រាជធានីភ្នំពេញ ៖ សហព័ន្ធកីឡាបាញ់កាំភ្លើងកម្ពុជាចាប់ពីពេលនេះទៅ នឹងបើកដំណើរការជាធម្មតាវិញហើយបន្ទាប់ពីលែងមានសកម្មភាពអស់រយៈពេលជាច្រើនឆ្នាំ ហើយក៏សង្ឃឹមថានឹងរកបានកីឡាករល្អៗសម្រាប់ត្រៀមចូលរួមប្រកួតកីឡាស៊ីហ្គេមលើកទី៣២នៅឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះផងដែរ ។
សហព័ន្ធកីឡាបាញ់កាំភ្លើងកម្ពុជាអាណត្តិទី១នេះត្រូវបានទទួលស្គាល់ជាផ្លូវការដោយគណៈកម្មាធិការជាតិអូឡាំពិកកម្ពុជា និងក្រសួងអប់រំយុវជននិងកីឡា ។ លោកហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា បានចុះហត្ថលេខាទទួលស្គាល់សហព័ន្ធនេះជាផ្លូវការនៅថ្ងៃទី២៩ ធ្នូ ឆ្នាំ២០១៥ ។ សហព័ន្ធកីឡាបាញ់កាំភ្លើងកម្ពុជា មានសមាជិកប្រតិបត្តិចំនួន១៧រូប ក្នុងនោះមានលោកឧត្តមសេនីយ៍មៀច សុផាន់ណា អនុរដ្ឋលេខាធិការក្រសួងមហាផ្ទៃជាប្រធាន និងមានអនុប្រធានចំនួន៤រូបមានលោកឧត្តមសេនីយ៍ឯក ចាប ភក្ដី មេបញ្ជាការកងទ័ពឆត្រយោង៩១១, លោកឧត្តមសេនីយ៍ឯកប៊ុត សុភាព, លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងលោកឧត្តមសេនីយ៍ឯកនុត សវនា។ ចំណែកអគ្គលេខាធិការសហព័ន្ធគឺលោកប៊ួយ សោភ័ណ្ឌ ដែលមានអគ្គលេខាធិការរងចំនួន៣រូបទៀត និងអគ្គហិរញ្ញឹកគឺលោកខៃ វណ្ណៈ។
ក្នុងចំណោមសមាជិកប្រតិបត្តិសហព័ន្ធកីឡាបាញ់កាំភ្លើងកម្ពុជាទាំង១៧រូបនេះ ភាគច្រើនជាមន្ត្រីជាន់ខ្ពស់យោធា និងប៉ូលិស និងមានជនបរទេស២រូបទៀតត្រូវបានសហព័ន្ធតែងតាំងជាទីប្រឹក្សាបច្ចេកទេស ៕
ចែករំលែកព័តមាននេះ