ជនជាតិថៃ៧នាក់ដែលត្រូវបានចាប់ខ្លួនដោយសមត្ថកិច្ចកម្ពុជា កាលពីថ្ងៃទី២៩ ខែធ្នូ ឆ្នាំ២០១០ និងការអនុវត្តយ៉ាងត្រឹមត្រូវតាមដំណើរការ និងនិតិវិធីរបស់តុលាការកម្ពុជាទៅលើជនជាតិថៃទាំងនោះ និងការខិតខំបញ្ចៀសនូវការប្រឈមមុខដាក់គ្នា គឺបាននាំឱ្យប្រទេសទាំងពីរកម្ពុជា-ថៃ ។ ក្នុងក្រសែភ្នែកនៃមហាជនជាតិ និងអន្តរជាតិពីការរក្សាបាននូវទំនាក់ទំនងល្អ ការធានាបាននូវនិរន្តភាពធុរៈកិច្ចនៅតាមតំបន់ព្រំដែន ។ ជាពិសេស គឺសមិទ្ធផលជាច្រើនដែលជាជោគជ័យរបស់ប្រទេសកម្ពុជា ត្រូវបានស្តែងចេញតាមរបៀបដោះស្រាយបញ្ហាដោយសន្តិវិធីនិងតាមអំណាចយុត្តាធិការនៃច្បាប់ ។
ជនជាតិថៃទាំង៧នាក់ ដែលមានទាំងអ្នកតំណាងរាស្ត្រទីក្រុងបាងកកម្នាក់ផង ត្រូវបានចោទប្រកាន់ពីបទឆ្លងដែនខុសច្បាប់។ បទចោទចូលទីលានយោធាកម្ពុជាក្នុងបំណងទុច្ចរិត និងបទចោទប្រកាន់បន្ថែមថ្មីមួយទៀតទៅលើជនជាតិថៃ២នាក់ក្នុងចំណោមនោះ គឺលោកវីរ៉ាក់ ស៊ុមខ្វាមឃីត និងនាងរ៉ាទ្រី ភិផាត់ថៈណាផៃប៊ូន ពីបទប៉ុនប៉ងប្រមូលព័ត៌មាន ដែលនាំឱ្យអន្តរាយដល់កិច្ចការការពារជាតិ ឬហៅថាបទល្មើសចារកម្ម ។ នេះជាការបង្ហាញពីភាពរឹងមាំនៃសំណាញ់ច្បាប់របស់តុលាការកម្ពុជា ក្នុងចំណាត់ការដ៏មានប្រសិទ្ធភាព ដើម្បីបញ្ចៀសបាននូវការប្រឈមមុខដាក់គ្នាដ៏គ្រោះថ្នាក់ក្រៅប្រព័ន្ធច្បាប់ ឬអាចចាត់ទុកថា ជាស្មារតីនៃការទទួលខុសត្រូវក្នុងកំរិតខ្ពស់បំផុតរបស់ប្រមុខដឹកនាំនៃរាជរដ្ឋាភិបាលកម្ពុជា ដើម្បីរក្សាបាននូវសន្តិសុខស្ថិរភាពនៅតាមខ្សែបន្ទាត់តំបន់ព្រំដែន និងកិច្ចសហប្រតិបត្តិការគ្នាដ៏ល្អរវាងប្រទេសទាំងពីរកម្ពុជា-ថៃ ។
ផ្តើមចេញពីសមាណចិត្ត និងដំណោះស្រាយនៃការយោគយល់ ដែលពុំមានវប្បធម៌សងសឹក ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន បានពញាក់អារម្មណ៍និងប្រែក្លាយគំនិតពីភាពចចេសរឹងរូសរបស់ថ្នាក់ដឹកនាំប្រទេសថៃ នាំឱ្យមានការផ្លាស់ប្តូរឥរិយាបថពីការប្រកែកតវ៉ា