រាជធានីភ្នំពេញ ៖ បើទោះជាមានការព្យាករមុននេះថា កីឡាករជើងខ្លាំងវ៉ន វីវ៉ា ទំនងជាបោះបង់អាជីពប្រដាល់ក្រោយពីរបួសដៃ ក៏កីឡាកររូបនេះបានចេញមុខប្រកាសភ្លាមៗថា មិនហួសពី៤ខែក្រោយនោះទេ
រាជធានីភ្នំពេញ ៖ បើទោះជាមានការព្យាករមុននេះថា កីឡាករជើងខ្លាំងវ៉ន វីវ៉ា ទំនងជាបោះបង់អាជីពប្រដាល់ក្រោយពីរបួសដៃ ក៏កីឡាកររូបនេះបានចេញមុខប្រកាសភ្លាមៗថា មិនហួសពី៤ខែក្រោយនោះទេ គឺប្រហែលជាពាក់កណ្ដាលឆ្នាំ២០១៦នេះ លោកនឹងឡើងប្រកួតលើរេញជាថ្មីវិញហើយ ។ ទោះបីយ៉ាងណា នៅចុងសប្ដាហ៍ទី១ក្នុងខែមករានេះ អតីតកីឡាការិនីស៊ន ដាវីន ជាភរិយាបានប្រកាសនៅលើហ្វេសប៊ុកថា នឹងឈប់ឱ្យស្វាមីប្រដាល់ជារៀងរហូតហើយដោយការប្រកាសនេះគឺស្របនឹងជំហររបស់វ៉ន វីវ៉ា ក្រោយពីស្ថានភាពដៃស្រាប់តែមានបញ្ហាម្ដងទៀត ។
ការប្រកាសរបស់ស៊ន ដាវីន គឺស្របគ្នាដែលវ៉ន វីវ៉ា បានប្រកាសសុំឡើងប្រដាល់នៅអំឡុងពាក់កណ្ដាលឆ្នាំថ្មីនេះ និងស្របគ្នាដែលដៃរបស់លោកត្រូវបានវះកាត់ដាក់ដែកជាថ្មី ដោយសារគ្រូពេទ្យវៀតណាមវះកាត់ដាក់ដែកខុសបច្ចេកទេស ហើយបណ្ដាលឱ្យស្ថានភាពដៃមានបញ្ហាមិនចេះអស់មិនចេះហើយ ចាប់តាំងពីវិលត្រឡប់មកពីប្រទេសវៀតណាមវិញ ។ អ្នកនាងបានបង្ហោះសារនោះលើហ្វេសប៊ុកថា ៖ «ពេទ្យវៀតណាមវះតឆ្អឹងដៃពីមុនខុសបច្ចេកទេស ឥឡូវមកពេទ្យខ្មែរដដែលធ្វើម្ដងទៀត ម៉េចបានចេះតែមានបញ្ហារហូតអ៊ីចឹង ហើយអរគុណដល់លោកគ្រូពេទ្យលឹម តាំង ដែលតែងតែជួយ» ។
លោក វ៉ន វីវ៉ា បានចាកចេញពីមន្ទីរពេទ្យក្នុងស្រុកដែលជួយវះកាត់ដោយតម្លៃធូរថ្លៃកាលពីថ្ងៃទី៤ មករា ដោយនៅចុងសប្ដាហ៍នេះមានការអះអាងថា លោកនៅតែមានអាការមិនទាន់បាត់ឈឺត្រង់កន្លែងដែលទើបនឹងវះកាត់នោះ ។ លោកវ៉ន វីវ៉ា បញ្ជាក់ថា ស្ថានភាពដៃរបស់លោកកើតមានបញ្ហា គឺបណ្ដាលមកពីពេទ្យវៀតណាមវះកាត់ដាក់ដែកខុសបច្ចេកទេសបណ្ដាលឱ្យដៃត្រង់កន្លែងបាក់ ទៅជាបាក់ឆ្អឹងម្ដងទៀត និងមិនអាចតភ្ជាប់គ្នាបានដូចការគ្រោងទុក ។ គាប់ជួនជាមានអាការឈឺចុកចាប់ ហើយពេលថតទៅឃើញដែកដែលបានវះដាក់ដោយក្រុមគ្រូពេទ្យវៀតណាម ក៏មានភាពមិនប្រក្រតីទើបសម្រេចវះកាត់ដាក់ដែកជាថ្មី ដោយលោកជ្រើសយកពេទ្យក្នុងស្រុកឱ្យធ្វើការវះកាត់វិញ ។
