រាជធានីភ្នំពេញ ៖ ធី.អូ គ្រុប ជាក្រុមហ៊ុនផ្គត់ផ្គង់សេវាកម្មដំណោះស្រាយព័ត៌មានវិទ្យា និងបង្កើត Business Softwear បានប្រារព្ធពិធីជប់លៀងប្រចាំឆ្នាំ ដើម្បីអបអរសាទរឆ្នាំទី១១ នៃវត្តមានរបស់ខ្លួននៅលើទីផ្សារបច្ចេកវិទ្យាព័ត៌មានវិទ្យា ក្នុងប្រទេសកម្ពុជា និងថ្លែងអំណរគុណ ក៏ដូចជាលើកទឹកចិត្តដល់បុគ្គលិក ដែលបានបម្រើការងារជូនក្រុមហ៊ុនកន្លងមក ។
ពិធីនេះ ធ្វើឡើងកាលពីល្ងាចថ្ងៃទី២៩ មករា នៅហាងកាហ្វេ Vann Molyvann´s House ដោយមានការចូលរួមជាកិត្តិយសពីលោក ហេង ចំរើន អគ្គនាយកក្រុមហ៊ុន ធី.អូ គ្រុប រួមនិងបុគ្គលិកក្រុមហ៊ុនជាច្រើនផ្សេងទៀត ។
លោក ហេង ចំរើន អគ្គនាយកក្រុមហ៊ុន ធី.អូ គ្រុប មានប្រសាសន៍ថា៖ «ការប្រារព្ធពិធីជប់លៀងឆ្នាំនេះ គឺឆ្នាំទី១១ ក្រុមហ៊ុនចាប់ផ្តើមបើកដំបូង មានបុគ្គលិកពី៤-៥នាក់ រហូតកើនមកដល់៧០ ទៅ៨០នាក់ នៅពេលសព្វថ្ងៃ ។ ហើយការរីកចម្រើននេះ វាជាមោទនភាពមួយ ក្នុងនាមជាកូនខ្មែរបើកក្រុមហ៊ុនផ្តល់ការងារជូនពលរដ្ឋខ្មែរ ទទួលប្រាក់ចំណូល ដើម្បីដោះស្រាយសម្រាប់ជីវភាពប្រចាំថ្ងៃក្រៅពីបង្កើនចំណេះ ជំនាញការងារនៅពេលបច្ចុប្បន្នរបស់ពួកគាត់ ។
លោកបន្តថា នៅពេលកន្លងមក យើងបានឆ្លងកាត់រួមគា្ននៅគ្រប់ពេលទាំងអស់មិនថា ពេលលំបាក ពេលសប្បាយ ពេលជោគជ័យ ឬពេលបរាជ័យខ្លះក្តីៗក៏ដោយ តែយើងនៅតែមានភាពរឹងមាំរហូតមកដល់សព្វថ្ងៃនេះ ។ យើងបង្កើតក្រុមហ៊ុននេះ ឡើងដើម្បីលក់នូវប្រព័ន្ធកំព្យូទ័រទៅឱ្យអតិថិជនផ្ទាល់ ។ អស់រយៈពេលច្រើនឆ្នាំមក យើងបានផ្លាស់ប្តូររូបភាពពីក្រុមហ៊ុនលក់ផ្ទាល់មកជាក្រុមហ៊ុនផ្តល់សេវាមានស្តង់ដាកម្រិតអន្តរជាតិវិញ នាពេលបច្ចុប្បន្ន។
នៅក្នុងឱកាសនេះផងដែរ លោកអគ្គនាយកក្រុមហ៊ុន ធី.អូ គ្រុប បានប្រគល់បណ្ណ័សសើរ និងពានរង្វាន់ជូនដល់បុគ្គលិក ដែលមានអតីតភាពការងាររយៈពេលលើសពីប្រាំឆ្នាំ ដើម្បីជាការឆ្លើយតបទៅនឹងភាពជោគជ័យ និងវឌ្ឍនភាពដែលកើតចេញពីកិច្ចខិតខំប្រឹងប្រែង ក្នុងស្មារតីសាមគ្គីភាពនាពេលកន្លងមកផងដែរ ។
ចែករំលែកព័តមាននេះ