ក្លិបភ្នំពេញក្រោន បង្ហាញពីការផលិតធនធានឈុតថ្នាលយុវជន-នារី
- ភ្នំពេញ
រាជធានីភ្នំពេញ ៖ តាមការបញ្ជាក់របស់នាយកបច្ចេកទេសក្លឹបបាល់ទាត់ភ្នំពេញក្រោន ដែលត្រូវគេស្គាល់ថាជាក្លិប«សិង្ហក្រហម»
រាជធានីភ្នំពេញ ៖ តាមការបញ្ជាក់របស់នាយកបច្ចេកទេសក្លឹបបាល់ទាត់ភ្នំពេញក្រោន ដែលត្រូវគេស្គាល់ថាជាក្លិប«សិង្ហក្រហម» បានបង្ហាញពីបច្ចុប្បន្នភាពនៃការផលិតធនធានថ្នាលយុវជន-នារី នៅក្នុងអំឡុងវិបត្តិកូវីដ-១៩នេះយ៉ាងសកម្ម ដើម្បីវិស័យបាល់ទាត់។ លោក ស៊ុ វណ្ណា ហាក់មានជំនឿចិត្តថា ធនធានដែលខ្លួនខំផលិតក្នុងពេលដែលអ្នកស្រលាញ់កីឡាភាគច្រើនមិនសូវហ៊ាននេះ នឹងបម្រើវិស័យបាល់ទាត់បានល្អនោះផង។
លោក ស៊ុ វណ្ណា បានបញ្ជាក់ថា «សម្រាប់ការងារបណ្តុះបណ្តាលយុវជនបាល់ទាត់ក្លឹបភ្នំពេញក្រោន បច្ចុប្បន្ននេះត្រូវបានបែងចែកជាពីរ ក្នុងស្ថានភាពវិបត្តិជំងឺកូវីដ-១៩នេះ ដែលមិនទាន់អាចហ្វឹកហាត់លក្ខណៈប្រមូលផ្តុំបានឡើយ។ តាមកម្មវិធីហ្វឹកហាត់នេះ គឺការហ្វឹកហាត់តាមប្រព័ន្ធ Zoom និងកម្មវិធីហ្វឹកហាត់កាយសម្បទា ដោយឲ្យពួកគាត់បញ្ជូនវីដេអូខ្លីៗ មកក្រុមការងាររបស់គ្រូបច្ចេកទេសវិញ ដូចជាលោក លី ហៀង, លោក កែវ សុខង៉ន និងខ្ញុំផ្ទាល់ និងក្រុមការងារបច្ចេកទេសមួយចំនួនទៀត ដើម្បីប្រជុំពិភាក្សាគ្នា ដើម្បីអភិវឌ្ឍបច្ចេកទេសលើថ្នាលយុវជនជាច្រើនឈុតនេះ»។
នាយកបច្ចេទេសរូបនេះបន្ថែមថា ក្រុមយុវជនបាល់ទាត់ជាច្រើនឈុតនេះ គឺមានកម្មវិធីហ្វឹកហាត់ផ្សេងពីគ្នា ដូចជាឈុតយុវជនអាយុក្រោម១៥ឆ្នាំ , ឈុតក្រោម១៨ឆ្នាំ, ឈុតក្រោម២១ឆ្នាំ និងក្រមឈុតធំនារី ដែលទាំង៤ឈុតនេះក្រៅពីការហ្វឹកហាត់ត្រៀម មិនទាន់មានការប្រកួតអ្វីឡើយ ដោយសារការប្រកួតនានាត្រូវបានផ្អាក ក្នុងបរិបទកូវីដ-១៩។ សរុបឈុតយុវជន និងឈុតធំនារីមានចំនួន ១៥០នាក់។
