ខេត្តកំពង់ធំ ៖ មន្ត្រីជំនាញជលផលខេត្តសហការជាមួយអង្គភាពពាក់ព័ន្ធ បានចុះត្រួតពិនិត្យសកម្មភាពនេសាទស្របច្បាប់ និងនេសាទមិនស្របច្បាប់ដែលនាំឱ្យប៉ះពាល់ដល់វិស័យជលផល ដោយសំរេចរឹបអូសឧបករណ៍នេសាទខុសច្បាប់ និងគ្រឿងចក្រឈូសឆាយដីព្រៃលិចទឹកបានមួយចំនួនទៀតផង។ តាមរបាយការណ៍របស់សមត្ថកិច្ចជលផលខេត្តបានឱ្យដឹងថា គិតចាប់តាំងពីខែមករា ២០១០ រហូតដល់បច្ចុប្បន្ននេះ មន្ត្រីជលផលខេត្តសំរេច
ខេត្តកំពង់ធំ ៖ មន្ត្រីជំនាញជលផលខេត្តសហការជាមួយអង្គភាពពាក់ព័ន្ធ បានចុះត្រួតពិនិត្យសកម្មភាពនេសាទស្របច្បាប់ និងនេសាទមិនស្របច្បាប់ដែលនាំឱ្យប៉ះពាល់ដល់វិស័យជលផល ដោយសំរេចរឹបអូសឧបករណ៍នេសាទខុសច្បាប់ និងគ្រឿងចក្រឈូសឆាយដីព្រៃលិចទឹកបានមួយចំនួនទៀតផង។ តាមរបាយការណ៍របស់សមត្ថកិច្ចជលផលខេត្តបានឱ្យដឹងថា គិតចាប់តាំងពីខែមករា ២០១០ រហូតដល់បច្ចុប្បន្ននេះ មន្ត្រីជលផលខេត្តសំរេចចុះត្រួតពិនិត្យនិងស្រង់ស្ថិតិសកម្មភាពប្រមូលផលនេសាទស្របច្បាប់គ្រប់ប្រភេទក្នុងភូមិសាស្ត្រខេត្តបានចំនួនសរុប២៤.១៣៣,១៤ តោន ក្នុងនោះមាននេសាទឧស្សាហកម្មបាន៨.៥១៥,៣២តោន នេសាទសិប្បកម្មបាន២.១៧៤,៤១តោន នេសាទគ្រួសារក្នុងដែននេសាទបាន៦.៥៨២,៥១តោន និងនេសាទគ្រួសារតាមវាលស្រែបាន៦.៨៦០,៩០តោន។ ទន្ទឹមនេះ ចំពោះផលនេសាទកែច្នៃប្រជាពលរដ្ឋទូទាំងខេត្តសំរេចអនុវត្តបានសរុប៣.០០១,៥០តោន ក្នុងនោះត្រីងៀត ៥៥៧,៣០តោន ត្រីឆ្អើរ៣៣០,២០តោន ផ្អក៤៧៧,៩០តោន ម៉ាំ៤៦តោន ប្រហុក១.១៥៨,៩០តោន ត្រីប្រឡាក់៤២៧,៩០តោន កំពឹសក្រៀម៣,៣០តោន និងទឹកត្រី១៥៦.៦០០លីត្រ។
រីឯការប្រមូលថ្លៃឈ្នួលឡូត៍នេសាទទាំង៧ក្នុងរដូវនេសាទឆ្នាំ២០០៩-២០១០ មន្ត្រីជលផលខេត្តសំរេចប្រមូលបានតែ៨០១.៤០០.០០០រៀល គឺនៅខ្វះមួយចំនួនទៀតដោយសារតែឡូត៍នេសាទលេខ៣ ត្រូវបង់៨៤លានរៀល តែបច្ចុប្បន្នបង់បានតែ៦១លានរៀល គឺនៅខ្វះ២៣លានរៀលទៀត ដែលពេលនេះខណ្ឌរដ្ឋបាលជលផលខេត្តបានត្រៀមបញ្ជូនសំណុំរឿងទៅតុលាការហើយ។ ដោយឡែក លើការបង្រ្កាបបទល្មើសជលផលពិសេសនៅរដូវបិទនេសាទ មន្ត្រីជលផលខេត្តបានសហការជាមួយកងកម្លាំងប្រដាប់អាវុធចុះរុះរើនិងបំផ្លាញចោលឧបករណ៍នេសាទល្មើសច្បាប់រួមមានរបាំងស្បៃមុង សរុប៣.