រាជធានីភ្នំពេញ ៖ ការប្រកួតកីឡាវាយសីដណ្ដើមពានរង្វាន់៧មករាលើកទី១៦ នឹងរៀបចំធ្វើនៅខេត្តព្រះសីហនុរយៈពេល២ថ្ងៃចាប់ពីថ្ងៃទី១៦ដល់ថ្ងៃទី១៧ មករា ខាងមុខនេះ។
លោកជាម សុភា អគ្គលេខាធិការរងសហព័ន្ធកីឡាវាយសីកម្ពុជា និងជាអ្នកគ្រប់គ្រងកម្មវិធីប្រកួតបានឱ្យដឹងថា កាលពីឆ្នាំ២០១៥កន្លងទៅ ការប្រកួតកីឡាវាយសីដណ្ដើមពានរង្វាន់៧មករាលើកទី១៥ ធ្វើឡើងនៅខេត្តកោះកុងនិងមានរយៈពេល២ថ្ងៃដូចគ្នាចាប់ពីថ្ងៃទី១៧ដល់ថ្ងៃទី១៨ មករា ដោយមានសមាគម និងក្លិបចំនួន១១ចូលរួមប្រកួត ។ ដោយឡែកសម្រាប់ការប្រកួតឆ្នាំនេះនៅមិនទាន់ដឹងថាមានសមាគមនិងក្លិបប៉ុន្មាននោះទេដែលត្រូវចូលរួមប្រកួតនោះ។
ចំពោះវិញ្ញាសាប្រកួតវិញនោះមិនខុសពីឆ្នាំមុនៗឡើយ គឺមានវិញ្ញាសាប្រកួតវាយគូបុរសអាយុ១៩ឆ្នាំឡើង, ប្រកួតវាយគូយុវជនអាយុ១៩ឆ្នាំចុះ, ប្រកួតវាយគូវ័យជំទង់អាយុក្រោម១៦ឆ្នាំ, ប្រកួតវាយគូកុមារអាយុក្រោម១៣ឆ្នាំ, ប្រកួតវាយគូបុរសវ័យកណ្ដាលអាយុចាប់ពី៤០ឆ្នាំដល់៥០ឆ្នាំ, ប្រកួតវាយគូបុរសអាយុ៥០ឆ្នាំឡើង និងប្រកួតវាយគូនារីមិនគិតអាយុ ។ ប៉ុន្តែឆ្នាំនេះសហព័ន្ធកីឡាវាយសីកម្ពុជា បានបង្កើតឱ្យមានវិញ្ញាសា២ទៀតគឺ វិញ្ញាសាវាយទោលកុមារអាយុក្រោម១៣ឆ្នាំ និងវិញ្ញាសាវាយគូបុរស+ស្ត្រីអាយុក្រោម១៧ឆ្នាំ។ ជាមួយគ្នានេះ សហព័ន្ធបានដាក់ការកំណត់ដល់គ្រប់សមាគមនិងក្លិបទាំងអស់ដែលមកចុះឈ្មោះចូលរួមប្រកួតត្រឹមតែ២គូប៉ុណ្ណោះក្នុងមួយវិញ្ញាសា ។ ប៉ុន្តែសម្រាប់ម្ចាស់ផ្ទះមានសិទ្ធិដាក់អត្តពលិកចូលរួមប្រកួតរហូតដល់ទៅ៤គូក្នុងមួយវិញ្ញាសា ។
សហព័ន្ធកីឡាវាយសីកម្ពុជាបានចេញសេចក្ដី ប្រកាសជាសាធារណៈថា គ្រប់សមាគមនិងក្លិបទាំងអស់ត្រូវរួសរាន់មកដាក់ពាក្យចូលរួមប្រកួតឱ្យបានមុនថ្ងៃទី៩មករា ជាកំហិត ។ ចំណែកកីឡាករ-កីឡាការិនីដែលមានឈ្មោះចូលរួមប្រកួតហើយ បែរជាមកដល់ទីលានយឺតលើសពី១៥នាទីនឹងត្រូវចាត់ទុកថាបានបោះបង់ចោលការប្រកួត ហើយគណៈកម្មការរៀបចំការប្រកួតនឹងប្រកាសឱ្យចាញ់ជាស្វ័យប្រវត្តិតាមច្បាប់អន្តរជាតិ ៕
ចែករំលែកព័តមាននេះ