មុនពេលមកកាន់តួនាទីជានាយកបច្ចេកទេស នៅឆ្នាំ២០២១នេះ លោក ស៊ុ វណ្ណា ធ្លាប់បានកាន់កាប់ដំណែងជាគ្រូបង្គោលក្លឹបភ្នំពេញក្រោន បានជិត២រដូវកាល គឺរដូវកាល ២០១៩-២០២០។ លោក ស៊ុ វណ្ណា ជាគ្រូបង្វឹកមានវិញ្ញាបនបត្រ AFC A-License ហើយបានបញ្ចប់ការសិក្សាជាគ្រូឧទ្ទេសកម្រិត FIFA។ លោកសង្ឃឹមថា តាមរយៈការខិតខំលើការងារអភិវឌ្ឍថ្នាលយុវជន ក្រោមចក្ខុវិស័យរបស់ថ្នាក់ដឹកនាំក្លឹបភ្នំពេញក្រោន នឹងជំរុញដល់ការបណ្តុះបណ្តាលពួកគេឱ្យទទួលបានលទ្ធផលល្អសម្រាប់ក្លឹប និងក្រុមជម្រើសជាតិកម្ពុជា នាពេលអនាគត។
ជាគោលដៅ គឺយើងនឹងផ្តោតសំខាន់ទៅលើចក្ខុវិស័យរបស់ក្លឹប ដោយពង្រឹងគុណភាពលើឈុតយុវជនឱ្យបានល្អបន្ថែមទៀត ក្នុងនោះនឹងពង្រឹងលើឈុតតូចៗ រហូតដល់ឈុតU21 និងបង្កើតធនធានថ្មីៗចន្លោះពី៥ ទៅ៧នាក់ ក្នុង១ឆ្នាំៗ ដើម្បីជួយផ្គត់ផ្គង់ទៅលើក្រុមឈុតធំ សម្រាប់ការប្រកួតលីគកំពូលកម្ពុជា និងពានរង្វាន់សម្តេចតេជោ ហ៊ុន សែន នារដូវកាលបន្តបន្ទាប់។ ជាមួយគ្នានោះ យើងក៏ពិនិត្យមើល និងព្យាយាមកែលម្អទៅលើទីលានហ្វឹកហាត់ ទីលានប្រកួត ស្វែងរកកីឡាករល្អៗមកពីតំបន់ផ្សេងៗមកចូលរួមក្នុងក្លឹប ជាពិសេសគឺជួយលើកកម្ពស់បន្ថែមដល់គុណភាព សមត្ថភាពគ្រូបង្វឹកនានា ដើម្បីពង្រឹងគុណភាពបន្ថែម ក្នុងការគ្រប់គ្រង ហ្វឹកហាត់នៃក្រុមឈុតនីមួយៗ ដែលគ្រូបង្វឹករបស់ក្លឹបទាំងនោះទទួលបន្ទុក។
លោក ស៊ុ វណ្ណា បានលើកឡើងតួនាទីជានាយកបច្ចេកទេសមានវិសាលភាពធំ ដោយត្រូវការពេលវេលាច្រើន ក្នុងការស្វែងរកធនធាន ការបណ្តុះបណ្តាល ការអង្កេតមើលកីឡាករ រួមទាំងការអង្កេតមើលគ្រូបង្វឹកផងដែរ។ ទោះយ៉ាងនេះក្តី ការងារនេះមិនច្រើនដូចការងារដឹកនាំក្រុមឈុតធំប៉ុន្មានទេ ដោយសារក្រុមឈុតធំត្រូវការហ្វឹកហាត់បង្កើនគុណភាពបច្ចេកទេសកម្រិតខ្ពស់ជាង ការរៀបចំគម្រោងជាមួយកីឡាករ គ្រូបង្វឹក ក៏ដូចជាការដោះស្រាយពេលហ្វឹកហាត់ និងការប្រកួតរបស់កីឡាករ ដោយត្រូវសិក្សាលម្អិតទាំងមុនពេលប្រកួត ក្នុងពេលប្រកួត និងក្រោយពេលប្រកួតជាដើម។
គួររំឭកថា លោក ស៊ុ វណ្ណា ជាអតីតគ្រូបង្វឹកនៅក្លឹបបាល់ទាត់ស៊ីម៉ាក់ និងវេស្ទើន ហើយបានមកជួយដឹកនាំគ្រូបង្គោលនៅក្លឹបភ្នំពេញក្រោនជិតពីររដូវកាលចុងក្រោយ។ កាលពីរដូវកាល ២០២០ លោកបានដឹកនាំក្រុមភ្នំពេញក្រោនដណ្តើមបានលេខ៣ នៃក្របខ័ណ្ឌលីគកំពូលកម្ពុជា និងចំណាត់ថ្នាក់លេខ៤ ពានរង្វាន់សម្តេចតេជោ ហ៊ុន សែន៕
ចែករំលែកព័តមាននេះ