លោកនិយាយថា៖«ដោយសារតែដែកដែលពេទ្យវៀតណាមហ្នឹងដាក់ខុស ទើបខ្ញុំត្រូវវះកាត់ដកដែកហ្នឹងចេញ ហើយដាក់ដែកថ្មីវិញ ។ ខ្ញុំអត់ដឹងថាពេទ្យវៀតណាមគាត់ខុសបច្ចេកទេសម៉េចទេប៉ុន្តែវាធ្វើឱ្យឆ្អឹងដៃខ្ញុំមួយកន្លែងហ្នឹងទៅជាបែកទៅវិញ ហើយវាអត់ដុះសាច់ស៊ីគ្នា!» ។ លោកថា ក្រោយការវះកាត់ដាក់ដែកថ្មីម្ដងទៀត ដៃរបស់លោកគឺត្រូវសម្រាកយ៉ាងហោច៥ទៅ៦ខែទើបអាចដកដែកចេញបាន ហើយក៏ដល់ពេលល្មមដែលអាចឱ្យលោកឈប់ប្រដាល់ដែរ ។
នៅលើបណ្ដាញសង្គមហ្វេសប៊ុកអ្នកនាងស៊ន ដាវីន បានសរសេរដោយបើកចំហថា «ទោះវាដុះមិនស្អាតជិតល្អតែសូមឱ្យជោគជ័យផងចុះ (សំដៅលើការវះកាត់តឆ្អឹងដៃឡើងវិញ) ហើយនិងមិនឱ្យបងវិលទៅរកអាជីពចាស់វិញជាដាច់ខាត លាហើយអាជីពដែលធ្លាប់តែទទួលជោគជ័យ»។ ការប្រកាសរបស់នាងមានន័យគ្រប់គ្រាន់ដើម្បីដាក់សម្ពាធឱ្យលោកវ៉ន វីវ៉ា ឈប់គិតលើការចង់ប្រដាល់ បើទោះជាដៃដែលទើបឡើងជ្រញ់អាចជាសះស្បើយ១០០%ក្នុងពេលដ៏ខ្លីក្ដី ។ ការបង្ហោះសាររបស់នាងធ្វើឡើងបន្ទាប់ពីលោកវ៉ន វីវ៉ា បានប្រកាសឱ្យអ្នកចង់បានខ្សែក្រវាត់ពីលោកត្រៀមខ្លួននៅពេលដៃរបស់លោកជាសះក្រោយវះយកដែកចេញ ។
តាមគម្រោងបើគ្មានករណីវះដាក់ដែកម្ដងទៀតទេនោះប្រហែលជាដៃរបស់លោកនឹងឈានដល់ការដោះដែកចេញហើយអាចជាសះបន្ទាប់ពីការវះដាក់ដែកនៅប្រទេសវៀតណាមបានធ្វើឡើងច្រើនខែមកហើយ ។ អ៊ីចឹងហើយទើបគេមើលឃើញថា បញ្ហារបួសនេះបានរុញឱ្យ វ៉ន វីវ៉ា ឈប់នឹកនាវិលត្រឡប់មកប្រដាល់វិញ។ អ្នកនាងបានបញ្ជាក់ជាសាធារណៈថា វ៉ន វីវ៉ា ទោះជាស្ថិតក្នុងស្ថានភាពមានរបួសបែបណាក៏នៅតែចង់ប្រដាល់ដែរ ប៉ុន្តែដោយសារវ័យផង បញ្ហាដៃផង គឺអ្នកនាងមិនអាចឱ្យបន្តបានទេ ប៉ុន្តែអ្នកនាងបានជំរុញឱ្យស្វាមីងាកទៅរកអាជីពសម្ដែងដូចជាថតរឿងបង្ហាញក្បាច់គុន និងថតស្ពតអីវិញបើអាចទៅបាន។
