតផង ។
តែយ៉ាងណាមិញ អនុភូមិតេជោភ្នំឆ័ត្រ បានបដិសេធចំពោះការចោទប្រកាន់ខាងលើនេះ ។
បើតាមលោកស្រី វ៉ា សុខជា អាយុ៤៥ឆ្នាំ និងប្តីឈ្មោះ អៀម អ៊ុន អាយុ៥១ឆ្នាំ (ពិការទាំង២នាក់) ដោយប្តីពិការជើងម្ខាង ហើយសព្វថ្ងៃនៅប្រទេសថៃដើរសុំទានគេ ចំណែកប្រពន្ធពិការដាច់ម្រាមដៃទាំងសងខាងនៅផ្ទះ ស្ថិតក្នុងភូមិភ្នំឆ័ត្រ ឃុំស្វាយចេក ស្រុកស្វាយចេក ខេត្តបន្ទាយមានជ័យ បានស្នើសុំដល់អាជ្ញាធរ និងសមត្ថកិច្ចជួយរកយុត្តិធម៌ដល់កូនស្រីរបស់គាត់ ដែលមានអាយុ ១៤ឆ្នាំ ។ លោកស្រី វ៉ា សុខជា បានចោទប្រកាន់ ឈ្មោះសុខ ប៊ុន្នី ជាអនុភូមិតេជោភ្នំឆ័ត្រ ថា បានធ្វើសកម្មភាពចាប់បង្ខំនាំទៅរំលោ.ភ កូនស្រីវ័យទើប១៤ឆ្នាំ នៅខាងក្រោយផ្ទះរបស់ខ្លួនរហូតបានសម្រេច ។
លោកស្រី វ៉ា សុខជា ក៏បានចោទប្រកាន់ លោក សុខ ប៊ុន្នី បន្តថា បានយកដីរបស់គាត់ដែលជាដីរបបរបស់រាជរដ្ឋាភិបាល បានបែងចែកឲ្យដល់គ្រួសារជនពិការតេជោភ្នំឆ័ត្រ៣១៧ ដោយក្នុង០១គ្រួសារទំហំ៧៥ម៉ែត្រគុណ២០០ម៉ែត្រ ។ ប៉ុន្តែឈ្មោះ សុខ ប៊ុន្នី នេះ បានកាត់យកដីរបបរបស់គាត់អស់២៥ម៉ែត្រគុណ២០០ម៉ែត្រ និងយកប័ណ្ណបើកប្រាក់បៀវត្សរ៍ (ATM) ប្តីរបស់គាត់ទុក រួមទាំងសៀវភៅគ្រួសាររបស់គាត់ក៏យកទុកដែរ។
បើតាមការឲ្យដឹងពីក្មេងស្រី អាយុ១៤ឆ្នាំ បានរៀបរាប់ថា នៅអំឡុងខែកុម្ភៈ ឆ្នាំ២០២១ វេលាម៉ោង១១ព្រឹក ខណៈពេលនាងកំពុងអង្គុយមើលទូរទស្សន៍នៅនឹងផ្ទះ ស្រាប់តែឈ្មោះ សុខ ប៊ុន្នី ជាអនុភូមិ បានឆាតតាម messenger ទៅរកនាងថាឱ្យទៅជួបគាត់យកលុយចាយ ។
ក្មេងស្រីរងគ្រោះបន្តថា លុះពេលនាងទៅជួបដើម្បីយកលុយនោះ ស្រាប់តែលោកអនុភូមិរូបនេះបានសួរនាងបន្ថែមថា «មានលុយចាយអត់» នាងក៏ឆ្លើយថា «អត់មានទេ» ។ បន្ទាប់មកលោកអនុភូមិរូបនេះ ក៏បាននិយាយទៀតថា «បើចង់បានលុយចាយ ហ៊ានប្រគល់ខ្លួនឲ្យគេអត់?» នាងក៏ឆ្លើយតបទៅលោកអនុភូមិវិញថា «អត់ទេ» ហើយនាងបំរុងរត់គេចខ្លួន តែត្រូវលោកអនុភូមិរូបនោះបានចាប់ដៃនាងជាប់ រួចក៏នាំនាងទៅរំលោ.ភនៅខាងក្រោយផ្ទះ រហូតបានសម្រេច ហើយបានថែមនិយាយថា មិនឲ្យនាងនិយាយប្រាប់ឪពុកម្តាយនាង ឬប្រាប់អ្នកឲ្យណាគេដឹងឡើយ បន្ទាប់មកក៏បានហុយលុយចំនួន៥០,០០០រៀលឱ្យទៅនាង ។
ក្មេងស្រីរងគ្រោះបញ្ជាក់ទៀតថា ដោយភ័យខ្លាចលោកអនុភូមិគំរាម ក៏មិនហ៊ានប្រាប់ម្តាយអំពីករណីនេះ ហើយរឿងនេះក៏បានស្ងប់ស្ងាត់ជាច្រើនខែ ដោយគ្មានអ្នកណាបានដឹងឡើយ ទោះបីជាម្តាយនាងនៅនឹងផ្ទះជាមួយ ក៏នាងមិនដែលនិយាយប្រាប់នោះដែរ។
