ក្លារិនស៍ (Clarins) ផលិតផលថែសម្រស់ម៉ាកល្បីលំដាប់ពិភពលោកបានបើកសម្ភោធហាងថែរក្សាសម្រស់មួយរបស់ខ្លួននៅក្នុងប្រទេសកម្ពុជា ដោយមានការអញ្ជើញចូលរួមអំពីសំណាក់លោកឧកញ៉ា សំអាង ប្រធានក្រុមប្រឹក្សាភិបាលនៃក្រុមហ៊ុនវឌ្ឍនៈគ្រុប លោកជំទាវ ឈុន លាង បណ្ណាធិការនៃក្រុមហ៊ុនវឌ្ឍនៈគ្រុប កញ្ញា សំអាង លក្ខិណា នាយកអភិវឌ្ឍអាជីវកម្មនៃក្រុមហ៊ុនវឌ្ឍនៈអ៊ីនវេសមែន លីមីធីត និងលោក Cristain Coutin –Clarins បណ្ណាធិការ និងប្រធានក្រុមប្រឹក្សាភិបាលរបស់ក្រុមហ៊ុនក្លារិនស៍ ព្រមទាំងមានការអញ្ជើញចូលរួមអំពីសំណាក់អស់លោក លោកស្រី ជាភ្ញៀវកិត្តិយសចូលរួមយ៉ាងច្រើនកុះករផងដែរ។ ពិធីសម្ភោធហាងថែរក្សាសម្រស់នេះដែរ បានធ្វើឡើងកាលពីរសៀលថ្ងៃទី២២ មករា ២០១៦ មានទីតាំងក្នុងផ្សារទំនើបវឌ្ឍនៈកាពីតាល ដែលជាផ្សារដ៏ប្រណីតមួយក្នុងព្រះរាជាណាចក្រកម្ពុជា
កញ្ញា សំអាង លក្ខិណា នាយកអភិវឌ្ឍអាជីវកម្មនៃក្រុមហ៊ុនវឌ្ឍនៈអ៊ីនវេសមែន លីមីតធីត បានថ្លែងថា លក្ខណៈពិសេសរបស់ហាងថែរក្សាសម្រស់ក្លារិនស៍ (Clarins) គឺមាននូវផលិតផលថែរក្សាស្បែកកំរិតខ្ពស់ផ្សំឡើងពីរុក្ខជាតិ និងមានគុណភាពខ្ពស់ យើងមានផលិតផលថែរក្សាស្បែកជាច្រើនដែលស័ក្តិសមទៅគ្រប់ប្រភេទស្បែករបស់អតិថិជន និងមានការទទួលខុសត្រូវខ្ពស់ចំពោះបរិស្ថានផងដែរ ហើយបង្កើតឡើងក្នុងគោលបំណងជួយបង្កើនសម្រស់របស់អ្នកប្រើប្រាស់ឱ្យកាន់តែស្រស់ស្អាតតាមបែបធម្មជាតិ។
ក្នុងឆ្នាំ១៩៥៤ Jacques Courtin-Clarins បានសម្រេចចិត្តផ្តោតសំខាន់ទៅលើផ្នែកសម្រស់ ដោយអនុវត្តនូវទស្សនៈមួយប្លែកពីគេ គឺបង្កើតនូវការសន្ទនាជាមួយនឹងស្ត្រី ដើម្បីបំពេញសេចក្តីត្រូវការរបស់ពួកគាត់ទៅលើសុខុមាលភាព និងគោរពគាត់ដោយផ្តល់ឱ្យពួកគាត់នូវផលិតផលថែរក្សាស្បែកល្បីៗ ដែលផលិតឡើងពីរុក្ខជាតិមានការច្នៃប្រឌិត និងប្រសិទ្ធភាពខ្ពស់។ កញ្ញាបានបន្តទៀតថា ដោយផ្អែកទៅលើគុណតម្លៃនៃការទទួលការខុសត្រូវលើបរិស្ថាន ក្លារិនស៍ (Clarins) ផលិតនូវផលិតផលសម្រស់ ដោយរុក្ខជាតិជាធាតុផ្សំជាចម្បង ហើយយើងក៏មានការថ្លែងអំណរគុណយ៉ាងជ្រាលជ្រៅចំពោះការងារមន្ទីរពិសោធន៍គ្រឿងសំអាងរបស់យើងដែលធ្វើឱ្យអ្នកជំនាញរបស់ក្លារិនស៍ (Clarins) បានឆ្លងកាត់ក្នុងវិស័យជាច្រើន។ បទពិសោធន៍របស់ម៉ាកនេះ ត្រូវបានឆ្លុះបញ្ចាំងនៅក្នុងហាងថែរក្សាសម្រស់ក្លារិនស៍ ស្គីន ស្ប៉ា (Clarins Skin Spa) ដែលយើងផ្តល់ជូននូវការព្យាបាលជាច្រើនសម្រាប់ដងខ្លួន និងការថែរក្សាមុខ។ វាត្រូវបានគេបង្កប់នៅក្នុងគុណតម្លៃរបស់ក្លារិនស៍ (Clarins) ដោយសារតែក្លារិនស៍ (Clarins) ជាកន្លែងមួយដែលអតិថិជនរបស់យើងមិនធ្លាប់មានអារម្មណ៍នៅតែម្នាក់ឯងឡើយ។ ការស្តាប់អតិថិជន និងការព្រួយបារម្ភរបស់ពួកគេទៅលើបញ្ហាសម្រស់តែងតែជាករណីអាទិភាពរបស់ពួកយើង ព្រោះវាបង្កើតឱ្យមានការពិភាក្សា និងអារម្មណ៍នៃការគោរពចំពោះអតិថិជន នេះជាមូលហេតុមួយដែលធ្វើឱ្យក្លារិនស៍ (Clarins) នៅតែជាម៉ាកផលិតផលថែរក្សាស្បែកដែលល្អប្រណីតលេខមួយនៅក្នុងទ្វីបអឺរ៉ុប។
កម្មវិធី Cocktail នារាត្រីដ៏ល្អប្រណីតនេះ ត្រូវបានរៀបចំឡើងដោយរចនាទៅដោយពណ៌ក្រហម និង.ស ដែលឆ្លុះបញ្ចាំងនូវទស្សនៈរបស់ម៉ាកមួយនេះ ទៅលើសម្រស់ដែលមានភាពងាយស្រួល និងបរិសុទ្ធ ដោយមានរួមផ្សំនឹងភាពទាន់សម័យ និងទំនើប។ ពិធីសម្ភោធជាផ្លូវជាផ្លូវការនេះដែរ ត្រូវបានរៀបចំឡើងដោយមានវត្តមានរបស់លោក Cristain Courtin-Clarins ប្រធានក្រុមប្រឹក្សាភិបាលរបស់ក្លារិនស៍ (Clarins) ។ ដោយមានការអញ្ជើញចូលរួមពីសំណាក់សមាជិកនៃសង្គមជាន់ខ្ពស់របស់កម្ពុជា ឯកអគ្គរដ្ឋទូត អ្នកសារព័ត៌មាន និងអ្នកតំណាងរបស់ក្លារិនស៍ (Clarins) ។ ភ្ញៀវកិត្តិយសទាំងអស់ត្រូវបានទទួលការស្វាគមន៍ដោយជញ្ជាំងរុក្ខជាតិដ៏ធំ ដោយមានការបង្ហាញអំពីជីវប្រវត្តិរីកចំរើនរបស់ក្លារិនស៍ (Clarins) ព្រមទាំងមានការសម្តែងពិសេសៗជាច្រើន ដើម្បីកម្សាន្តក្នុងរាត្រីនោះផងដែរ។
សព្វថ្ងៃនេះ ក្លារិនស៍ (Clarins) ទទួលបានកេរ្តិ៍ឈ្មោះ និងការគាំទ្រយ៉ាងខ្លាំងនៅទូទាំងពិភពលោក ដោយការពង្រីកនូវបណ្តាញអន្តរជាតិដែលក្រុមហ៊ុនបុត្រសម្ព័ន្ធចំនួន២០ ដើម្បីចែកចាយនៅក្នុង១៥០ប្រទេសទូទាំងពិភពលោក ដោយមានបុគ្គលិកសរុបចំនួន៦.១០០នាក់ ហាងលក់ផលិតផលចំនួន១៩.០០០កន្លែង និងទទួលបានការលក់សរុបប្រហែល១០០កោដិអឺរ៉ូ។
ចែករំលែកព័តមាននេះ