ខេត្តមណ្ឌលគិរី ៖ គណៈកម្មការចម្រុះថ្នាក់ជាតិ ដែលដឹកនាំដោយលោកឧត្តមសេនីយ៍ឯក វង្ស ពិសេន បានចុះត្រួតពិនិត្យក្រុមហ៊ុនមួយឈ្មោះក្រុមហ៊ុនយូនីហ្គ្រីន ដែលមានទីតាំងនៅស្រុកកោះញែក បានរកឃើញឈើមិនប្រក្រតីជាង១.០០០ម៉ែត្រគូប ក្នុងបរិវេណដីក្រុមហ៊ុន និងឈើគ្មានម្ចាស់ចំនួនជាង៧០កំណាត់ ដែលលាក់ទុកក្បែរស្នាក់ការក្រុមហ៊ុន ។
ខេត្តមណ្ឌលគិរី ៖ គណៈកម្មការចម្រុះថ្នាក់ជាតិ ដែលដឹកនាំដោយលោកឧត្តមសេនីយ៍ឯក វង្ស ពិសេន បានចុះត្រួតពិនិត្យក្រុមហ៊ុនមួយឈ្មោះក្រុមហ៊ុនយូនីហ្គ្រីន ដែលមានទីតាំងនៅស្រុកកោះញែក បានរកឃើញឈើមិនប្រក្រតីជាង១.០០០ម៉ែត្រគូប ក្នុងបរិវេណដីក្រុមហ៊ុន និងឈើគ្មានម្ចាស់ចំនួនជាង៧០កំណាត់ ដែលលាក់ទុកក្បែរស្នាក់ការក្រុមហ៊ុន ។
មន្ត្រីព្រៃឈើម្នាក់បានឱ្យដឹងថា គណៈកម្មការចម្រុះថ្នាក់ជាតិបានរកឃើញថា ឈើក្នុងក្រុមហ៊ុនដីសម្បទានសេដ្ឋកិច្ចយូនីហ្គ្រីន ស្ថិតនៅភូមិសាស្ត្រឃុំរយ៉ មានចំនួន៥០០ម៉ែត្រគូប បានវាយត្រាបង់ពន្ធចូលរដ្ឋរួចហើយ ។ ចំណែកឈើនៅក្នុងឃ្លាំងដែលមានទីតាំងនៅភូមិក្រោល ឃុំស្រែសង្គម មានចម្ងាយពីដីក្រុមហ៊ុនប្រមាណជាង៣០គីឡូម៉ែត្រ សម្រាប់ស្តុបឈើមានចំនួន២០០ម៉ែត្រគូប
(អារច្រៀករួច) ក៏បានបង់ពន្ធរួចរាល់ដែរ ។
មន្ត្រីព្រៃឈើដដែលបន្តថា ក្រៅពីឈើដែលមានច្បាប់ ក្រុមមន្ត្រីជំនាញបានបង្ក្រាបឈើប្រភេទសុក្រំចំនួន៧០កំណាត់ (អាចមានចំនួន២០ ទៅ៣០ម៉ែត្រគូប) ដែលក្រុមឈ្មួញដឹកយកទៅលាក់ទុកនៅក្រោយគុម្ពោតព្រៃក្បែរស្នាក់ការក្រុមហ៊ុន ដែលគេនិយាយថា ឧក្រិដ្ឋកម្មព្រៃឈើទំហំប៉ុនមេឃ ។
ប្រភពពីមន្ត្រីដែលបានចូលរួមក្នុងសកម្មភាពត្រួតពិនិត្យឈើក្រុមហ៊ុនយូនីហ្គ្រីនបាននិយាយថា ក្នុងដីក្រុមហ៊ុន ក្រៅពីឈើដែលមានច្បាប់ គេនៅឃើញមានឈើដែលមិនទាន់បង់ពន្ធចំនួន៥០០ម៉ែត្រគូបទៀត សុទ្ធសឹងប្រភេទឈើមូលធំៗ ដែលបានដាក់បន្លំជាមួយឈើមានច្បាប់ ។ ចំណែកប្រជាពលរដ្ឋបានឱ្យដឹងថា កន្លងមកឈើប្រណីតធ្នង់ បេង នាងនួង ត្រូវបានក្រុមឈ្មួញប្រមូលដឹកចេញពីព្រៃការពារក្នុងដែនបរិស្ថានរាប់ពាន់ម៉ែត្រគូប មកលក់ឱ្យឧកញ៉ា តុប ច័ន្ទវីយាដា ដែលទទួលសិទ្ធិប្រមូលឈើក្នុងក្រុមហ៊ុនយូនីហ្គ្រីនតែអាចថា «កន្ទេលធំបន្លំដេក» ក៏បានព្រោះឈើក្នុងដីក្រុមហ៊ុនស្ទើរលែងមានទៅហើយ(កាប់អស់) ។ ចំណែកឈើដែលគេគរទុកនោះ ភាគច្រើនជាឈើថ្មី ដែលទើបអារមិនទាន់ស្រក់ជ័រអស់ផង ។
