ខេត្តពោធិ៍សាត់ ៖ កាលពីរសៀលថ្ងៃទី១៦ មីនា លោកនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានអញ្ជើញទៅសំណេះសំណាលសួរសុខទុក្ខ និងនាំយកអំណោយជូនដល់កងរាជអាវុធហត្ថ អង្គភាពកងពលតូចអន្តរាគមន៍លេខ១៤ កងការពារព្រំដែនគោកលេខ៥០១ វរសេនាតូចនគរបាលការពារព្រំដែនគោកលេខ៨២៥ វរសេនាតូចលេខ៥០៨ និងកងវិស្វកម្មទ័ពជើងគោក ដែលកំពុងឈរជើងការពារព្រំដែននៅឃុំថ្មដា ស្រុកវាលវែង ខេត្តពោធិ៍សាត់ ។ ក្នុងឱកាសនោះក៏មានការចូលរួមពីលោកស្រី ជុក សុផានី អភិបាលរងខេត្ត លោកឧកញ៉ា ទុយ គី ប្រធានសភាពាណិជ្ជកម្មខេត្ត មេបញ្ជាការកងរាជអាវុធហត្ថរាជធានីភ្នំពេញ ខេត្តកណ្តាល កំពង់ឆ្នាំង ប៉ៃលិន និងខេត្តបន្ទាយមានជ័យផងដែរ ។
ក្នុងឱកាសនោះលោកនាយឧត្តមសេនីយ៍ សៅ សុខា បានសម្តែងទឹកចិត្តរីករាយ និងកោតសរសើរ និងបានពាំនាំនូវការផ្តាំផ្ញើសួរសុខទុក្ខពីសំណាក់សម្តេចអគ្គមហាទាំង៣ជូនចំពោះកងរាជអាវុធហត្ថ នគរបាលជាតិ ពិសេសកងទ័ពអន្តរាគមន៍ និងកងកម្លាំងជួរមុខដែលកំពុងត្រៀម និងឈរជើងការពារខ្សែបន្ទាត់ព្រំដែននៅឃុំថ្មដា នេះ ។ ពួកសៀមមួយចំនួនធំជាពួកវង្វេងប្រវត្តិសាស្ត្រ គូរផែនទីឯកតោភាគីបង្រៀនកូនចៅរបស់គេជំនាន់ក្រោយឱ្យវង្វេងតាម បញ្ជូនកងទ័ពឱ្យចូលមកឈ្លានពានទឹកដីកម្ពុជា និងនៅតែមានមហិច្ឆតាចង់បានប្រាសាទព្រះវិហារ ដែលជាកេរមរតករបស់បុព្វបុរសយើងដោយឥតអៀនខ្មាសដដែល ទោះបីជាដឹងថា ប្រាសាទព្រះវិហារបានក្លាយជាសម្បត្តិបេតិកភណ្ឌពិភពលោកក៏ដោយ ។ ប្រទេសកម្ពុជាក្រោមការដឹកនាំរបស់សម្តេចតេជោ ហ៊ុន សែន ជានាយករដ្ឋមន្ត្រី បានខិតខំព្យាយាមចរចាតាមការទូត តាមផ្លូវច្បាប់ជាច្រើនលើកច្រើនសាមកហើយ ប៉ុន្តែពួកសៀមនៅតែប្រើរូបភាពចាប់ដៃ ជើងជាន់ដដែល រហូតប្រើកម្លាំងយោធាបង្កឱ្យមានសង្គ្រាម និងភាពតានតឹងដល់សព្វថ្ងៃ ប្រៀបដូចជាចង់ក្តិចបណ្តូល ខណៈពេលឃើញប្រទេសកម្ពុជាយើងកំពុងមានការអភិវឌ្ឍបោះជំហានទៅមុខជាលំដាប់។
លោកនាយឧត្តមសេនីយ៍បានជំរាបជូនថា ដោយមានការគិតគូរពីសុខទុក្ខជីវភាពរស់នៅ ពិសេសជិតដល់បុណ្យចូលឆ្នាំខ្មែរផងនោះ លោកបានស្វែងរកអំណោយពីសប្បុរសជនដើម្បីយកមកជួយឧបត្ថម្ភដល់កងរាជអាវុធហត្ថ ។ ទោះបីទិសព្រះវិហារជាទិសសំខាន់ ប៉ុន្តែយើងមិនដែលចោលទិសផ្សេងៗនោះទេ ហើយបើផ្តល់ជូនតែខ្សែបណ្តោយកងរាជអាវុធហត្ថ មិនផ្តល់ជូនកងទ័ព និងនគរបាលក៏មិនកើតដែរ ព្រោះសុទ្ធតែជាកងកម្លាំងការពារបូរណភាពទឹកដីដូចគ្នា ដែលនេះជាមនោសញ្ចេតនារបស់ខ្មែរយើងដែលមានតាំងពីដើមរៀងមក។ លោកបានផ្តាំផ្ញើសូមឱ្យកងរាជអាវុធហត្ថធ្វើអ្វីៗតាមតួនាទី ភារកិច្ច និងផ្អែកលើច្បាប់ជាគោល ចេះទទួលខុសត្រូវ មានសាមគ្គី និងទំនាក់ទំនងល្អ ធ្វើយ៉ាងណាឱ្យអាជ្ញាធរ ស្ថាប័នផ្សេង និងប្រជាជនគោរពស្រឡាញ់ ។
អំណោយដែលលោកនាយឧត្តមសេនីយ៍ សៅ សុខា យកទៅប្រគល់ជូនដល់កងកម្លាំងនាពេលនោះរួមមាន មីយើងចំនួន១.០២០កេស ត្រីងៀតកញ្ចុះ៥០០គីឡូក្រាម ត្រីឆ្អើរ៩០០ចង្កាក់ ត្រីខកំប៉ុង៥០កេស ទឹកស៊ីអ៊ីវ៤២០យួរ និងថវិកា៦៧.០០០.០០០រៀល ដោយបានធ្វើការបែងចែកដល់អង្គភាពទាំង៦ខាងលើ តិចច្រើនទៅតាមចំនួនទ័ពរបស់អង្គភាពនីមួយៗ ៕
ចែករំលែកព័តមាននេះ