សម្តេចតេជោ ហ៊ុន សែន ឯកភាពឲ្យមានការប្រកួតប្រដាល់ដែលកម្ពុជា-ថៃរួមគ្នាប្រកួតជាមួយបរទេស
រាជធានីភ្នំពេញ ៖ នៅលើបណ្តាញទំនាក់ទំនងសង្គម (facebook) Page ផ្លូវការរបស់សម្តេចអគ្គមហាសេនាបតីតេជោ ហ៊ុន សែន សរសេរបង្ហោះនៅប៉ុន្មាននាទីមុននេះ
រាជធានីភ្នំពេញ ៖ នៅលើបណ្តាញទំនាក់ទំនងសង្គម (facebook) Page ផ្លូវការរបស់សម្តេចអគ្គមហាសេនាបតីតេជោ ហ៊ុន សែន សរសេរបង្ហោះនៅប៉ុន្មាននាទីមុននេះ មានខ្លឹមសារទាំងស្រុងដូចតទៅ “កាលពីរសៀល ថ្ងៃទី២៣ ខែ មករា ម្សិលមិញនេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតអោយ លោក Tanasak Patimapragorn ឧបនាយករដ្ឋមន្ត្រីនិងជារដ្ឋមន្ត្រីក្រសួងការបរទេសថៃ ចូលជួបសំដែងការគួរសម និងពិភាក្សាការងារ។
ក្នុងជំនួបនោះ លោក Tanasak Patimapragorn បានជំរាបជូនសម្ដេចតេជោអំពីការប្រកួតបាល់ទាត់កាលពីល្ងាចនេះមិញ ហើយលោកបានមានប្រសាសន៍ថា នេះជា លើកទី១ហើយដែលកម្ពុជា និងថៃ បានរៀបចំការប្រកួតនេះឡើងដើម្បីពង្រឹងទំនាក់ទំនងមិត្តភាព រវាងប្រទេសទាំងពីរឱ្យមានភាពស្និទ្ធស្នាលកាន់តែខ្លាំងឡើង។
ការប្រកួតបាល់ទាត់ម្សិលមិញគឺមានការចាក់ផ្សាយបន្តផ្ទាល់ទាំងនៅប្រទេសថៃ និងកម្ពុជា ។ ជាងនេះទៀត លោកបានគោរពសុំការអនុញ្ញាតផ្តួចផ្តើមគំនិតធ្វើយ៉ាងណា រៀបចំឱ្យមានការប្រកួតកីឡាប្រដាល់ កម្ពុជា និងថៃ ជាមួយនឹងប្រទេសដទៃទៀត គឺមានន័យថា កម្ពុជា និងថៃ រួមគ្នាប្រកួត ជាមួយប្រទេសដទៃ។
សម្តេចតេជោនាយករដ្ឋមន្ត្រី ហ៊ុន សែន បានមានប្រសាសន៍ថា នេះជាព្រឹត្តិការណ៍ដ៏ល្អមួយ ដែលឧបនាយករដ្ឋមន្ត្រីទាំងកម្ពុជា និងថៃបានចូលរួម និងចាត់ទុកថា ជាឱកាសដ៏កម្រ ហើយព្រឹត្តិការណ៍នេះគឺចាត់ទុកថា ជាការយកចិត្តទុកដាក់លើទំនាក់ទំនង រវាងប្រទេសយើងទាំងពីរ ។
ចំពោះការផ្តួចផ្តើមរបស់លោក Tanasak ថាចង់រៀបចំឱ្យមានការប្រកួតកីឡាប្រដាល់ កម្ពុជា និងថៃ ជាមួយនឹងប្រទេសដទៃទៀតនោះ សម្តេចបានយល់ស្រប ហើយបានចាត់ទុកថា ការផ្តួចផ្តើមនេះ គឺជាការល្អដោយក្រុមកម្ពុជា និងថៃ ជាក្រុមរួមគ្នា ដើម្បីប្រកួតជាមួយនឹងប្រទេសដទៃទៀត រួមទាំងប្រទេសនៅអឺរ៉ុបផងដែរ។ ជាងនេះទៀត សម្តេចក៏បានប្រគល់តួនាទី ជូនឯកឧត្តម ឧបនាយករដ្ឋមន្ត្រី សុខ អាន ដែលជាសមាគម មិត្តភាពកម្ពុជា -ថៃ និងបានផ្តល់អនុសាសន៍ណែនាំ ឱ្យសមាគមមិត្តភាពកម្ពុជា ថៃ ធ្វើសកម្មភាពកាន់តែសកម្មថែមទៀត៕”
ចែករំលែកព័តមាននេះ