ក្នុងមន្ទីរសម្ភពមួយនៅភាគខាងជើងប្រទេសហ្គាតេម៉ាឡា ទ្វីបអាមេរិកឡាទីន កាលពីថ្ងៃទី១២ វិច្ឆិកា ២០១៥ ក្មេងស្រី Alicia ត្រូវគេយកកូនចេញដោយការវះកាត់ ព្រោះនាងនៅក្មេងពេក ពុំអាចសម្រាលកូនតាមធម្មជាតិបាន ។ Alicia រវើរវាយមិនដឹងថា ខ្លួនឯងអាយុប៉ុន្មានផង នាងគ្រាន់តែដឹងថា ជាង៩ខែមកនេះពោះរបស់នាងចេះតែរីក ធំឡើងៗ និងមានអាការល្ហិតល្ហៃពិបាកទ្រាំ ។ វេជ្ជបណ្ឌិតមួយរូបដែលស្គាល់ប្រវត្តិនាងច្បាស់ឱ្យដឹងថា ចូលខែធ្នូ២០១៥ នាងនឹងមានអាយុ១៣ឆ្នាំ ។ នាងត្រូវបុរសអាយុ២២ឆ្នាំម្នាក់ ចាប់រំលោភយ៉ាងកម្រោលកាលពីជាង៩ខែមុន ។ ពេលគ្រូពេទ្យកំពុងសង្គ្រោះនាង Alicia ស្រាប់តែនៅបន្ទប់ជាប់គ្នាមានសំឡេងទារកយំ ង៉ាៗ ។ ទារកនោះថ្លឹងបាន២,៩គីឡូក្រាម ។ ម្ដាយរបស់វាជាក្មេងស្រីជំទង់អាយុ១៤ឆ្នាំ ។ នាងក៏ត្រូវគេចាប់រំលោភដូច Alicia ដែរ ។
លោកវេជ្ជបណ្ឌិត Carlo Varquez ប្រធានមន្ទីរសម្ភពមួយនោះឱ្យដឹងថា ខែណាក៏មន្ទីរសម្ភពគាត់ទទួលបានក្មេងស្រីជំទង់ និងមិនទាន់ជំទង់ពី២០ទៅ៤០នាក់ មកសម្រាលកូន ឬរំលូតកូនចោល ។ នេះគិតត្រឹមមន្ទីរសម្ភពរបស់គាត់តែមួយ ,ចុះបើសរុបទូទាំងប្រទេសវិញ តើប៉ុន្មាននាក់ទៅ ? កាលពីដើមខែវិច្ឆិកា ២០១៥ មន្ទីរសម្ភពគាត់ជួបករណីសម្រាលកូនមួយស្លាប់ទាំងម្ដាយ ទាំងកូន ពុំអាចជួយបានព្រោះម្ដាយ ទើបតែមានអាយុជាង១០ឆ្នាំប៉ុណ្ណោះ ។
អង្គការសុខភាពពិភពលោក (WHO) សម្ដែងការព្រួយបារម្ភខ្លាំងណាស់ ចំពោះករណីក្មេងស្រីនៅប្រទេសហ្គាតេម៉ាឡាដែលត្រូវគេចាប់រំលោភនាំឱ្យមានផ្ទៃពោះទាំងវ័យនៅក្មេង។ របាយការណ៍ពីស្ថាប័នតាមដានសុខភាពបន្តពូជ និងសម្រាលកូនរបស់ហ្គាតេម៉ាឡាបានឱ្យដឹងថា ពីឆ្នាំ២០១៤ដល់សព្វថ្ងៃមាន៥.២០០ករណីក្មេងស្រីអាយុពី១០ឆ្នាំដល់វ័យជំទង់មានផ្ទៃពោះ និងសម្រាលកូន ។ ប្រទេសហ្គាតេម៉ាឡា ជាប្រទេសមានអត្រាក្មេងស្រីអាយុ១០ឆ្នាំ និងក្មេងស្រីវ័យជំទង់ពពោះខ្ពស់ជាងគេនៅលើពិភពលោក ។ ចំណោមទារកទាំងអស់មានទារក១ភាគ៤ ដែលកើតពីម្ដាយមានវ័យជំទង់ និងមិនទាន់ជំទង់ ។ អត្រានេះចេះតែកើន ខ្ពស់ឡើងៗគួរឱ្យព្រួយបារម្ភ ព្រោះកាលពីឆ្នាំ២០១១ មានតែ៣៥ករណី អ្នកម្ដាយមានអាយុ១០ឆ្នាំ តែ៤ឆ្នាំក្រោយគឺដល់ឆ្នាំ២០១៥ តួលេខនេះស្ទុះឡើងខ្ពស់រាប់រយដងឯណោះ ។