យ៉ាងណាមិញ បើតាមការឲ្យដឹងពីស្ត្រីជាម្តាយក្មេងស្រីរូបនេះ បាននិយាយរៀបរាប់បន្ថែមថា គាត់មិនដែលដឹងរឿងលោកអនុភូមិឈ្មោះ សុខ ប៊ុន្នី បានរំលោ.ភកូនស្រីគាត់នោះទេ ហើយរឿងដែលបែកធ្លាយនោះ គឺបានកើតឡើងនៅពេលដែលកូនស្រីរបស់គាត់មានគេចូលស្តីដណ្តឹងបំរុងនឹងរៀបចំសែនព្រេននៅថ្ងៃទី២៦ ខែកក្កដា ឆ្នាំ២០២១ កន្លងមកនោះ ក៏ស្រាប់តែលោកអនុភូមិឈ្មោះ សុខ ប៊ុន្នី នេះ បានទៅរារាំងមិនឲ្យមានការសែនព្រេន និងឲ្យកម្លាំងប្រជាការពារភូមិចំនួន២នាក់ទៅប្រាប់ក្រុមគ្រួសារក្មេងស្រីរងគ្រោះមិនឲ្យមានការសែនព្រេននោះឡើយ ព្រោះគេអះអាងថា ក្មេងស្រីរងគ្រោះមិនទាន់គ្រប់អាយុ ។
ម្តាយក្មេងស្រីរងគ្រោះបន្តថា ដោយមានការរារាំងពីសំណាក់លោកអនុភូមិនោះ ទើបកូនស្រីរបស់គាត់ទម្លាយរឿងដែលលោកអនុភូមិឈ្មោះសុខ ប៊ុន្នី រូបនេះ ធ្លាប់បានចាប់នាងរំលោ.ភនៅខាងក្រោយផ្ទះបានសម្រេច ហើយបានហុចលុយចំនួន៥០,០០០រៀល ដោយប្រាប់មិនឲ្យនាងនិយាយប្រាប់ម្តាយ ឬអ្នកជិតខាងឲ្យដឹងនោះឡើយ ហើយគាត់បានសន្យាថា នឹងយកនាងធ្វើជាប្រពន្ធ ថែមទាំងខ្លួនគាត់មានប្រពន្ធ និងកូនរួចទៅហើយនោះ ។
ស្ត្រីជាម្តាយក្មេងរងគ្រោះបានបញ្ជាក់ទៀតថា ក្រោយពីកូនស្រីគាត់ទម្លាយរឿងនោះមក ខាងប្រុសគេដកពាក្យស្តីដណ្តឹងវិញ ។ ម្យ៉ាងវិញទៀត លោកអនុភូមិរូបនេះ មិនត្រឹមតែបំផ្លាញកិត្តិយស កេរ្តិ៍ឈ្មោះ ក្រុមគ្រួសាររបស់គាត់ទេ ថែមទាំងបានកាត់យកដីរបបដែលរាជរដ្ឋាភិបាលបានបែងចែកដល់គ្រួសារជនពិការ ដែលក្នុង០១គ្រួសារទំហំ៧៥ម៉ែត្រគុណ២០០ម៉ែត្រនោះ ដោយឈ្មោះសុខ ប៊ុន្នី បានកាត់យកអស់ទំហំ២៥ម៉ែត្រគុណ២០០ម៉ែត្រ ហើយសព្វថ្ងៃនេះ គាត់នៅសល់ដីតែ៥០ម៉ែត្រគុណ២០០ម៉ែត្រតែប៉ុណ្ណោះ ហើយលោកអនុភូមិរូបនេះក៏បានយកប័ណ្ណបើកប្រាក់ខែជនពិការ (ATM) របស់ប្តីគាត់ទុក និងសៀវភៅគ្រួសាររបស់គាត់ក៏យកទុកដែរ។
ក្នុងនាមម្តាយ លោកស្រីវ៉ា សុខជា និងប្តីឈ្មោះ អៀម អ៊ុន បានសំណូមពរ និងស្នើសុំដល់អាជ្ញាធរគ្រប់លំដាប់ថ្នាក់ និងសមត្ថកិច្ចជួយរកយុត្តិធម៌ដល់ក្រុមគ្រួសាររបស់គាត់ផង ដោយលោកស្រីបានដាក់ពាក្យប្តឹងទាមទារឱ្យ ឈ្មោះ សុខ ប៊ុន្នី សងជំងឺចិត្តលើករណីរំលោ.ភកូនស្រីគាត់ចំនួន ៦០,០០០ដុល្លារ និងសុំឲ្យសមត្ថកិច្ចចាត់ការអនុភូមិ រូបនេះ តាមនីតិវិធីច្បាប់ និងមួយវិញទៀតសុំឲ្យឈ្មោះ សុខ ប៊ុន្នី ប្រគល់ប័ណ្ណ (ATM) បើកប្រាក់ខែប្តីរបស់គាត់ និងសៀវភៅគ្រួសារមកឲ្យគាត់វិញផង ។
