នាវាឈ្មោះ CHOI YOUNG ជានាវាចម្បាំងមួយគ្រឿងរបស់កូរ៉េខាងត្បូងបញ្ជូនមកកាន់ប្រទេសលីប៊ីពីដែនទឹកសូម៉ាលីត្រូវទៅដល់កំពង់ផែក្រុងបេនហ្គាហ្ស៊ីនាថ្ងៃទី២ មីនា។ យោងតាមប្រភពព័ត៌មានផ្លូវការថា នាវាពិឃាតចំណុះ៤.៥០០តោននោះអាចផ្ទុកមនុស្សបាន១០០នាក់បន្ថែមលើសមាជិកក្រុមនាវិក៣០០នាក់ ត្រូវបញ្ជូនទៅលីប៊ី ខណៈដែលកំហឹងប្រជាជនកាន់តែមានទំហំធំឡើងប្រឆាំងលោកកាដាហ្វី។ នាវាចម្បាំងនោះតាមធម្មតាធ្វើប្រតិបត្តិការក្នុងដែនទឹកសូម៉ាលីដើម្បីការពារបណ្តានាវាប្រឆាំងនឹងពួកចោរសមុទ្រក្នុងក្របខណ្ឌនៃយុទ្ធនាការអន្តរជាតិមួយដឹកនាំដោយសហរដ្ឋអាមេរិក។
យោងតាមរដ្ឋាភិបាលកូរ៉េខាងត្បូងថា ជនជាតិកូរ៉េខាងត្បូងប្រមាណជា៤៦០នាក់ស្ថិតក្នុងប្រទេសលីប៊ីនៅឡើយគិតមកដល់ថ្ងៃទី១ មីនា។ ពលរដ្ឋកូរ៉េខាងត្បូងប្រមាណជា១០០នាក់នឹងក្រាញនៅលីប៊ី ទោះបីអំពើហិង្សាកើតមានពេញបន្ទុកក្នុងប្រទេសនេះក្តី។ ពលរដ្ឋកូរ៉េខាងត្បូងជាច្រើនពាន់នាក់ត្រូវបានជម្លៀសចេញរួចហើយតាមផ្លូវអាកាស ឬផ្លូវគោកតាំងពីចាប់ផ្តើមមានការប្រទូស្តរ៉ាយគ្នានៅលីប៊ីមក ៕
ចែករំលែកព័តមាននេះ