រាជធានីភ្នំពេញ ៖ កម្មវិធីប្រកួតរូបស្វាជានិមិត្តរូប និងការតែងនិពន្ធពាក្យស្លោកសម្រាប់ព្រឹត្តិការណ៍អង្គរសង្ក្រាន្តឆ្នាំ២០១៦ បានទទួលស្នាដៃពីបេក្ខជនជាច្រើន ។ ពេលនេះបានរកឃើញម្ចាស់ជ័យលាភីក្រោមការវាយតម្លៃតាមរយៈការបោះឆ្នោតលើបណ្តាញហ្វេសប៊ុក ។
កាលពីរសៀលថ្ងៃទី២៤ មករា ឆ្នាំ២០១៦នៅមជ្ឈមណ្ឌលសហប្រតិបត្តិការកម្ពុជា-កូរ៉េ បានបង្ហាញម្ចាស់ជ័យលាភីសម្រាប់ស្នាដៃពីរផ្សេងគ្នា គឺការប្រកួតគូរគំនូររូបស្វាជានិមិត្តរូប និងការតែងនិពន្ធពាក្យស្លោក ។
កញ្ញាយឹម ចាន់វិនីតា និស្សិតថ្នាក់អនុបណ្ឌិតនៃសាកលវិទ្យាល័យភ្នំពេញអន្តរជាតិជាប់លេខ១លើស្នាដៃតែងនិពន្ធពាក្យស្លោក «អង្គរសង្ក្រាន្តប្រៀបបានដូចពេជ្រ ចែងចាំងរំលេចស្ទួយវប្បធម៌ខ្មែរ» ។ ពាក្យពេចន៍នេះបង្ហាញពីសុខសន្តិភាព រួបរួមគ្នា ទើបទទួលបានជោគជ័យហើយអាចញាំុងឱ្យកម្មវិធីអង្គរសង្ក្រាន្តកាន់តែល្បីល្បាញលើពិភពលោក ។
ចំពោះជ័យលាភីលេខ១លើស្នាដៃគំនូរស្វាជានិមិត្តរូបបានលើយុវជនពីខេត្តកំពង់ចាមជ្រិន ជ័យសក្ត័ និស្សិតឆ្នាំទី១ផ្នែកស្ថាបត្យកម្មនៃសាកលវិទ្យាល័យភូមិន្ទវិចិត្រសិល្បៈ ។ និស្សិតរូបនោះខិតខំគូរអស់រយៈពេល១សប្តាហ៍ទើបចេញជារូបរាងគំនូរស្វានិមិត្តរូប ។
ចំណាត់លេខ២បានទៅលើកញ្ញាបាន សុខធីតាមុនី ។
ចាប់ពីថ្ងៃទី១៦ មករា ឆ្នាំ២០១៦ គណៈកម្មការដែលជាសាស្ត្រាចារ្យជំនាញឯកទេសបានរៀបចំវាយតម្លៃស្នាដៃរូបស្វានិមិត្តរូបចំនួន១៣ (ក្នុងចំណោម៦៥ស្នាដៃ) ដោយផ្តោតលើលក្ខខណ្ឌដូចជា ៖
១-ពាក្យស្លោកត្រូវតែបង្កប់អត្ថន័យដែលទាក់ទងនឹងព្រឹត្តិការណ៍អង្គរសង្ក្រាន្ត ឬបុណ្យចូលឆ្នាំខ្មែរ ដូចជាការរួបរួមនិងជួបជុំមហាគ្រួសារខ្មែរ តួនាទីយុវជនក្នុងការថែរក្សា និងអភិវឌ្ឍវប្បធម៌ខ្មែរ ។
២-ពាក្យស្លោកខ្លីចន្លោះពី៥ទៅ២០ពាក្យ ។
៣-ត្រូវភ្ជាប់កថាខណ្ឌខ្លីមួយប្រកបដោយអត្ថន័យពាក្យស្លោក ។
ចំពោះរូបស្វាជានិមិត្តរូបត្រូវមានរចនាបថខ្មែរ គូរដោយប្រើខ្មៅដៃ ឬកុំព្យូទ័រ ។ ត្រូវបង្ហាញនូវឫទ្ធានុភាព ថាមពល ការគោរព ភាពស្មោះត្រង់ ភាពឆ្លាតវៃ និងភាពក្រមិចក្រមើម។ ជាស្នាដៃមិនចម្លងពីបុគ្គល ឬស្ថាប័នណាមួយឡើយ ។ រូបត្រូវមានកម្ពស់ពី១៥០មីល្លីម៉ែត្រទៅ២០០មីល្លី្លម៉ែត្រ ៕
ចែករំលែកព័តមាននេះ