រាជធានីភ្នំពេញ ៖ ក្រុមហ៊ុន អេស ស៊ី ជី ដែលជាក្រុមហ៊ុនអន្តរជាតិដ៏ធំមួយក្នុងតំបន់អាស៊ានបានបញ្ចេញរបាយការណ៍លទ្ធផលប្រតិបត្តិការរបស់ខ្លួនសម្រាប់កាលបរិច្ឆេទឆ្នាំ២០១៥ កន្លងទៅ តាមរយៈសេចក្តីប្រកាសព័ត៌មានមួយ
រាជធានីភ្នំពេញ ៖ ក្រុមហ៊ុន អេស ស៊ី ជី ដែលជាក្រុមហ៊ុនអន្តរជាតិដ៏ធំមួយក្នុងតំបន់អាស៊ានបានបញ្ចេញរបាយការណ៍លទ្ធផលប្រតិបត្តិការរបស់ខ្លួនសម្រាប់កាលបរិច្ឆេទឆ្នាំ២០១៥ កន្លងទៅ តាមរយៈសេចក្តីប្រកាសព័ត៌មានមួយដែលបានផ្សព្វផ្សាយកាលពីថ្ងៃព្រហស្បតិ៍នេះ ។ យោងតាមសេចក្តីប្រកាសព័ត៌មាននោះ ក្នុងឆ្នាំ២០១៥ ក្រុមហ៊ុន អេស ស៊ី ជី រកប្រាក់ចំណេញបានច្រើនជាងឆ្នាំ២០១៤ រហូតដល់៣៥% ដោយសារការរីកចំរើននៃអាជីវកម្មផ្សេងៗរបស់ខ្លួន ។ ក្រុមហ៊ុនបានលើកឡើងថា នឹងបន្តផ្តោតលើការអភិវឌ្ឍផលិតផលថ្មីៗប្រកបដោយភាពច្នៃប្រឌិត និងនិរន្តរភាព ដើម្បីផ្គត់ផ្គង់តម្រូវការរបស់អតិថិជនក្នុងតំបន់អាស៊ាន ។
នៅក្នុងសេចក្តីប្រកាសព័ត៌មានដដែល លោក Roongrote Rangsiyopash ប្រធាន និងអគ្គនាយកក្រុមហ៊ុន អេស ស៊ី ជី បាននិយាយថា សម្រាប់ឆ្នាំ២០១៥ ទាំងមូល សរុបចំណូលពីការលក់នៅទូទាំងពិភពលោក គឺមានចំនួន៥១.៧១៩ពាន់លានរៀល (ឬ១២.៨៣៥លានដុល្លារអាមេរិក) ដែលជាការថយចុះ១០% ពីឆ្នាំមុន ដោយសារតម្លៃប្រេងធ្លាក់ចុះ ។ ប៉ុន្តែប្រាក់ចំណេញសរុបក្នុងឆ្នាំ២០១៥ បានកើនឡើងទៅដល់៥.៣៤១ពាន់លានរៀល (ឬ១.៣២៥លានដុល្លារអាមេរិក) ដែលជាការកើនឡើងរហូតដល់៣៥% ធៀបនឹងឆ្នាំ២០១៤ ។
លោក Roongrote Rangsiyopash បានបន្ថែមទៀតថា «យើងកំពុងបន្តធ្វើការវិនិយោគនៅក្នុងតំបន់អាស៊ាន ដូចការគ្រោងទុក ដើម្បីបំពេញតាមតម្រូវការរបស់អតិថិជនក្នុងតំបន់ ។ រោងចក្រស៊ីម៉ង់ត៍នៅក្នុងប្រទេសឥណ្ឌូនេស៊ី បានចាប់ផ្តើមដំណើរការហើយ កាលពីខែវិច្ឆិកា ឆ្នាំ២០១៥ កន្លងទៅ ខណៈរោងចក្រស៊ីម៉ង់ត៍ ដែលកំពុងសាងសង់ក្នុងប្រទេសមីយ៉ាន់ម៉ា និងប្រទេសឡាវ គ្រោងនឹងចាប់ផ្តើមដំណើរការក្នុងឆ្នាំ២០១៦ និង២០១៧ រៀងគ្នា ។ ការវិនិយោគថ្មីៗទាំងនេះ គឺដើម្បីគាំទ្រការពង្រីកទីផ្សាររបស់យើងក្នុងតំបន់អាស៊ាន និងបំពេញតាមតម្រូវការកើនឡើងរបស់អតិថិជន ។ យើងជឿជាក់ថា តំបន់អាស៊ាននឹងរីកលូតលាស់យ៉ាងឆាប់រហ័ស ហើយទីផ្សារនៅក្នុងប្រទេសកម្ពុជា ឡាវ មីយ៉ាន់ម៉ា និងវៀតណាម នឹងរីកចំរើនឡើងដោយសារសហគមន៍សេដ្ឋកិច្ចអាស៊ាន» ។
