រាជធានីភ្នំពេញ ៖ នៅលើសង្វៀនស៊ីធីអិនឬស្សីកែវ ថ្ងៃសៅរ៍ទី៩ មករា ខាងមុខនេះ នឹងមានព្រឹត្តិការណ៍ប្រកួតប្រដាល់ជាលក្ខណៈមិត្តភាពអន្តរជាតិរវាងកីឡាករកម្ពុជា និងកីឡាករថៃ ។ កីឡាករកម្ពុជា លាស់ យីន
រាជធានីភ្នំពេញ ៖ នៅលើសង្វៀនស៊ីធីអិនឬស្សីកែវ ថ្ងៃសៅរ៍ទី៩ មករា ខាងមុខនេះ នឹងមានព្រឹត្តិការណ៍ប្រកួតប្រដាល់ជាលក្ខណៈមិត្តភាពអន្តរជាតិរវាងកីឡាករកម្ពុជា និងកីឡាករថៃ ។ កីឡាករកម្ពុជា លាស់ យីន ដែលពីមុនមានឈ្មោះថា រាជសីហ៍ បាបា មកពីក្លិបសម្រែករាជសីហ៍ នឹងត្រូវប្រកួតជាមួយកីឡាករថៃឈ្មោះ វ៉ាត់ឆារ៉ាត់ដេត ស.ដានឆ័យ ក្នុងប្រភេទទម្ងន់៦០គីឡូក្រាម ចំណែកកីឡាករ សៀវ ង៉ុយ ដែលពីមុនមានឈ្មោះថា ឈិត ង៉ុយ មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករថៃឈ្មោះវីហ្គោសរ.ដានឆ័យ ក្នុងប្រភេទទម្ងន់៥៥គីឡូក្រាម ។
កីឡាករលាស់ យីន និងកីឡាករថៃមិនធ្លាប់ជួបគ្នាពីមុនមកឡើយ ទោះបីកីឡាករថៃរូបនេះធ្លាប់មកប្រកួតនៅស្រុកខ្មែរ៣លើករួចមកហើយក្ដី ។ គេនៅចាំបានថាកាលមកប្រកួតលើកទី១ នៅថ្ងៃទី៨ សីហា គេត្រូវសារឿន ចាន់ មកពីក្លិបតាព្រហ្មមានជ័យបង្ក្រាបគ្រឿងញៀន វាយឱ្យសន្លប់នៅទឹកទី៤ លើកទី២នៅថ្ងៃទី១២ កញ្ញា បានយកឈ្នះចាន់ រក្សា មកពីក្លិបអេភូថងកីឡាដោយពិន្ទុ និងលើកទី៣ថ្ងៃទី២៦ កញ្ញា ចាញ់ សុខ សុវណ្ណ មកពីសមាគមកីឡាប្រដាល់ក្រសួងការពារជាតិដោយពិន្ទុ ។ ដូច្នេះសម្រាប់ការមកជួបប្រកួតជាមួយលាស់ យីនលើកនេះគេមិនទាន់ដឹងថាយ៉ាងណានោះទេ ។
លាស់ យីន ធ្លាប់ប្រកួតបាន៧៩ដង ឈ្នះ៥៣ដង ចាញ់២២ដង ស្មើ៤ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន៩ដង ។ ចំណែក វ៉ាត់ឆារ៉ាត់ដេត ស.ដានឆ័យ វិញធ្លាប់ប្រកួតបាន៨៣ដង ឈ្នះ៦១ដង ចាញ់១៧ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់បានរហូតដល់ទៅ២០ដង ។
រវាងសៀវ ង៉ុយ និងវីហ្គោ ស.ដានឆ័យវិញនោះមានប្រវត្តិប្រកួតមិនលើសគ្នាប៉ុន្មានទេ។ សៀវ ង៉ុយ ធ្លាប់ប្រកួតបាន៤៩ដង ឈ្នះ៣៥ដង ចាញ់១៤ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន១១ដង ។ រីឯវីហ្គោ ស.ដានឆ័យ ធ្លាប់ប្រកួតបាន៤៧ដង ឈ្នះ៤១ដង ចាញ់៦ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន៥ដង ។ កីឡាករថៃរូបនេះធ្លាប់មកប្រកួតនៅស្រុកខ្មែរចំនួន២លើក លើកទី១ ចាញ់ ម៉ន សាម៉េត ដោយពិន្ទុ និងលើកទី២បានយកឈ្នះម៉ន ភារម្យនៅក្នុងទឹកទី២ ។ ប៉ុន្តែសម្រាប់ការមកជួបប្រកួតជាមួយសៀវ ង៉ុយ លើកនេះប្រហែលជាមិនអាចទៅរួចឡើយ ដោយសារសៀវ ង៉ុយ គឺជាអ្នកប្រដាល់ជើងខ្លាំងដែលមានស្នៀតប្រយុទ្ធល្អទាំងអស់ ជាពិសេសផ្លែជង្គង់របស់គេតែម្ដងដែលអាចប្រើការបានយ៉ាងស្ទាត់ជំនាញបំផុត ។ មិនតែប៉ុណ្ណោះចលនានៃការវាយចេញរបស់គេក៏រហ័សរហួនណាស់ដែរ។ ទោះបីយ៉ាងណាគូនេះអត់មានអ្នកណាហ៊ានទាយទុកមុនថា អ្នកណាខ្លាំងជាងអ្នកណាឡើយ ស៊ីសងឡើងសង្វៀនប្រកួតជាក់ស្ដែងទើបអាចដឹងបាន ។
ចំណែកគូប្រកួតមិត្តភាពធម្មតាវិញមានកីឡាករ សាង សី មកពីក្លិបឃ្លាំងមឿងកីឡា ប្រកួតជាមួយកីឡាករប៊ុន សុធា មកពីសមាគមកីឡាប្រដាល់ក្រសួងការពារជាតិ។ កីឡាករ ឡុង ជិន មកពីក្លិបសាលវ័ន្តកីឡា ប្រកួតជាមួយកីឡាករបឺត សង្ឃឹម មកពីក្លិបរ៉ាហាប់ស្វាយប៉ាក និងកីឡាករភួង ពិសិដ្ឋ មកពិក្លិបតាឡីដំរីមានរិទ្ធ ប្រកួតជាមួយកីឡាករ សេត មេសា មកពីក្លិបអង្គរមានជ័យខេត្តសៀមរាប ៕
ចែករំលែកព័តមាននេះ