តុលាការសិទ្ធិមនុស្សអឺរ៉ុប (ECtHR) ទើបតែចេញសាលដីកាបញ្ជាក់ថា ទស្សនាវដ្តី Paris Match អត់បានជ្រៀតជ្រែកសិទ្ធិបុគ្គលផ្ទាល់ខ្លួនរបស់ព្រះរាជានៃប្រទេសម៉ូណាកូ ព្រះនាម អាល់ប៊ែរទី២ (Albert II) ទេ ។
តុលាការសិទ្ធិមនុស្សអឺរ៉ុប (ECtHR) ទើបតែចេញសាលដីកាបញ្ជាក់ថា ទស្សនាវដ្តី Paris Match អត់បានជ្រៀតជ្រែកសិទ្ធិបុគ្គលផ្ទាល់ខ្លួនរបស់ព្រះរាជានៃប្រទេសម៉ូណាកូ ព្រះនាម អាល់ប៊ែរទី២ (Albert II) ទេ ។ ជាមួយគ្នានេះ តុលាការថែមទាំងបដិសេធការទាមទារសំណងរបស់ព្រះរាជាអាល់ប៊ែរទី២ ចំពោះទស្សនាវដ្តីនេះ ដែលបានចុះផ្សាយព័ត៌មានស្តី ពីព្រះរាជាអង្គនេះ មានបុត្រាលួចលាក់ខាងក្រៅ ។
កាលពីជាង៩ឆ្នាំមុន គឺខែឧសភា ២០០៦ ក្នុងឱកាសប្រារព្ធខួបគម្រប់មួយឆ្នាំនៃការឡើងគ្រងរាជ្យរបស់ព្រះរាជាអាល់ប៊ែរទី២ ដែលជាបុត្រាទោលតែមួយគត់របស់ព្រះរាជាម៉ូណាកូ មុនរ៉េនីញេ ទី៣ (Rainier III : 1923-2005) ទស្សនាវដ្តីបារាំង Paris Match បានចុះផ្សាយបទសម្ភាសន៍របស់ខ្លួនជាមួយស្រី្តស្បែកខ្មៅម្នាក់ ដែលជាអ្នកបម្រើលើយន្តហោះ ។ ស្ត្រីស្បែកខ្មៅរូបនោះឈ្មោះ Nicole Cost អាយុ៣៤ឆ្នាំ សញ្ជាតិបារាំង ដើមកំណើតតូហ្គោ ខាងទ្វីបអាហ្វ្រិក ។
ក្នុងការផ្តល់បទសម្ភាសន៍ជាមួយទស្សនាវដ្តី Paris Match ស្ត្រីឈ្មោះ Nicole Cost និយាយប្រាប់ត្រង់ថា ខ្លួនមានកូនលួចលាក់ជាមួយស្តេចម៉ូណាកូ ព្រះនាមអាល់ប៊ែរទី២ កាលពី៣ឆ្នាំមុន តាំងពីព្រះរាជាអង្គនេះនៅជាព្រះអង្គម្ចាស់នៅឡើយ ។ ហេតុដែលពេលនេះទើបខ្លួននិយាយចេញ ព្រោះកាលណោះខ្លួនបានសន្យាជាមួយស្តេចរូបនេះ (ជាប្រុសស្នេហ៍) ថា នឹងលាក់រឿងនេះមិនឱ្យលេចឮដល់ព្រះបិតាទ្រង់ឡើយ ពេលព្រះអង្គនៅមានព្រះជន្ម ដើម្បីឱ្យប្រុសស្នេហ៍បានឡើងស្នងរាជ្យពីព្រះបិតា ក្នុងនាមជាព្រះអង្គម្ចាស់បរិសុទ្ធម្នាក់ មិនមានប្រវត្តិប្រឡាក់ប្រឡូសរឿងមិនល្អ ។
បទសម្ភាសន៍ប្រវែង១០ទំព័រ ភ្ជាប់ជាមួយរូបថតក្តៅហុយៗ ធ្វើឱ្យភ្ញាក់ផ្អើលពេញប្រទេសម៉ូណាកូ និងសាធារណជនអឺរ៉ុប ។ បទសម្ភាសន៍បញ្ជាក់ច្បាស់ថា ស្ត្រីស្បែកខ្មៅ Nicole Coste ស្គាល់ជាមួយស្តេចអាល់ប៊ែរទី២ ក្នុងខែកក្កដា ឆ្នាំ១៩៩៧ ពេលខ្លួននៅជានារីបម្រើលើយន្តហោះ Air France ក្នុងជើងហោះហើរមួយពីប្រទេសម៉ូណាកូ ទៅទីក្រុងប៉ារីស ។ លទ្ធផលរបស់ស្នេហាលួចលាក់នោះ ផ្តល់កំណើតឱ្យកូនប្រុសម្នាក់ឈ្មោះ Alexandre ដែលកើតនៅខែសីហា ២០០៣ ។ ក្រោយមក រាជវង្សម៉ូណាកូ លួចលាក់យកកុមារ Alexandre ទៅពិសោធ DNA នៅប្រទេសស្វ៊ីស ។ លទ្ធផលចេញមក គឺបញ្ជាក់ច្បាស់ថា ស្តេចអាល់ប៊ែរទី២ និងកុមារ Alexandre ជាបិតា និងបុត្រានឹងគ្នា យ៉ាងពិតប្រាកដ ។ ស្តេចអាល់ប៊ែរទី២ ក៏បានឡាយព្រះហស្តលេខាទទួលស្គាល់លទ្ធផលនោះ យ៉ាងសព្វព្រះរាជហឫទ័យ ។
