តុលាការឃុំខ្លួនម្ចាស់ហាងគោលដៅចាស់ ខណៈមនុស្ស១៣នាក់ពិន័យ និងធ្វើការអប់រំ
- កណ្តាល
ខេត្តកណ្តាល ៖ លោក អ៊ុក សុវណ្ណារិទ្ធ ចៅក្រមស៊ើបសួរសាលាដំបូងខេត្តកណ្តាល នៅរសៀលថ្ងៃទី៦ ខែសីហា ឆ្នាំ២០២១ នេះ…
ខេត្តកណ្តាល ៖ លោក អ៊ុក សុវណ្ណារិទ្ធ ចៅក្រមស៊ើបសួរសាលាដំបូងខេត្តកណ្តាល នៅរសៀលថ្ងៃទី៦ ខែសីហា ឆ្នាំ២០២១ នេះ បានចេញដីកាឃុំខ្លួនលោក ឡៅ អ៊ូ ហៅខេន អាយុ៣៥ឆ្នាំ ជាម្ចាស់ហាង «គោលដៅចាស់» ស្ថិតនៅសង្កាត់តាខ្មៅ ក្រុងតាខ្មៅ ខេត្តកណ្តាលពីបទ «រារាំងដល់ការអនុវត្តវិធានការ» របស់អាជ្ញាធរ ពាក់ព័ន្ធការព្រហើនហ៊ានបើកហាងផឹកស៊ីក្នុងបរិបទនៃការរីករាលដាលជំងឺកូវីដ១៩ ជាពិសេស គឺបានប្រឆាំងនឹងបទបញ្ជារបស់រាជរដ្ឋាភិបាលតែម្ដង ។
ដោយឡែកមនុស្ស១៣នាក់ ត្រូវបានសមត្ថកិច្ចព្រហ្មទណ្ឌកំរិតស្រាលធ្វើ ការពិន័យតាមច្បាប់កូវីដ និងធ្វើការអប់រំ អោយវិលត្រឡប់ទៅផ្ទះវិញ ។
គួររំលឹកថា ហាង«គោលដៅចាស់» ត្រូវបានចុះបង្ក្រាប កាលពីព្រលប់ថ្ងៃទី៤ ខែសីហា ឆ្នាំ២០២១ ពាក់ព័ន្ធការព្រហើនហ៊ានបើកហាងផឹកស៊ី ក្នុងបរិបទនៃការរីករាលដាលជំងឺកូវីដ១៩ ពិសេស គឺ ប្រឆាំងនឹងបទបញ្ជារបស់រាជរដ្ឋាភិបាលតែម្តង ។
ការចុះបង្ក្រាបទ្រង់ទ្រាយធំនេះ គឺបន្ទាប់ពីមានបទបញ្ជាដ៏ម៉ឺងម៉ាត់ពីលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល និងចូលរួមបង្ក្រាបផ្ទាល់ពីលោកវរសេនីយ៍ឯក ឡាក់ ម៉េងធី នាយការិយាល័យព្រហ្មទណ្ឌកម្រិតស្រាល ព្រមទាំងលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ ។
រដ្ឋបាលខេត្តកណ្តាល បានដាក់ចេញនូវវិធានការរដ្ឋបាលសម្រាប់រយៈពេល១៤ថ្ងៃ គិតចាប់ពីម៉ោង២៣៖៥៩នាទី នាថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១ ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ១៩ នៅក្នុងភូមិសាស្ត្រខេត្តកណ្តាល ។
នេះបើយោងតាមសេចក្ដីសម្រេចរបស់ លោក គង់ សោភ័ណ្ឌ អភិបាលខេត្តកណ្តាល កាលពីថ្ងៃទី២៩ ខែកក្កដា ឆ្នាំ២០២១ ថ្មីៗនេះ ៕
ចែករំលែកព័តមាននេះ