សព្វថ្ងៃនៅប្រទេសហ្គាតេម៉ាឡា ក្មេងស្រីជំទង់មានផ្ទៃពោះសឹងថា ជារឿងធម្មតាទៅហើយ។ ក្មេងស្រីខ្លះត្រូវឪពុកបង្កើតរបស់ខ្លួនរំលោភ រហូតដល់មានផ្ទៃពោះក៏មាន ហើយមានច្រើនទៀតផង ។
លោកស្រី Mirna Montenegro នាយកស្ថាប័នតាមដានសុខភាពបន្តពូជ និងសម្រាលកូន ឱ្យដឹងថា សមាជិក-សមាជិកាក្នុងស្ថាប័នរបស់លោកស្រីឧស្សាហ៍ទៅសំណេះសំណាលជាមួយកុមារីជាច្រើនដែលរងគ្រោះដោយត្រូវគេចាប់រំលោភ ដូចយ៉ាងនាងMichelle នៅភូមិMonja ឃ្លាតពីរដ្ឋធានីប្រទេសហ្គាតេម៉ាឡា ប្រហែល៥០គីឡូម៉ែត្រ។ នាងនោះត្រូវបុរសប្លែកមុខម្នាក់ចាប់ខ្លួនយកទៅរំលោភជាច្រើនថ្ងៃ ខណៈនាងកំពុងធ្វើដំណើរម្នាក់ឯង ។ ក្រោយមកបុរសនោះត្រូវចាប់បាន ហើយត្រូវតុលាការកាត់ទោសដាក់ពន្ធនាគារ១០ឆ្នាំ ។
ចំណែកនាង Lilian ត្រូវប្អូនប្រុសរបស់ជីតាខាងម្ដាយចាប់រំលោភ ពេលនាងទើបមានអាយុ៩ឆ្នាំ រំលោភជាបន្តបន្ទាប់រហូតដល់នាងមានផ្ទៃពោះ ហើយនាងក៏និយាយរឿងពោះរបស់ខ្លួនចេះតែធំប្រាប់ម្ដាយ ។
ចំណែកនាង Sarah ត្រូវឪពុកចុងរំលោភរហូតមានផ្ទៃពោះ ,រំលោភរួចគំរាមសម្លាប់នាងចោល ប្រសិនបើនាងហ៊ាននិយាយការណ៍ពិតប្រាប់អ្នកណាម្នាក់ ។ ក្នុងការជួបសំណេះសំណាលជាមួយអ្នកកាសែត លោកវេជ្ជបណ្ឌិត Carlo Vasquez និយាយប្រាប់ ត្រង់ៗថានៅប្រទេសហ្គាតេម៉ាឡាសព្វថ្ងៃ អ្នកម្ដាយដែលទើបមានអាយុ១៣ ឬ១៤ឆ្នាំច្រើនណាស់ ។ អ្នកទាំងនោះសុទ្ធតែរងគ្រោះ ដោយការចាប់រំលោភ។ ចង់ទប់ស្កាត់បញ្ហានេះបាន ទាល់តែដាក់ទោសជនល្មើសឱ្យធ្ងន់ , បើនៅតែដូចសព្វថ្ងៃសភាពឈឺចាប់នេះ នៅតែកើតមានដដែល ហើយថែមទាំងខ្លាំងលើសដើមទៀតផង ។
ចំណែកលោកស្រី Mirna Montenegro វិញ អះអាងថា សភាពសែនអាក្រក់នេះកើតចេញពីផ្នត់គំនិតចាត់ទុកនារី ជាទ្រព្យសម្បត្តិផ្ទាល់ខ្លួនរបស់បុរសហ្គាតេម៉ាឡា ។ មានឪពុកជាច្រើននិយាយយកត្រូវពេលខ្លួនរំលោភកូនស្រីខ្លួនឯង ដោយនិយាយថា កូនជាទ្រព្យសម្បត្តិរបស់ឪពុកម្ដាយ , ដូច្នេះឪពុកចង់ធ្វើយ៉ាងណាចំពោះកូនស្រីក៏បាន។ គំនិតកខ្វក់នេះ ដក់ជាប់ក្នុងអារម្មណ៍ជនជាតិហ្គាតេម៉ាឡាតាំងពីយូរយារណាស់មកហើយ ,ដូច្នេះហើយទើបជនល្មើសចាប់រំលោភក្មេងស្រីខ្លះ ជាប់គុកតែប៉ុន្មានខែចេញមកវិញរំភើយ ហើយបន្តរំលោភទៀត ៕
ចែករំលែកព័តមាននេះ