ប្រភពបានខ្សឹបថា សព្វថ្ងៃនេះ លោកឧកញ៉ាវីយាដា បានឱ្យប្អូនប្រុស២នាក់ចេញមុខរត់ការខ្វែងដៃខ្វែងជើងគ្រប់ស្ថាប័ន សមត្ថកិច្ចក្នុងខេត្ត ដើម្បីជួយសម្រួលដល់ការរត់ពន្ធឈើខុសច្បាប់របស់ខ្លួន ។ ហើយច្បាប់ដែលប្អូនប្រុសរបស់លោកឧកញ៉ាវីយាដា ឈ្មោះផាន់ណា តែងអួតប្រាប់អ្នកយកព័ត៌មានថា មានសិទ្ធិក្នុងការនាំឈើចេញ និងឈើដែលមានក្នុងក្រុមហ៊ុនសុទ្ធតែមានច្បាប់នោះគឺគ្រាន់តែជារបាំងមុខមួយសម្រាប់ការពារមុខរបរទុច្ចរឹករបស់ខ្លួនប៉ុណ្ណោះ ។ ព្រោះមុនពេលមានយុទ្ធនាការចុះបង្ក្រាបរបស់គណៈកម្មការចម្រុះថ្នាក់ជាតិ គេឃើញទាំងឧកញ៉ាវីយាដា និងមេការទាំង២របស់ខ្លួន ដែលមានឈ្មោះផាន់ណា និងឈ្មោះម៉ៅ បានព្យាយាមរត់ការសុំសមត្ថកិច្ចជំនាញ ដើម្បីដឹកឈើដែលទិញពីក្រៅដែនដីក្រុមហ៊ុនទៅលក់នៅឯខេត្តត្បួងឃ្មុំ ។
ប្រភពបន្តថា បើកុំតែមានបទបញ្ជារបស់ប្រមុខរាជរដ្ឋាភិបាលកម្ពុជាឱ្យទប់ស្តាត់ការរត់ពន្ធឈើខុសច្បាប់ ម្ល៉េះឈើដែលក្រុមមន្ត្រីជំនាញចូលទៅឃើញនោះ ត្រូវបានដឹកយកទៅលក់ស្រុកយួនបាត់អស់ទៅហើយ ។
យោងតាមប្រសាសន៍របស់នាយឧត្តមសេនីយ៍ សៅ សុខា បានថ្លែងនៅពេលកំពុងចុះប្រតិបត្តិការចាប់បង្ក្រាបឈើនៅខេត្តក្រចេះ ថាបើសិនជាឈើនៅក្នុងក្រុមហ៊ុនណាដែលបានអះអាងថា មានច្បាប់ ឬបង់ពន្ធរួច សូមឱ្យនាំមន្ត្រីជំនាញរដ្ឋបាលព្រៃឈើ ទៅត្រួតពិនិត្យជាក់ស្តែងថា គល់ឈើទាំងនោះ ពិតជាមានលើដីក្រុមហ៊ុនវីនិយោគមែនឬអត់ ឬឈើទាំងនោះចេះដើរពីព្រៃមកខ្លួនឯង ។
យ៉ាងណាក៏ដោយ គេនៅមិនទាន់ដឹងពីចំណាត់ការរបស់មន្ត្រីជំនាញថា នឹងចាត់វិធានការបែបណា ចំពោះឈើចំនួន៥០០ម៉ែត្រគូប អត់មានបង់ពន្ធ ដែលមន្ត្រីជំនាញប្រទះឃើញក្នុងក្រុមហ៊ុនយូនីហ្គ្រីននោះ ។ ចំណែកមជ្ឈដ្ឋានអ្នកតាមដានបទល្មើសព្រៃឈើ បានលើកឡើងថា ថ្វីដ្បិតឈើដែលបង់ពន្ធចូលរដ្ឋរួចចំនួន៥០០ម៉ែត្រគូបក៏ដោយ ប្រសិនបើឈើនោះ ជាឈើដែលគេប្រមូលពីដែនក្រៅក្រុមហ៊ុន ក៏នៅតែខុសច្បាប់ ព្រោះក្រុមហ៊ុនមានសិទ្ធិកាប់ឈើ និងប្រមូលឈើបង់ពន្ធចូលរដ្ឋ តែឈើណាដែលមាននៅក្នុងដីសម្បទានក្រុមហ៊ុនប៉ុណ្ណោះ ។
ហើយការដែលយកឈើក្រៅដែនដីក្រុមហ៊ុនមកវាយត្រារបស់ក្រុមហ៊ុន ដើម្បីបន្លំជាឈើស្របច្បាប់នោះ គឺមិនអាចទៅរួចឡើយដ្បិតច្បាប់មិនអនុញ្ញាត ។ មិនតែប៉ុណ្ណោះ ការប្រើប្រាស់ច្បាប់ (PC) បែបកន្ទេលធំបន្លំដេកបែបនេះ គឺបានបង្កការប៉ះពាល់យ៉ាងធ្ងន់ធ្ងរចំពោះវិស័យព្រៃឈើនៅកម្ពុជា និងធ្វើឱ្យប្រជាជនដែលរស់នៅក្នុងតំបន់ទាំងនោះ ប្រឈមទៅនឹងហានិភ័យជាច្រើន ដោយសារតែបាត់បង់ព្រៃឈើ ដែលកំពុងទ្រទ្រង់ជីវភាពប្រចាំថ្ងៃរបស់ពួកគាត់ ។
ចាំមើលទៀត តើមេព្រៃមុខណា ដែលវ៉ៃត្រាឱ្យគេបង់ពន្ធឈើដ៏មហាសាលបែបនេះ ។ បានធ្វើមេព្រៃនៅខេត្តមណ្ឌលគិរី ដូចបានធ្វើនាយករដ្ឋមន្ត្រីព្រៃឈើដូច្នោះដែរ … ហេ!…ហេ! ។
មតិនានានិយាយថា ភាពមិនប្រក្រតីនៃវិស័យព្រៃឈើពេលនេះ ចាំមើលមុខមេព្រៃមួយណា ដែលស៊ីញ៉េច្បាប់ឱ្យដឹកជញ្ជូនឱ្យបង់ពន្ធ?
ចែករំលែកព័តមាននេះ