រាជធានីភ្នំពេញ ៖ ក្រុមហ៊ុនទូរស័ព្ទចល័ត South East Asia Telecom ( Seatel ) បានជ្រើសរើសកីឡាករ បាល់ទាត់ជំរើសជាតិ លោកចាន់ វឌ្ឍនាកា ជាទូតសុច្ឆន្ទៈប្រចាំក្រុមហ៊ុនរបស់ខ្លួនរយៈពេល១ឆ្នាំ
រាជធានីភ្នំពេញ ៖ ក្រុមហ៊ុនទូរស័ព្ទចល័ត South East Asia Telecom ( Seatel ) បានជ្រើសរើសកីឡាករ បាល់ទាត់ជំរើសជាតិ លោកចាន់ វឌ្ឍនាកា ជាទូតសុច្ឆន្ទៈប្រចាំក្រុមហ៊ុនរបស់ខ្លួនរយៈពេល១ឆ្នាំ ក្នុងការផ្សព្វផ្សាយស្ពតពាណិជ្ជកម្ម និងសកម្មភាពនានារបស់ក្រុមហ៊ុន ។ កាលពីរសៀលថ្ងៃទី១១ មករា ២០១៦ ក្រុមហ៊ុន Seatel បានរៀបចំពិធីចុះហត្ថលេខា និងតែងតាំងកីឡាករចាន់ វឌ្ឍនាការ ជាទូតសុច្ឆនៈឯកសិទ្ធិតំណាងក្រុមហ៊ុនជាផ្លូវការនៅការិយាល័យរបស់ក្រុមហ៊ុនក្នុងសង្កាត់ទួលទំពូង ។
លោក Yang Liqun អគ្គនាយករងក្រុមហ៊ុន Seatel បានមានប្រសាសន៍ថា ក្នុងនាមជាប្រតិបត្តិករទូរគមនាគមន៍ដំបូងគេនៅក្នុងប្រទេសកម្ពុជា ដែលបានផ្ដល់សេវាអ៊ីនធើរណេត 4G VoLTE 100% Seatel បានខិតខំប្រឹងប្រែងនាំមកនូវសេវាអ៊ីនធើរណេត ដែលមានល្បឿនលឿនបំផុត និងសេវាហៅទូរស័ព្ទជាសំឡេងដែលមានកម្រិតច្បាស់បំផុត ដើម្បីផ្ដល់ជូនអតិថិជនដែលប្រើប្រាស់ប្រព័ន្ធ០១៨ទាំងអស់ ។
លោកថា ចាន់ វឌ្ឍនាកា ជាកីឡាករបាល់ទាត់អាជីពដ៏ឆ្នើមមួយរូបស្មារតីតស៊ូពុះពារ និងបច្ចេកទេសគ្រប់គ្រងបាល់ដ៏អស្ចារ្យនៅលើទីលានប្រកួតរបស់លោក គឺមានលក្ខណៈដូចគ្នាយ៉ាងខ្លាំងទៅនឹងស្មារតីសហគ្រាសនៃការខិតខំពង្រីកឈានទៅមុខជានិច្ចរបស់ក្រុមហ៊ុន Seatel ដើម្បីផ្ដល់នូវផលិតផលមានគុណភាព និងល្បឿនលឿនផងដែរ។
លោកបន្តថា តាមរយៈកិច្ចសហការនេះ និងប្រជាប្រិយភាពដ៏ខ្លាំងរបស់កីឡាករ ចាន់ វឌ្ឍនាកា នៅក្នុងសង្គមសាធារណៈ នឹងធ្វើឱ្យម៉ាកសញ្ញា និងប្រជាប្រិយភាពរបស់ក្រុមហ៊ុន Seatel ទទួលបាននូវការគាំទ្រពីអតិថិជនកម្ពុជាបន្ថែមមួយកម្រិតទៀត ។
លោកបែ មករា នាយកគ្រប់គ្រងក្លឹបបាល់ទាត់បឹងកេតអង្គរ បានមានប្រសាសន៍ថា ចាន់ វឌ្ឍនាកា ជាកីឡាករដ៏មានសក្ដានុពលមួយរូប និងធ្លាប់ទទួលបានរង្វាន់កិត្តិយសជាច្រើន ដូចជាពានរង្វាន់កីឡាករលេងបានល្អបំផុតប្រចាំឆ្នាំ២០១៤ ពានរង្វាន់ Toyota Mekong club Championship ពានរង្វាន់ស្បែកជើងមាស ក្នុងការប្រកួតពានរង្វាន់សម្ដេចតេជោ ហ៊ុន សែន ឆ្នាំ២០១៣ និងក្នុងការប្រកួត Cambodia Premiere League រដូវកាលឆ្នាំ២០១៥ ជាដើម ។
កីឡាករ ចាន់ វឌ្ឍនាការ ក៏បានអោយដឹងដែរថា ក្នុងរយៈពេលមួយឆ្នាំទៅមុខនេះ លោកនឹងខិតខំប្រឹងប្រែង ឱ្យអស់ពីកម្លាំងកាយចិត្តក្នុងការផ្សព្វផ្សាយសេវាទូរស័ព្ទនេះ ទៅដល់បងប្អូនប្រជាជនកម្ពុជាទាំងអស់គ្នា ដើម្បីឱ្យពួកគាត់បានស្គាល់ និងសាកល្បងប្រើប្រាស់សេវាកម្មទូរស័ព្ទ Seatel នេះ ។ លោកមានជំនឿចិត្តថា ក្នុងការសហការគ្នានេះ នឹងធ្វើឱ្យក្រុមហ៊ុនទទួលបានជោគជ័យនៃអាជីវកម្មនេះ ៕
ចែករំលែកព័តមាននេះ