និងការទាមទារឱ្យដោះលែងថៃទាំងនោះដោយឥតលក្ខខណ្ឌ មកជាការព្រមទទួលស្គាល់ការពិតថា ជនជាតិថៃទាំង៧នាក់នោះ ពិតជាបានឆ្លងដែនចូលមកក្នុងទឹកដីកម្ពុជាដោយខុសច្បាប់ពិតប្រាកដ ហើយលោកនាយករដ្ឋមន្ត្រីថៃ អាប់ភីស៊ីត វេចាជីវ៉ា ក៏បានសុំឱ្យពួកគេទាំងអស់នោះ ត្រូវតែគោរពសេចក្តីសម្រេចរបស់តុលាការកម្ពុជាទៀតផង។
ការទម្លាក់ចុះនូវគំនិតមានៈ ដោយការចង់ប្រើឥទ្ធិពលប្រទេសខ្លួនធំ មកគាបសង្កត់កម្ពុជាដែលជាប្រទេសតូច ត្រូវបានវាយបំបាក់ ដោយការលាតត្រដាងនូវភាពជាក់លាក់នៃទីតាំងពិតប្រាកដដែលត្រូវបានឈ្លានពានដោយថៃ នៅចំណុចភូមិជោគជ័យ ។ ឃុំអូរបីជាន់ ស្រុកអូរ ជ្រៅ ខេត្តបន្ទាយមានជ័យ តាមរយៈរូបភាពវីដេអូ ដែលថតដោយជនជាតិថៃជាប់ចោទ ហើយត្រូវបានផ្សព្វផ្សាយ(យូធូប) ជាសាធារណៈ គឺបានបង្ហាញពីចំណាត់ការប្រកបដោយប្រសិទ្ធភាព និងទាន់ពេលវេលាដែលជាផ្នែកមួយដ៏សំខាន់ក្នុងកាតព្វកិច្ចការពារជាតិរបស់រាជរដ្ឋាភិបាលកម្ពុជា ។
ការចាប់ខ្លួនជនជាតិថៃទាំង៧រូប បានក្លាយទៅជាព្រឹត្តិការណ៍ប្រវត្តិសាស្ត្រដែលមិនធ្លាប់មានចំពោះទឹកចិត្តពលរដ្ឋកម្ពុជា។ ជាមួយការគាំទ្រនិងសាទរទៅនឹងចំណាត់ការរបស់រាជរដ្ឋាភិបាលកម្ពុជា ដោយសារតែមហាជនទូទៅបានកត់សម្គាល់ឃើញពីសកម្មភាពរបស់ជនជាតិថៃទាំងនោះ ធ្លាប់បានប្រឆាំងជំទាស់ទៅនឹងការចុះប្រាសាទព្រះវិហារខែ្មរចូលក្នុងបញ្ជីបេតិកភណ្ឌពិភពលោក និងការតវ៉ាចង់បានទឹកដីខ្មែរ ។ សកម្មភាពដែលបង្កឡើងដោយក្រុមជ្រុលនិយមអាវលឿងថៃ គឺបានបង្កប់ទៅដោយចរិតនយោបាយ និងការយកការណ៍សម្ងាត់ក្នុងមូលដ្ឋានយោធាកម្ពុជា គឺពួកគេបានរំលោភយ៉ាងកំរោលលើគោលការណ៏ច្បាប់អន្តរជាតិ។ ដូច្នេះ ការអនុវត្តវិធានការផ្លូវច្បាប់ជារឿងអាទិភាពដែលមិនអាចខ្វះបាន ដើម្បីទប់ទល់នឹងចរិតឈ្លានពានមកលើទឹកដីកម្ពុជា ដោយឧបាយកលទុច្ចរិតក្នុងផែនការគិតទុកជាមុននោះ ។