កីឡាករ វ៉ន វីវ៉ា ដែលធ្លាប់ប្រកាន់ជំហរថា មិនច្បាស់លើការឈប់ប្រដាល់ បានបញ្ជាក់កាលពីថ្ងៃទី៦ មករា បន្ទាប់ពីចេញពីការវះកាត់ថា លោកប្រហែលមិនអាចប្រឆាំងនឹងទស្សនៈរបស់ភរិយាបានទេ នៅក្នុងកាលៈទេសៈដែលលោកខ្លួនឯងក៏មើលមិនឃើញពីភាពរីកចម្រើនដូចគ្នាដែរនោះ។ លោកបញ្ជាក់តាមទូរស័ព្ទថា៖«ដល់ពេលអញ្ចឹង (វះកាត់ដៃលើកទី២) ការប្រដាល់ប្រហែលជាឈប់មែនហើយ ព្រោះខ្ញុំអត់ចង់ឲ្យមានបញ្ហានៅក្នុងក្រុមគ្រួសារទេ» ។ លោកថា ក្រៅពីការប្រដាល់លោកមានការងារមួយផ្សេងទៀតក្នុងដៃរួចហើយដោយគ្រាន់តែលោកមិនចង់បង្ហើបឱ្យដឹងជាសាធារណៈប៉ុណ្ណោះ ។ ជាមួយនឹងការបញ្ជាក់ពីជំហរថាមិនចង់ប្រឆាំងនឹងការចង់បានរបស់ភរិយា លោកក៏តាំងចិត្ត១០០%ដោយផ្ទាល់ខ្លួនថា នឹងលែងត្រឡប់មកកាន់ការប្រដាល់នៅគ្រប់កាលៈទេសៈជារៀងរហូតគួរឱ្យភ្ញាក់ផ្អើល ។
លោកនិយាយថា៖«ខ្ញុំឈប់មែនទែនហើយ ព្រោះការប្រដាល់បងឯងដឹងហើយ វាបានតែប៉ុណ្ណឹង អញ្ចឹងខ្ញុំឈប់គិតវាហើយ!» ។ នេះជាការប្រកាសចេញពីមាត់ដែលមានមនុស្សភាគច្រើនផ្ដោតការចាប់អារម្មណ៍ ហើយក៏មានន័យថានឹងលែងបានឃើញកីឡាករវ៉ន វីវ៉ា ឡើងប្រដាល់លើរេញឱ្យឃើញជាសាធារណៈទៀតដែរ បើទោះជាបញ្ហារបួសដៃដែលទើបវះកាត់នឹងជាសះស្បើយក្ដី ។ ការប្រកាសលាឈប់របស់លោក នឹងធ្វើឱ្យធនធានកីឡាករជើងខ្លាំង១រូប ត្រូវបានដកចេញពីបញ្ជីអ្នកប្រដាល់នៅក្នុងកាលៈទេសៈដែលប្រទេសកម្ពុជា គឺបានតែបណ្ដុះជើងខ្លាំង ប៉ុន្តែមិនមានលទ្ធភាពចិញ្ចឹម និងថែទាំកីឡាករខ្លាំងៗទាំងនោះដើម្បីបម្រើវិស័យប្រដាល់ឱ្យបានយូរអង្វែង ។
ទន្ទឹមនឹងការសម្រេចចិត្តបោះបង់អាជីពប្រដាល់ដោយលែងស្រពេចស្រពិល វ៉ន វីវ៉ា ក៏ត្រូវគេដឹងថាមានទ្រព្យក្នុងដៃមិនអន់នោះដែរ ។ ជាក់ស្ដែងនៅភូមិក្រាំងធ្នង់ ក្នុងខណ្ឌសែនសុខ គេសុទ្ធតែដឹងថា កីឡាកររូបនេះមានបន្ទប់ជួលប្រមាណជា២០បន្ទប់ទើបនឹងសាងសង់បានជាង៣ខែ និងមានដីទំនេរសល់ជាប់នោះមួយកន្លែងជាកម្មសិទ្ធិផ្ទាល់ខ្លួន ។ លោកបានប្រកាសលក់ដី និងបន្ទប់ជួលទាំងនោះក្នុងតម្លៃជិត១០ម៉ឺនដុល្លារ ដើម្បីយកទុនទៅប្រកបអាជីពផ្សេង ដែលគេកំពុងចាំអ៊ុតនៅឡើយថាតើកីឡាកររូបនេះ និងភរិយាមានគម្រោងធ្វើអី ។
ទោះបីយ៉ាងណា ដីទំនេរដែលមានទំហំ១០X១៧ម៉ែត្រតម្លៃ២៣.០០០ដុល្លារ និងបន្ទប់ជួលលើផ្ទៃដីទំហំ៨X២៣ម៉ែត្រតម្លៃជាង៥ម៉ឺនដុល្លារនោះ នៅមិនទាន់លក់ដាច់នៅឡើយទេ ក្រោយការប្រកាសលក់ដោយចំហនោះ ៕
ចែករំលែកព័តមាននេះ