៣៧៨ម៉ែត្រ លូស្បៃមុង៧៨ របាំងសាច់អួន៣៧.៤៧៣ម៉ែត្រ លូសាច់អួន៤០៦ របាំងព្រួល២.៣៦០ម៉ែត្រ បង្គោល៣២.៣៣៧ដើម សំរាស់១២.១៧៧ម៉ែត្រការ៉េ លបសាច់អួន២០គ្រឿង លបឫស្សី១១០គ្រឿង ចាក់លែងត្រីបាន៣០០គីឡូក្រាម។ទន្ទឹមនេះសមត្ថកិច្ចជលផលក៏បានធ្វើការឃាត់ខ្លួនជនល្មើសកាប់ឆ្ការឈូសឆាយដីព្រៃលិចទឹក និងជនល្មើសធ្វើនេសាទខុសច្បាប់បានចំនួន១៩នាក់ ដោយសំរេចរឹបអូសវត្ថុតាងរួមមាន ត្រាក់ទ័រ៥គ្រឿង អេស្កាវ៉ាទ័រ៣គ្រឿង គោយន្ត២គ្រឿង ម៉ូតូ៥គ្រឿង ថ្នាំបំពុល២ដប ដុំភ្លើងឆក់៨គ្រឿង ដងឆក់៦ដើម អាគុយ៧គ្រឿង និងឧបករណ៍ល្មើសផ្សេងៗមួួយចំនួនទៀត ព្រមទាំងបានកសាងសំណុំរឿងបញ្ជូនទៅសាលាដំបូងខេត្តដើម្បីធ្វើការផ្តន្ទាទោសតាមច្បាប់។
តាមរបាយការណ៍បានឱ្យដឹងទៀតថា កន្លងមកឡូត៍នេសាទនៅក្នុងភូមិសាស្ត្រខេត្តកំពង់ធំមានសរុប៧ឡូត៍ ក្នុងនោះឡូត៍លេខ១ លេខ២ និងលេខ៣ ស្ថិតក្នុងស្រុកកំពង់ស្វាយ ឡូត៍លេខ៤ លេខ៥ និងលេខ៦ ស្ថិតក្នុងស្រុកស្ទោង និងឡូត៍លេខ៧ ស្ថិតក្នុងស្រុកបារាយណ៍-សន្ទុក។ ដែនឡូត៍នេសាទលេខ១ មានវិសាលភាពគ្របដណ្តប់លើដងស្ទឹងសែនប៉ែកខាងក្រោមជាប់វាលទំនាបបឹងទន្លេសាប កន្លងមក ឡូត៍នេះរដ្ឋបានដាក់ឱ្យឯកជនដេញថ្លៃធ្វើអាជីវកម្មដែលរៀងរាល់រដូវបើកនេសាទម្តងៗត្រូវថៅកែឡូត៍នេះបោះធ្នស់កាត់ស្ទឹងសែនជាច្រើនកន្លែង ធ្វើឱ្យត្រីមិនអាចធ្វើចរាចរណ៍ទៅតំបន់ខាងលើបាន ដែលបណ្តាលឱ្យប្រជាពលរដ្ឋរស់នៅតាមដងស្ទឹងសែនក្នុងស្រុកចំនួន៥ជួបការលំបាកក្នុងការនេសាទជាលក្ខណៈគ្រួសារដើម្បីដោះស្រាយជីវភាព។ ហេតុដូច្នោះហើយទើបពួកគាត់បានលើកឡើងនូវសំណូមពរយ៉ាងទទូចជូនចំពោះសម្តេចតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដើម្បីជួយដោះស្រាយ។ ដោយយល់ច្បាស់ពីសុខទុក្ខរបស់ប្រជាពលរដ្ឋ ប្រមុខរាជរដ្ឋាភិបាលបានដាក់ចេញនូវអនុក្រឹត្យលេខ១១១ អ.ន.ក្រ.ប.ក ចុះថ្ងៃទី៣១ សីហា ២០១០ ដោយសំរេចលុបនាទីឡូត៍នេសាទលេខ១ ខេត្តកំពង់ធំ ទុុកសំរាប់ឱ្យប្រជាពលរដ្ឋធ្វើនេសាទជាលក្ខណៈគ្រួសារចាប់ពីរដូវនេសាទឆ្នាំ២០១០-២០១១ តទៅ ព្រមទាំងហាមដាច់ខាតមិនឱ្យជនណាមួយហួងហែងយកទៅលក់ឬជួលឱ្យឯកជនធ្វើអាជីវកម្មផ្តាច់មុខឡើយ ៕
ចែករំលែកព័តមាននេះ