សមិទ្ធផលដ៏ធំធេង ដែលបង្ហាញពីភាពថ្លៃថ្នូរស្របច្បាប់និងទទួលស្គាល់ជាអន្តរជាតិនៃអធិបតេយ្យព្រំដែនដ៏ច្បាស់លាស់រវាងកម្ពុជា-ថៃ និងឯករាជ្យភាព នៃប្រព័ន្ធតុលាការកម្ពុជា គឺការព្រមទទួលយកការពិត ដើម្បីបញ្ចាប់នូវការអះអាងពីសំណាក់ភាគីថៃ ដែលធ្លាប់តែបានលើកឡើងថា តំបន់ដែលត្រូវបានចាប់ខ្លួន គឺស្ថិតនៅក្នុងប្រទេសថៃ គឺពួកគេអាចបញ្ជូនភស្តុតាងទាំងឡាយទៅតុលាការបាន ប៉ុន្តែតាមរយៈកម្មវិធីតុមូលរបស់ទូរទស្សន៍ASTV កាលពីថ្ងៃទី១៦ ខែមករា ឆ្នាំ២០១១ លោកនាយករដ្ឋមន្ត្រីថៃអាប់ភីស៊ីត វេចាជីវ៉ា បានទទួលស្គាល់ថា «ចំណុចដែលជនជាតិថៃទាំង៧នាក់ត្រូវបានខ្មែរចាប់ខ្លួននោះ គឺជាទឹកដីរបស់ខ្មែរ ! មិនចាំបាច់ទៅពិសោធន៍អ្វីទេ ពីព្រោះបានទទួលសេចក្តីរាយការណ៍គ្រប់ផ្នែកបានអះអាងដូចគ្នាថា ពិតជាទឹកដីរបស់ខ្មែរមានទាំងរូបវីឌីអូទុកជាភស្តុតាងផងដែរ ។ ដូច្នេះមានន័យថា ជនជាតិថៃទាំង៧នាក់នោះពិតជាខុស! បន្ទាប់ពីនេះសូមមហាជនថៃទោះជាអ្នកណាក៏ដោយ សូមកុំសង្ស័យតទៅទៀត ប្រយ័ត្នធ្វើឱ្យហេតុការណ៍ច្របូកច្របល់។ ទន្ទឹមនឹងនេះសូមឱ្យរង់ចាំការកាត់ទោសរបស់តុលាការកម្ពុជាថា តើនឹងកាត់សេចក្តីដោយវិធីណា? »។
នៅថ្ងៃដដែលនោះដែរ ទូរទស្សន៍ASTV ក៏បានចាក់ផ្សាយឡើងវិញនូវបទសម្ភាសន៍របស់លោកប្រាវិទ វុងសុវណ្ណ រដ្ឋមន្ត្រីក្រសួងការពារជាតិថៃ ដែលមានខ្លឹមសារថា «ទីកន្លែងដែលចាប់ខ្លួននោះជាកន្លែងរបស់ខ្មែរ! ខ្មែរគេនៅតាំងពីយូរមកហើយ គឺតាំងពីឆ្នាំ១៩៧៧ ។ ទីនោះជាកន្លែងដែលកំណត់ថា ជារបស់កម្ពុជា។ ក្រោយពីពិនិត្យមើលម្តងទៀតកាលពីឆ្នាំ២០០៦ ក៏ជាផ្នែកមួយដែរដែលមានបង្គោលព្រំដែន ហើយថៃយើង ក៏ទទួលស្គាល់ថា ត្រង់នោះជារបស់កម្ពុជា»។
បទបង្ហាញខាងលើនេះ គឺបានកើតមាន ឡើងក្រោយពេលដែលថ្នាក់ដឹកនាំថៃ ជាបន្ត បន្ទាប់ដែលក្នុងនោះមានទាំងលោកឧបនាយក រដ្ឋមន្ត្រីថៃ ស៊ូថេប ធឿងសុបាន់ និងលោក កាស៊ីត ភិរម្យ៉ា រដ្ឋមន្ត្រីការបរទេសថៃក៏បាន និយាយដែរថា ថៃទាំងនោះបានចូលជ្រៅមក ក្នុងទឹកដីកម្ពុជា ហើយលោកក៏បានជំរុញឱ្យតុលាការកម្ពុជា ពន្លឿនដំណើរការនីតិវិធីរបស់ខ្លួនឱ្យបានឆាប់ និងការប្រកាសគោរពនូវសេចក្តីសម្រេចរបស់តុលាការទៀតផង។