ក្រៅពីប្រាប់ត្រង់ពីរឿងស្នេហាលួចលាក់រវាងខ្លួន និងស្តេចអង្គនោះ ស្រី្តស្បែកខ្មៅ Nicole Cost ថែមទាំងផ្តល់រូបថតពាក់ព័ន្ធស្នេហាលួចលាក់នោះ ពិសេសរូបខ្លួនថតកៀកកើយជាមួយស្តេចអាល់ប៊ែរទីពីរ កាលនៅជាព្រះអង្គម្ចាស់, រូបស្តេចអាល់ប៊ែរទីពីរ បីបុត្រា Alexandre, រូបខ្លួនឯងប្រឡែងជាមួយកូនប្រុស Alexandre នាខែកុម្ភៈ ឆ្នាំ២០០៥ ក្នុងផ្ទះមួយនៅទីក្រុងប៉ារីស ដែលស្តេចអាល់ប៊ែរទីពីរ ផ្តល់ឱ្យ ។ រៀងរាល់ខែស្តេចអាល់ប៊ែរទី២ តាំងពីនៅជាព្រះអង្គម្ចាស់រហូតដល់ឡើងគ្រងរាជ្យជាស្តេច តែងផ្គត់ផ្គង់ដល់ម្តាយកូននាង ចំនួន១០.០០០អឺរ៉ូ តាមរយៈបុរសម្នាក់ដែលជាមិត្តភក្តិរបស់ព្រះអង្គ ។
ក្រោយពេលព័ត៌មាននេះ លេចឮពេញទ្វីបអឺរ៉ុប, ស្តេចអាល់ប៊ែរទីពីរ ប្តឹងទស្សនាវដ្តី Paris Match ពីបទជ្រៀតជ្រែកសិទ្ធិបុគ្គលផ្ទាល់ខ្លួនរបស់ព្រះអង្គ ព្រមទាំងទារសំណងជំងឺចិត្តចំនួន៥០.០០០អឺរ៉ូ ។ តុលាការគ្រប់ជាន់ថ្នាក់នៅទីក្រុងប៉ារីស បើកសវនាការតាំងពីឆ្នាំ២០០៩ រហូតដល់ឆ្នាំ២០១៤ សុទ្ធតែសម្រេចឱ្យទស្សនាវដ្តី Paris Match ចាញ់ក្តី និងតម្រូវឱ្យទស្សនាវដ្តីនេះត្រូវតែសុំទោសជាសាធារណៈ ចំពោះព្រះរាជាអាល់ប៊ែរទី២ និងត្រូវសងជំងឺចិត្តតាមការទាមទាររបស់ដើមបណ្តឹង ។
ចុងក្រោយបង្អស់, នាខែកក្កដា ២០១៤ គណៈនិពន្ធទស្សនាវដ្តី Paris Match សម្រេចចិត្តប្តឹងឧទ្ធរណ៍ឡើងទៅថ្នាក់ខ្ពស់បំផុត គឺតុលាការសិទ្ធិមនុស្សអឺរ៉ុប (ECtHR) ដែលមានទីស្នាក់ការនៅក្រុង Strasbourg ប្រទេសបារាំង។ តុលាការនេះបើកសវនាការអស់រយៈពេល៤ខែ ដោយមានការចូលរួមយ៉ាងទៀងទាត់ពីស្ត្រីស្បែកខ្មៅ Nicole Coste ក្នុងនាមជាសាក្សី ។ ទីបំផុត ECtHR កំណត់ថា តុលាការគ្រប់ជាន់ថ្នាក់នៅទីក្រុងប៉ារីស បំពានសេរីភាពសារព័ត៌មាន និងបានបដិសេធការទាមទារសំណងរបស់ស្តេចអាល់ប៊ែរទី២ ដ្បិតអី កាលពីពាក់កណ្តាលខែកក្កដា ២០១៥ ស្តេចអាល់ប៊ែរទី២ អង្គនេះ បានទទួលស្គាល់ជាសាធារណៈតាមរយៈតំណាងរបស់ព្រះអង្គ គឺលោកមេធាវី Thiery Lacoste ថា កុមារ Alexandre ពិតជាបុត្រាដំបូងរបស់ព្រះអង្គមែន ។ ដូច្នេះ ទស្សនាវដ្តី Paris Match គ្រាន់តែជាអ្នកផ្តល់ព័ត៌មានតាមរយៈការរៀបរាប់របស់ស្ត្រីឈ្មោះ Nicole Coste ដែលជាអ្នកស្ថិតក្នុងហេតុការណ៍នេះផ្ទាល់ប៉ុណ្ណោះ អត់មានទៅជ្រៀតជ្រែកសិទ្ធិបុគ្គលផ្ទាល់ខ្លួនរបស់ស្តេចអាល់ប៊ែរទីពីរ ឡើយ ៕
ចែករំលែកព័តមាននេះ