រាជធានីភ្នំពេញ ៖ លោកលឹម គានហោ រដ្ឋមន្ដ្រីក្រសួងធនធានទឹក និងឧតុនិយម និង ជាប្រធានអាជ្ញាធរទន្លេសាប បានគូសបញ្ជាក់ ថា រាល់អាងទឹកណាដែលកំពុងស្ថិតនៅក្នុង តំបន់៣ គឺត្រូវបំផ្លាញចោលទាំងស្រុង ដោយ គ្មានលើកលែង ឬអនុគ្រោះទេ ត្រូវយក ចេញឱ្យអស់ដើម្បីទុកឱ្យព្រៃលិចទឹកដុះឡើងវិញ ។ នៅពេលណាឃើញមានអាងទឹកនៅ ជាប់ៗគ្នា គឺត្រូវបើកមុខទឹក ដូច្នេះអាងទឹក២ ឬអាងទឹក៣ត្រូវយកចេញបំផ្លាញចោលទាំងស្រុងតែម្ដង ។
លោកលឹម គានហោ បានគូសបញ្ជាក់ បែបនេះប្រាប់អ្នកកាសែតជាតិ-អន្ដរជាតិក្នុង ឱកាសជួបសំភាសន៍ពាក់ព័ន្ធទៅនឹងអាងទឹកដែលមាននៅជុំវិញបឹងទន្លេសាប ទាំងតូច ទាំងធំចំនួន២៣អាង ដែលត្រូវបំផ្លាញចោល និងកែសំរួល ដើម្បីឱ្យព្រៃលិចទឹកដុះឡើង វិញ ។ លោកប្រធានអាជ្ញាធរទន្លេសាបបន្ដ ថា អាងទឹកមួយចំនួនទៀតគឺត្រូវទុកឱ្យនៅ ដោយមានវិធានការកែសំរួល ។ បច្ចុប្បន្ននេះ គេធ្វើទំនប់រាងបួនជ្រុងព័ទ្ធជុំវិញ ដូច្នេះវិធាន ការ គឺត្រូវកែសំរួល ដោយកាត់យកចេញ ប្រមាណ៦០% យកគ្រឿងចក្រកាយដីទំនប់ ដែលកាត់នោះមកដាក់នៅរណ្ដៅដែលគាត់បានកាយពីមុនមកលើកធ្វើជាទំនប់បំពេញ វិញ ដូច្នេះនៅសល់តែចំណុចក្រោម ដែលនៅ សល់ផ្ទៃដី៣០% ល្មមគ្រប់គ្រាន់ ដែលហៅថា អាងពន្លិចទឹក ។ ពេលណាទឹកឡើងលិច ហើយពេលណាទឹកស្រកទៅវិញ គឺតំកល់ទឹក ទុកក្នុងអាង ហេតុនេះទន្លេសាបអាចមាន ទឹកពេញវាលពេលទឹកឡើង លុះនៅពេលទឹក ស្រកប្រជាពលរដ្ឋ មានទឹកតំកល់នៅក្នុងអាង បានទឹកដើម្បីស្រោចស្រពស្រែជុំវិញ ។
លោកលឹម គានហោ បញ្ជាក់ថា នេះក៏ ជាប្រពៃណីយូរលង់មកហើយរបស់កម្ពុជា យើង មិនមែនយើងទើបនឹងចេះធ្វើបញ្ហានេះ ទេ ។ ដូចជានៅខេត្ដកំពង់ឆ្នាំង មានអាង ទឹកតូចៗរហូតដល់ទៅ៤០អាង ដែលពុំមាន បញ្ហាធ្ងន់ធ្ងរទេ ដោយប្រជាកសិករម្ចាស់ការ ធ្វើខ្លួនគាត់ ។ ដោយឡែក អាងទឹកដែលត្រូវ កែសំរួលនោះមានទំហំធំ គឺមាន១គីឡូម៉ែត្រ បួនជ្រុង ។ ក្នុងមួយគីឡូម៉ែត្របួនជ្រុងនេះ ត្រូវចំណាយថវិកាអស់៨ម៉ឺនទៅ១០ម៉ឺនដុល្លារសហរដ្ឋអាមេរិក ។ តើប្រជាកសិករ មានលទ្ធភាពកសាងអាងទឹកធំបែបនេះទេ ដែលចំណាយថវិកាច្រើនបែបនេះ?លោកប្រធានអាជ្ញាធរទន្លេសាបថ្លែងថា គ្មានលទ្ធភាពធ្វើបានទេ ដូច្នេះមានរឿងអ្វី មួយហើយដែលមិនប្រក្រតី ។ ការកែសំរួល អាងនេះ ចំពោះទំនប់អាងបានដាក់កំណត់ ហើយ មិនឱ្យមានកំពស់លើសពី២,៥០ម៉ែត្រ ទេ បើលើសពី២,៥០ម៉ែត្រ ត្រូវកាត់ចេញ ដើម្បីនៅពេលទឹកឡើង ទុកឱ្យទឹកពន្លិច ទីនោះតែម្ដង មិនឱ្យបាំងទឹកទេ ។ នេះហើយ ជាវិធានការបច្ចេកទេសក្នុងការដោះស្រាយ។