ដោយឡែក ភស្តុតាងសំខាន់មួយទៀតក្នុងចំណោមការព្រមទទួលយកនូវការពិតរបស់ក្រុមមន្ត្រីថៃ ទៅនឹងចំណាត់ការរបស់កម្ពុជានោះ គឺតាមប្រភពព័ត៌មាន Inn news កាលពីថ្ងៃទី១០ ខែមករា ឆ្នាំ២០១១ ដែលមេបញ្ជាការភូមិភាគ២ថៃ លោកឧត្តមសេនីយ៍ទោ ថៈវ៉ាត់ឆៃ សមុតសាខន បានចេញមកអះអាងដែរថា «ត្រូវរង់ចាំដំណើរការរបស់តុលាការ ទន្ទឹមនឹងនេះត្រូវទទួលស្គាល់ថា ជាជាតិថៃ៧នាក់ពិតជាបានបំពានចូលទឹកដីកម្ពុជាតាមអំពើចិត្តដែលមិនបានជូនដំណឹងដល់សមត្ថកិច្ចជាមុន ។ ប្រសិនបើបានជូនដំណឹងជាមុននោះ ក៏នឹងគ្មានបញ្ហាពិបាកដោះស្រាយតាមក្រោយទេ ។ លោកបានបន្តថា ប្រសិនបើនរណាចូលមកក្នុងទឹកដីថៃក្នុងលក្ខណៈបែបនេះ ក៏ត្រូវចាប់ខ្លួនដូចគ្នាដែរ ព្រោះជារឿងនៃសេចក្តីថ្លៃថ្នូរត្រូវតែផ្តល់កិត្តិយសឱ្យគ្នាទៅវិញទៅមក»។
យោងតាមអំណះអំណាងដូចបានរៀបរាប់មកនេះ យើងអាចសន្និដ្ឋានបានថា មេដឹកនាំនៃរដ្ឋាភិបាលថៃបានព្រមព្រៀងគ្នាជាធ្លុងមួយ ទទួលស្គាល់ថា ជនជាតិរបស់ខ្លួនដែលមានចរិតដុតបញ្ឆេះកំហឹងនៃចរន្តជាតិនិយមជ្រុលហួសហេតុ រហូតពួកគេបំពានចូលក្នុងទឹកដីកម្ពុជាដោយខុសច្បាប់នោះ រដ្ឋាភិបាលថៃត្រូវតែមានវិធានការទប់ស្កាត់ជាដាច់ខាត ពីព្រោះរឿងនោះ គឺជាទង្វើខ្វះសុចរិតភាពដែលមិនបានឆ្លុះបញ្ចាំងពី ជាតិសាសន៍ដែលប្រកាន់ខ្ជាប់នូវការគោរពច្បាប់ទម្លាប់ឬជាប្រទេសជិតខាងល្អនោះឡើយ។
ទោះជាយ៉ាងណា គេបានកត់សម្គាល់ឃើញថា នាពេលថ្មីៗនេះរដ្ឋាភិបាលថៃបានពង្រឹងនូវការទប់ស្កាត់យ៉ាងតឹងរឹង ដោយមិនអនុញ្ញាតឱ្យក្រុមអ្នកតវ៉ាអាវលឿង មកបង្កការរាំងស្ទះដល់ប្រជាជនរស់នៅតាមតំបន់ព្រំដែននោះឡើយ ។ ជាមួយគ្នានេះ ដើម្បីបន្ធូរបន្ថយភាពតានតឹង និងបង្ហាញពីទំនាក់ទំនងល្អនៃប្រទេសទាំងពីរ មុនការសម្រេចរបស់តុលាការឱ្យជនជាតិថៃចំនួន៦នាក់បាននៅក្រៅឃុំជាបណ្តោះអាសន្ន គេបានមើលសង្កេតឃើញថា រដ្ឋាភិបាលថៃបានដោះលែង និងបញ្ជូនត្រឡប់មកវិញ នូវពលរដ្ឋខ្មែរប្រមាណជិត២០០នាក់ដែលត្រូវបានចាប់ខ្លួនជាបន្តបន្ទាប់នាពេលកន្លងមក ។
