រាជធានីភ្នំពេញ ៖ មន្ទីរសុខាភិបាលរាជធានីភ្នំពេញសហការជាមួយសមាគមសហព័ន្ធវិនិយោគ បានបើកវគ្គបណ្តុះបណ្តាលអ្នកលក់ឱសថ តាមឱសថស្ថាន កាលពីព្រឹកថ្ងៃទី៩ មករា ២០១៦។ ពិធីនេះ ប្រារព្ធធ្វើឡើងនៅនៅសណ្ឋាគារ High Sky ដោយមានការអញ្ចើញចូលរួមជាកិត្តិយសពីលោកវេជ្ជបណ្ឌិតឯកទេស ង៉ែត វាន់ ធូក ប្រធានសេវាឯកជនមន្ទីរសុខាភិបាលរាជធានីភ្នំពេញ លោកសាស្ត្រាចារ្យ សុខ សុគន្ធ ប្រធានមន្ទីរសុខាភិបាលរាជធានីភ្នំពេញ លោកបណ្ឌិត ឡី សុភាព ប្រធានសមាគមសហព័ន្ធវិនិយោគិន ។
លោកបណ្ឌិត ឡី សុភាព ប្រធានសមាគមសហព័ន្ធវិនិយោគិនមានប្រសាសន៍ថា «ការបើកវគ្គបណ្តុះបណ្តាលអ្នកលក់ឱសតាមឱសថស្ថាននៅពេលនេះ គឺមានបំណង ទី១-ចង់ឲ្យអ្នកឈរលក់ឱសថទាំងអស់នៅតាមរាជធានី-ខេត្តមានចំណេះដឹង ជំនាញវិជ្ជាជីវៈមួយពិតប្រាកដកុំឲ្យមានការលក់តាមៗគ្នាដែលធ្វើឲ្យប៉ះពាល់ដល់សុខុមាលភាពពរបស់រដ្ឋកម្ពុជា ។ យោងតាមការស្រាវជ្រាវឃើញថា ពលរដ្ឋកម្ពុជាចំនួន៥០% ជិះរថយន្តក្រុងទៅព្យាបាលនៅវៀតណាម, ជិះយន្តហោះទៅមើលជំងឺនៅក្រៅប្រទេសចំនួន៣០%។ ទី២-ចង់ពង្រឹង និងពង្រីកវិស័យសេដ្ឋកិច្ច ពោលគឺម្ចាស់ឱសថស្ថានកាលណាអ្នកឈរលក់ឱសថមានចំណេះដឹងមានក្រមសីលធម៌ និងវិជ្ជាជីវៈនេះ ក៏ធ្វើឱកាសលក់ឱសថទទួលបានប្រាក់ចំណេញច្រើនផងដែរ។ ទី៣-ចង់ឲ្យអ្នករកស៊ីនៅក្នុងប្រទេសកម្ពុជាត្រូវមានចំណេះដឹងមួយពិតប្រាកដមិនត្រូវអ្វីមួយដោយការស្មានៗតទៅទៀតនោះទេ ពីព្រោះការចូលសមាហរណកម្មអាស៊ាន គឺមានទំហំ និងទ្រុងទ្រាយធំ បើយើងគ្មានចំណេះដឹងគ្រប់គ្រាន់ទាំងក្រមសីលធម៌វិជ្ជាជីវៈទេនោះ នឹងធ្វើឲ្យយើងជួបបញ្ហាប្រឈមច្រើន។ ទី៤-សំណូមពរចង់ឲ្យអ្នករកស៊ីនៅផ្នែកឱសថជួបជុំគ្នាមួយខែម្តងថា តើមានឱសថថ្មីមានអ្វីខ្លះ ជំងឺថ្មីមានអ្វីខ្លះ? ហើយជំងឺថ្មីនោះត្រូវការប្រើប្រាស់នូវឱសថអ្វី? ដើម្បីដាក់ថ្នាំទៅឲ្យវាត្រូវ កុំចេះតែស្មាន និងទី៥-យើងចង់ឲ្យជុំគ្នាធ្វើសេដ្ឋកិច្ចពាណិជ្ជកម្ម ទាក់ទងនឹងការរកស៊ីនៅក្នុងវិស័យសុខាភិបាលមួយឲ្យបានច្បាស់»។
លោកសាស្ត្រាចារ្យ សុខ សុគន្ធ ប្រធានមន្ទីរសុខាភិបាលរាជធានីភ្នំពេញមានប្រសាសន៍ថា «កម្មវិធីថ្ងៃបានចូលរួមចំណែកកាត់បន្ថយការស្លាប់ទៅលើមនុស្សយើងទាំងមូល ហើយស្របទៅនឹងយុទ្ធសាស្ត្ររបស់ក្រសួងសុខាភិបាល និងយុទ្ធសាស្ត្ររាជរដ្ឋាភិបាលកាត់បន្ថយភាពក្រីក្ររបស់ពលរដ្ឋកម្ពុជា។ មានន័យថាយើងទាំងអស់គ្នានាំគ្នាកាត់បន្ថយភាពក្រីក្រ កាត់បន្ថយអត្រាស្លាប់ទាំងកុមារ ម្ដាយជាពិសេសមនុស្សយើងទាំងអស់នៅក្នុងប្រទេសកម្ពុជា ក៏ដូចជានៅលើពិភពលោក»។
លោកសាស្ត្រាចារ្យ សុខ សុគន្ធគូសបញ្ជាក់ថា «វគ្គបណ្ដុះបណ្ដាលនេះយើងខិតខំរៀបចំឡើង ជាពិសេសសំដៅទៅលើអ្នកលក់ឱសថឲ្យបានយល់ ប្រសិនបើយើងទៅរៀននៅមហាវិទ្យាទាំងសាលារដ្ឋ និងឯកជន គឺចំណាយពេលវេលាវែងណាស់ ។ បើយើងរៀនជាឱសថការី គឺយើងចំណាយពេល៥ឆ្នាំ ហើយនៅក្នុងរយៈពេលយើងរៀនសូត្រនេះ យើងបានចំណាយទាំងថវិកា និងពេលវេលាច្រើន ប៉ុន្តែនៅថ្ងៃនេះប្រសិនគាត់មកទទួលការបណ្តុះបណ្តាលរយៈពេលខ្លីពីរ ឬបីខែអាចធ្វើឲ្យយល់ដឹងបានច្រើនក្នុងការប្រើប្រាស់នូវឱសថធ្វើឲ្យពួកគាត់មានការប្រុងប្រយ័ត្នមុនពេលប្រើប្រាស់»។
ចែករំលែកព័តមាននេះ