ទាក់ទិននឹងបញ្ហានេះ លោកលឹម គាន ហោ បញ្ជាក់ថា វិធានការ ឬអនុសាសន៍ ឬ បទបញ្ជាក្នុងការកំទេចអាងចោលនេះ គឺមិន មែនទើបតែថ្មីៗនេះទេ ។ សម្ដេចអគ្គមហា សេនាបតីតេជោ ហ៊ុន សែន បានសំរេចជា គោលការណ៍យូរមកហើយ គឺតាំងពីថ្ងៃទី២០ តុលា ឆ្នាំ២០០៩ មកម្ល៉េះ លើការបំផ្លាញ ចោលទាំងស្រុងនូវបណ្ដាអាងទឹកទាំងនេះ ។ កន្លងមកក្រសួងកសិកម្ម រុក្ខាប្រមាញ់ និងនេសាទ រួមនឹងរដ្ឋបាលជលផលបានកំទេច ចោលនូវអាងទឹក១៦រួចមកហើយ ក្នុង ជំហានទី១ ។ ឯការអនុវត្ដនេះ គឺទៅតាមការ សំរេចរបស់សម្ដេចតេជោនាយករដ្ឋមន្ដ្រី ក្នុងជំហានទី២ ។ អ្វីដែលអាជ្ញាធរទន្លេសាប ត្រូវការពេលវេលាបន្ដិចនោះ គឺអាជ្ញាធរត្រូវ ការស្វែងយល់ ត្រូវការពិចារណាគ្រប់ជ្រុង ជ្រោយទាំងអស់ ធ្វើយ៉ាងណា ឱ្យអាងទឹក នេះបំរើបានផលប្រយោជន៍ពីរ ទី១-ផល ប្រយោជន៍ក្នុងការងារបង្កបង្កើនផលដែល ដើរស្របតាមគោលនយោបាយរបស់រាជរដ្ឋាភិបាលក្នុងការផលិតស្រូវ និងទី២-ធ្វើយ៉ាង ណាឱ្យផលត្រីមានការកើនឡើង ។
ផ្ទុយទៅវិញ បើយើងបំផ្លាញចោលទាំង ស្រុងរាបដល់ដីតែម្ដង មិនមែនជាការល្អ ប្រសើរទេ គឺខាតទៅវិញ ថ្វីដ្បិតតែអាងទឹក របស់បុគ្គលណាក៏ដោយ អ្វីដែលមានហើយ ម្ដេចក៏យើងមិនធ្វើកែសំរួលយករបស់ទាំង នោះទៅប្រើប្រាស់ ។ នេះគឺជាគំនិតរបស់ អាជ្ញាធរ និងការសិក្សាស្រាវជ្រាវចេញវិធាន ការយ៉ាងដូច្នេះ ។ ការកំទេច ឬការកែសំរួលនេះអត់មាន កំណត់ទេ គឺកំណត់ទៅលើស្ថានភាពអាកាស ធាតុទៅវិញទេ យើងនៅតែបន្ដពេញមួយឆ្នាំ យើងបានប្ដេជ្ញារួចហើយ ។ យុទ្ធនាការនេះ កន្លងមកទើបតែអនុវត្ដបាន៣ទៅ៤ថ្ងៃទេ គឺបានកំទេច៦អាងហើយនៅក្នុងទឹកដីខេត្ដ កំពង់ធំ បើគិតជាទំនប់មានប្រវែងជាង១៥ គីឡូម៉ែត្រ បើគិតជាប្រឡាយដែលជីកយក ដីធ្វើទំនប់នោះគឺជាង១៣គីឡូម៉ែត្រ។ គ្រឿងចក្រដែលបាននិងកំពុងប្រតិបត្ដិការ
ងារនេះ មានប្រហែល១៥គ្រឿង ហើយនឹង បញ្ជូនជាបន្ដបន្ទាប់ទៀត ។
លោកលឹម គានហោ បានសំណូមពរឱ្យ ប្រព័ន្ធផ្សព្វផ្សាយទាំងអស់ បើក្ដាប់បានកន្លែង ណា ឬបញ្ហាណា ដែលមិនល្អសូមផ្ដល់ព័ត៌មាន យើងខ្ញុំស្វាគមន៍ទទួលយក យើងខ្ញុំនឹងចាត់ វិធានការ ។ ឥឡូវអាជ្ញាធរចាប់អនុវត្ដនៅ ខេត្ដកំពង់ធំ ហើយនិងឈានទៅអនុវត្ដការ ងារនេះបន្ដនៅ៦ខេត្ដ ដែលនៅជុំវិញបឹងទន្លេ សាប មាន ខេត្ដកំពង់ធំ ខេត្ដសៀមរាប ខេត្ដ បន្ទាយមានជ័យ ខេត្ដបាត់ដំបង ខេត្ដពោធិ៍ សាត់ និងខេត្ដកំពង់ឆ្នាំង ដែលមានផ្ទៃដីពាក់ ព័ន្ធនឹងទន្លេសាប ។ សូមបញ្ជាក់ផងដែរថា សភាពការណ៍នៃការបង្កើតអាងទឹកកើតមានយូរមកហើយ គឺតាំងពីឆ្នាំ២០០៥មកម្ល៉េះ ។ លើបញ្ហានេះ សំខាន់បណ្ដាអាងទឹកទាំងនេះ មានការពាក់ព័ន្ធនឹងព្រៃលិចទឹក៕
ចែករំលែកព័តមាននេះ