ក្នុងចំណោមនោះមានពលរដ្ឋខ្មែរខ្លះ មិនត្រឹមតែពាក់ព័ន្ធនឹងបទល្មើសព្រហ្មទណ្ឌប៉ុណ្ណោះទេ គឺមានការប្រព្រឹត្តបទឧក្រិដ្ឋទៀតផង តែត្រូវបានដោះលែងឱ្យមានសេរីភាពប្រឡប់មករស់នៅក្នុងប្រទេសកំណើតរបស់ខ្លួនវិញ ។ ជាការចាប់អារម្មណ៍មួយទៀត នោះកាលពីថ្ងៃទី១៨ ខែមករា ឆ្នាំ២០១១ សមត្ថកិច្ចថៃ ក៏បានចាប់ខ្លួនមេដឹកនាំបណ្តាញអ្នកស្នេហាជាតិថៃមា្នក់ គឺលោកChaiwat Sinsuvong ដោយចោទប្រកាន់ពីបទទាក់ទងទៅនឹងការឡោមព័ទ្ធព្រលានយន្តហោះកាលពីឆ្នាំ២០០៨។ បើយោងតាមព័ត៌មានដែលទទួលបានមុនពេលចាប់ខ្លួន គឺលោកChaiwatបានដឹកនាំក្រុមអ្នកគាំទ្រអាវលឿងដើម្បីផ្ញើញត្តិប្រឆាំងនឹង រដ្ឋាភិបាលថៃទៅកាន់ព្រះមហាក្សត្រ ហើយក្រុមនេះក៏បានចោទប្រកាន់រដ្ឋាភិបាលថៃថា ខ្វះការគ្រប់គ្រងលើបញ្ហានៃការបោះបង្គោលព្រំដែនជាមួយប្រទេសកម្ពុជាផងដែរ។
ដូច្នេះការសម្រេចជាឆន្ទានុសិទ្ធិរបស់សាលាដំបូង និងសាលាឧទ្ធរណ៍នៃតុលាការកម្ពុជា ដែលបានអនុញ្ញាតដោះលែងជនជាប់ចោទជាជនជាតិថៃ៦នាក់ឱ្យនៅក្រៅឃុំជាបណ្តោះអាសន្ននោះ គឺជាសញ្ញាមួយដ៏ល្អនៃការបន្ធូរបន្ថយភាពតានតឹង និងការរក្សាបាននូវទំនាក់ទំនងល្អផ្នែកការទូត ការធានាបាននូវស្ថិរភាព និងបានជួយសម្រួលដល់ការប្រកបរបររកទទួលទាន ក៏ដូចជាការផ្លាស់ប្តូរពាណិជ្ជកម្ម រវាងគ្នាទៅវិញទៅមករបស់ប្រជាជននៅតាមព្រំដែននៃប្រទេសទាំងពីរដែលជានិរន្តភាពនៃធុរកិច្ច ប្រក្រតីភាពនៃការចេញចូលរបស់ភ្ញៀវទេសចរ។ ជាពិសេស គឺបានបង្ហាញប្រាប់ពិភពលោកថា កិត្តិយស កិត្យានុភាព ការឯកភាពជាតិ និងកិច្ចការការពារទឹកដី គឺត្រូវបានរាជរដ្ឋាភិបាលគោរពយ៉ាងម៉ឺងម៉ាត់ស្របតាមរដ្ឋធម្មនុញ្ញ ក៏ដូចជាភាពរឹងមាំនៃអំណាចតុលាការដែលជាស្ថាប័នឯករាជ្យនៅក្នុងប្រទេសកម្ពុជាដែលបានក្លាយទៅជាគំរូដ៏ល្អនៃមាគ៌ាសន្តិភាពសម្រាប់បណ្តាប្រទេសក្នុងតំបន់និងនៅលើសកលលោក ៕
( ពូន សំរេច )
ចែករំលែកព័តមាននេះ