យោងតាមសេចក្តីប្រកាសព័ត៌មានដដែល គិតត្រឹមថ្ងៃទី៣១ ធ្នូ ២០១៥ ទ្រព្យសកម្មសរុបរបស់ក្រុមហ៊ុន អេស ស៊ី ជី នៅទូទាំងពិភពលោក គឺស្មើនឹងទឹកប្រាក់៥៦.៦៦៥ពាន់លានរៀល (ឬ១៤.១៣៦លានដុល្លារអាមេរិក) ខណៈដែលទ្រព្យសកម្មសរុបរបស់ក្រុមហ៊ុន អេស ស៊ី ជី នៅក្នុងតំបន់អាស៊ាន (លើកលែងប្រទេសថៃ) មានចំនួន១២.០២០ពាន់លានរៀល (ឬ២.៩៩៩លានដុល្លារអាមេរិក) ស្មើនឹង២១% នៃទ្រព្យសកម្មប្រមូលផ្តុំសរុប ។
ដោយឡែកនៅក្នុងប្រទេសកម្ពុជាវិញ គិតត្រឹមចុងត្រីមាសទី៤ ឆ្នាំ២០១៥ ក្រុមហ៊ុន អេស ស៊ី ជី មានទ្រព្យសកម្មសរុបស្មើនឹង១.២៣០ពាន់លានរៀល (ឬ៣០៧លានដុល្លារអាមេរិក) ដែលជាការកើនឡើង១៩% ធៀបនឹងឆ្នាំមុន ហើយចំណូលពីការលក់សរុបនៅកម្ពុជា សម្រាប់ឆ្នាំ២០១៥ទាំងមូល គឺស្មើនឹងចំនួនទឹកប្រាក់ ៥៨៦ពាន់លានរៀល (ឬ១៤៥លានដុល្លារអាមេរិក) ដែលជាការកើនឡើង១៧% ធៀបនឹងឆ្នាំមុន ដែលបណ្តាលជាចម្បងមកពីការរីកចំរើននៃអាជីវកម្មស៊ីម៉ងត៍ បេតុងលាយស្រេច និងសេវាភ័ស្តុភារ ។
គួរកត់សម្គាល់ផងដែរថា កាលពីពេលថ្មីៗនេះ ក្រុមហ៊ុន SCG Concrete Roof (Cambodia) ដែលជាក្រុមហ៊ុនបុត្រសម្ព័ន្ធមួយរបស់ អេស ស៊ី ជី បានក្លាយជាក្រុមហ៊ុនផលិតក្បឿងបេតុងដំបូងគេនៅកម្ពុជា ដែលទទួលបានវិញ្ញាបនបត្រទទួលស្គាល់គុណភាពអន្តរជាតិ ISO 9001:2008 ។
បន្ថែមពីនេះទៀត កាលពីថ្ងៃទី១៦ មករា កន្លងទៅ ក្រុមហ៊ុនបានផ្តួចផ្តើមឲ្យមានការប្រកួតបាល់ទាត់ជាលក្ខណៈមិត្តភាពរវាងក្រុមជើងខ្លាំងមួយរបស់ថៃ គឺ SCG Muangthong United និងក្រុម K-Cement Cambodian All Stars ដែលជាក្រុមប្រមូលផ្តុំកំពូលតារាបាល់ទាត់ល្បីៗក្នុងលីកកម្ពុជា ។ ការប្រកួតនេះ គឺជាផ្នែកមួយនៃព្រឹត្តិការណ៍បាល់ទាត់អាស៊ាន ដែលផ្តួចផ្តើមដោយក្រុមហ៊ុន អេស ស៊ី ជី ហៅថា SCG Muangthong United ASEAN Tour ឆ្នាំ២០១៦ ដែលសំដៅរឹតបន្តឹងចំណងមិត្តភាពរវាងប្រទេសថៃ និងកម្ពុជា ក៏ដូចជាអបអរសាទរខួប៦៥ឆ្នាំ នៃទំនាក់ទំនងការទូតកម្ពុជា-ថៃ ។
គួរបញ្ជាក់ផងដែរថា ទឹកប្រាក់ចំនួន៥ម៉ឺនដុល្លារ ដែលប្រមូលបានពីការលក់សំបុត្រចូលទស្សនាការប្រកួត ការលក់វត្ថុអនុស្សាវរីយ៍ និងប្រាក់បរិច្ចាគបន្ថែមពីក្រុមហ៊ុនផ្ទាល់ និងប្រគល់ទៅដល់មន្ទីរពេទ្យគន្ធបុប្ផា នាពេលឆាប់ៗខាងមុខនេះ ដើម្បីហេតុផលមនុស្សធម៌ ។
ចែករំលែកព័តមាននេះ