ទាក់ទិននឹងករណីលោកអនុភូមិឈ្មោះសុខ ប៊ុន្នី រូបនេះ បើតាមការឲ្យដឹងពីលោកស្រីឧត្តមសេនីយ៍ត្រី ឌី សុជាតិ ស្នងការរងទទួលផែនការងារប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តបន្ទាយមានជ័យ បានបញ្ជាក់ឲ្យដឹងនៅថ្ងៃទី៣១ ខែសីហា ឆ្នាំ២០២១ នេះថា ចំពោះសំណុំរឿងលោកអនុភូមិរំលោ.ភក្មេងស្រីជាអនីតិជននៅភូមិតេជោភ្នំឆ័ត្រនោះ នគរបាលជំនាញកំពុងបើកការស៊ើបអង្កេតស្រាវជ្រាវ និងប្រមូលសំណុំរឿងបន្តតាមនីតិវិធីហើយ ។
ទាក់ទិននឹងការចោទប្រកាន់ថាលោកអនុភូមិរំលោ.ភក្មេងស្រីរងគ្រោះនោះ បើយោងតាមការបំភ្លឺរបស់ជនដែលត្រូវគេចោទ បានរៀបរាប់ថា គាត់មិនបានប្រព្រឹត្តនូវអ្វីដូចជាម្តាយ និងក្មេងស្រីបានចោទនោះឡើយ ។
លោកអនុភូមិឈ្មោះសុខ ប៊ុន្នី បានថ្លែងប្រាប់សារព័ត៌មានកោះសន្តិភាពជុំវិញការចោទប្រកាន់នេះថា នៅមុនថ្ងៃសែននោះ ខាងនាយករងមណ្ឌលជនពិការ៣១៧តេជោភ្នំឆ័ត្រ មិនអនុញ្ញាតិឲ្យធ្វើការសែន នោះទេ ដោយកម្លាំងប្រជាការពារ០២នាក់ទៅប្រាប់ម្តាយខាងស្រី ព្រោះ ទី១- ក្មេងស្រីរូបនោះ មិនទាន់គ្រប់អាយុ ទើបតែ១៤ឆ្នាំ, ទី២- មិនតម្រូវឲ្យមានការជួបជុំ ដើម្បីទប់ស្កាត់ឆ្លងរាលជំងឺកូវីដ១៩ ។ តែបែរជាម្តាយនិងក្មេងស្រីនោះមិនបានសែន មកប្តឹងចោទប្រកាន់ថា គាត់បានរំលោ.ភនាង និងកូនស្រីរបស់គាត់ទៅវិញ ។
ចំពោះការចោទប្រកាន់រឿងដកប័ណ្ណបើកប្រាក់ពីបុរសពិការ ឈ្មោះ វ៉ា សុខជា គឺលោកអនុភូមិបានបកស្រាយថា កាតបើកប្រាក់ខែនៅគាត់ពិតមែន តែបុរសពិការនោះបានប្រគល់ឱ្យគាត់ទុកទៅបើកលុយបង់សងអង្គការ ព្រោះគាត់បានខ្ចីលុយអង្គការចំនួន៣ពាន់ដុល្លារអាមេរិក ។
យ៉ាងណាមិញ រឿងរ៉ាវចោទប្រកាន់ខាងលើនេះ កំពុងស្ថិតនៅក្នុងដៃរបស់សមត្ថកិច្ច ។ នេះបើតាមការបញ្ជាក់របស់លោកស្រីឧត្តមសេនីយ៍ត្រី ឌី សុជាតិ ស្នងការរងទទួលផែនការងារប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្ត ។
លោកស្រីឧត្តមសេនីយ៍ត្រី ឌី សុជាតិ បានបញ្ជាក់ឲ្យដឹងនៅថ្ងៃទី៣១ ខែសីហា ឆ្នាំ២០២១នេះថា ករណីក្មេងស្រី និងម្តាយបានប្តឹងលោកអនុភូមិលើករណីរំលោ.ភនោះ ខាងក្មេងស្រីបានដាក់ពាក្យបណ្តឹងនៅអធិការដ្ឋាននគរបាលស្រុកស្វាយចេក នៅថ្ងៃទី១៩ ខែកក្កដា ឆ្នាំ២០២១ ហើយអធិការដ្ឋាន នគរបាលស្រុកស្វាយចេក បានបញ្ជូនសំណុះរឿងបកការិយាល័យជំនាញ ។ ដូច្នេះចំពោះសំណុំរឿងនេះ នគរបាលជំនាញកំពុងបើកការស៊ើបអង្កេតស្រាវជ្រាវ និងប្រមូលសំណុំរឿងបន្តតាមនីតិវិធី ៕
ចែករំលែកព័តមាននេះ