ខេត្តបន្ទាយមានជ័យ ៖ លោកវរសេនីយ៍ឯក វង្ស វិត ស្នងការរង ទទួលផែនធនធានមនុស្ស តំណាងលោកឧត្តមសេនីយ៍ទោ អាត់ ខែម ស្នងការនគរបាលខេត្ត កាលពីរសៀលថ្ងៃទី១៦ ខែមករា ឆ្នាំ២០១៦ បាននាំយកថវិការបស់សមាគមមិត្តនគរបាលជាតិកម្ពុជាចំនួន៤លានរៀល ទៅប្រគល់ជូនដល់ក្រុមគ្រួសារសពលោកអនុសេនីយ៍ត្រី ធៀវ រ៉េត មន្ត្រីនគរបាលនៃអធិការដ្ឋាននគរបាលស្រុកព្រះនេត្រព្រះ ដែលបានទទួលមរណភាពកាលពីវេលាម៉ោង៩និង៤០នាទីយប់ថ្ងៃទី១៥ ខែមករា ឆ្នាំ២០១៦ ដោយរោគាពាធ ។ សពលោកអនុសេនីយ៍ត្រី ធៀវ រ៉េត ត្រូវបានក្រុមគ្រួសាររៀបចំធ្វើបុណ្យតាមប្រពៃណីនៅលំនៅឋាននៃសព ស្ថិតក្នុងភូមិប៉ុស្តិ៍ចាស់ ឃុំព្រះនេត្រព្រះ ស្រុកព្រះនេត្រព្រះ ។
លោកស្នងការរងបានបញ្ជាក់ថា ថវិកាដែលយកមកប្រគល់ជូនដល់គ្រួសារសពនាពេលនេះ គឺជាថវិការបស់សមាគមមិត្តនគរបាលជាតិកម្ពុជា ដែលបានផ្តួចផ្តើមឡើងដោយលោកនាយឧត្តមសេនីយ៍អគ្គស្នងការនគរបាលជាតិ ក្នុងគោលបំណងជួយគ្នាទៅវិញទៅមកគ្រាមានទុក្ខធុរៈដោយប្រការផ្សេងៗ ចាប់ពីមន្ត្រីនគរបាលថ្នាក់ក្រោមដល់ថ្នាក់លើ ។ តាមលក្ខន្តិកៈរបស់សមាគម គឺមន្ត្រីនគរបាលដែលជាសមាជិក សមាជិកានៃសមាគម ទទួលមរណភាព ត្រូវបានឧបត្ថម្ភជាទឹកប្រាក់ចំនួន៤លានរៀល។ជាមួយគ្នានេះដែរ អធិការនគរបាលស្រុកព្រះនេត្រព្រះ រួមទាំងមន្ត្រីក្រោមឱវាទបានចូលរួមថវិកាចំនួន៧០ម៉ឺនរៀលផងដែរ ៕
ចែករំលែកព័តមាននេះ