ខេត្តឧត្តរមានជ័យ ៖ ជនសង្ស័យជាមេចោប្លន់ទូមាសនៅផ្សារអន្លង់វែងថ្មី ស្ថិតក្នុងភូមិអូរចិញ្ជៀន ឃុំអន្លង់វែង ស្រុកអន្លង់វែងខេត្តឧត្តរមានជ័យ កាលពីអំឡុងដើមខែមករា ២០១៥ កន្លងមក បានរត់គេចខ្លួនអស់រយៈពេល១ឆ្នាំ៣ថ្ងៃ ត្រូវបានកម្លាំងស្នងការដ្ឋាននគបាលខេត្តឧត្តរមានជ័យ សហការជាមួយកម្លាំងស្នងការដ្ឋាននគបាលខេត្តកំពង់ចាម ធ្វើការឃាត់ខ្លួនបានកាលពីរសៀលថ្ងៃទី១៨ មករា ២០១៦ ស្ថិតនៅចំណុចភូមិភ្នំមន្ទី ឃុំព្រែកកក់ ស្រុកស្ទឹងត្រង់ ខេត្តកំពង់ចាម។
ជនសង្ស័យឈ្មោះណត វុទ្ធី ហៅធីខ្វេ អាយុ៣៥ឆ្នាំ រស់នៅភូមិកណ្តាលលើ ឃុំអន្លង់វែង ស្រុកអន្លង់វែង ខេត្តឧត្តរមានជ័យ ។ចំណែកអ្នកលក់គ្រឿងអលង្ការប្លាទីន ឈ្មោះសេង ណារី អាយុ៤៣ឆ្នាំ ប្តីឈ្មោះលឹម វណ្ណា អាយុ៤៥ឆ្នាំ មានទីលំភូមិអូរចិញ្ជៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ បានអះអាងថា ក្រុមចោប្លន់យកគ្រឿងអលង្ការប្លាទីនអស់ចំនួន៧០តម្លឹង កាលពីថ្ងៃទី១៤ មករា ២០១៥ កន្លងទៅ ។
លោកវរសេនីយ៍ទោ ស៊ីម វណ្ណៈ អធិការស្រុកអន្លង់វែងបានឲ្យដឹងថា ជនសង្ស័យជាមេចោប្លន់ទូរលក់គ្រឿងអលង្ការប្លាទីន ក្នុងផ្សារអន្លង់វែងថ្មី ដែលមានបក្សពួក៤ ទៅ៥នាក់ បន្ទាប់ពីធ្វើសកម្មភាពប្លន់បានសម្រេច រត់គេចខ្លួនអស់រយៈពេល១ឆ្នាំ៣ថ្ងៃ ទើបកំលាំងសមត្ថកិច្ចចាប់បាន ដែលជនសង្ស័យរូបនេះ បានទៅលាក់ខ្លួននៅឯស្រុកស្ទឹងត្រង់ ខេត្តកំពង់ចាម។
ចែករំលែកព័តមាននេះ