រាជធានីភ្នំពេញ ៖ ព័ត៌មានផ្លូវការបានអះអាងថា ក្លិបបាល់ទាត់ល្បីឈ្មោះនៅកម្ពុជាគឺបឹងកេត គ្រោងចុះMOU ឬកិច្ចព្រមព្រៀងជាមួយ Home Sport និងភាគីថៃហើយ ដើម្បីពង្រីកនូវកេរ្តិ៍ឈ្មោះរបស់ខ្លួននៅក្នុងពិភពបាល់ទាត់ ។ នេះជាជំហានមួយថ្មីដែលក្លិបបាល់ទាត់បឹងកេតសម្រេចបាន បន្ទាប់ពីឈានឡើងជាក្លិបកំពូលនៅកម្ពុជាតាមរយៈការប្រកួតLeague ធំៗក្នុងប៉ុន្មានឆ្នាំចុងក្រោយ ។
យោងតាមការអះអាងថា Home Sport ដែលជាក្រុមហ៊ុននាំចូល និងទទួលផលិតសម្ភារកីឡាធំជាងគេនៅក្នុងប្រទេសកម្ពុជា នឹងទទួលបានសិទ្ធិពិសេសក្នុងការលក់សម្លៀកបំពាក់ និងសម្ភារសម្គាល់ក្រុមនេះក្នុងពេលខាងមុខ ដើម្បីលក់ចែកចាយឱ្យអ្នកគាំទ្រក្រុមបឹងកេត មានលទ្ធភាពប្រើប្រាស់នូវសម្ភាររួមមានសម្លៀកបំពាក់ ស្បែកជើង និសម្ភារជាច្រើនទៀតដែលសម្គាល់ដល់ក្រុមបឹងកេតចាប់ពីដើមឆ្នាំ២០១៦តទៅ ។ តាមរយៈកិច្ចព្រមព្រៀងដែលកើតចេញពីការជជែកគ្នាក្នុងប៉ុន្មានថ្ងៃនេះ គឺក្រុមហ៊ុនHome Sportជាអ្នករ៉ាប់រងស្វែងរកការផលិតសម្លៀកបំពាក់ និងសម្ភារសម្គាល់ក្រុមបឹងកេត ហើយHome Sport នឹងក្លាយជាអ្នកដាក់លក់ផ្ដាច់មុខនៅក្នុងប្រទេសកម្ពុជា ដោយថវិកាដែលទទួលបានគឺHome Sportមិនទទួលបានចំណែកនោះទេ ឬបើសិនជាទទួលក៏ទទួលក្នុងភាគរយតិចបំផុតដើម្បីឱ្យចំណូលទាំងនោះធ្លាក់ទៅលើក្រុមបឹងកេត និងដៃគូអ្នកជ្រោមជ្រែង។
ប្រភពដែលទម្លាយឱ្យកោះសន្ដិភាពបានដឹង បានបញ្ជាក់ប្រាប់ថា ហេតុផលដែលនាំឱ្យមានកិច្ចព្រមព្រៀងនេះ គឺដោយសារតែមានក្រុមហ៊ុនផលិតសម្លៀកបំពាក់កីឡាធំមួយរបស់ប្រទេសថៃ បានទំនាក់ទំនងតាមរយៈHome Sport ឱ្យដៅក្រុមបាល់ទាត់ល្បីឈ្មោះណាមួយនៅក្នុងប្រទេសកម្ពុជា ហើយត្រូវបាន Home Sport ដៅយកក្រុមបឹងកេតមុនគេ ដោយខាងក្រុមហ៊ុនថៃបានសម្រេចផលិតជាសម្លៀកបំពាក់ និងសម្ភារសម្គាល់ក្រុមទាំងមូលដើម្បីពង្រីកសក្តានុពលនៃផលិតផលរបស់ខ្លួននៅក្នុងកម្ពុជាផង និងដើម្បីជួយលើកកម្ពស់វិស័យបាល់ទាត់របស់ក្រុមនោះផង ហើយប្រគល់សិទ្ធិឱ្យHome Sportជាអ្នកចែកចាយនៅកម្ពុជា។
តាមរយៈកិច្ចព្រមព្រៀងពិសេសនេះ គឺមានន័យថា ក្រុមហ៊ុនផលិតសម្ភារកីឡានៅប្រទេសថៃ ជាអ្នករ៉ាប់រងលើការផលិតសម្លៀកបំពាក់ រួមមានស្បែកជើងជាដើមរបស់ក្រុមបឹងកេត ដើម្បីដាក់លក់ចែកចាយដល់អ្នកគាំទ្រដោយថវិកាទទួលបានគឺប្រគល់ឱ្យក្រុមបឹងកេត ហើយក្រុមហ៊ុន Home Sport គ្រាន់តែមានសិទ្ធិដាក់លក់ឱ្យក្នុងលក្ខណៈពង្រីកនូវការផ្គត់ផ្គង់របស់ហាងខ្លួន ។
លោក ឈី ហុកលី ម្ចាស់ភាគហ៊ុនធំមួយរបស់ក្រុមហ៊ុនHome Sport ដែលទទួលបន្ទុកគ្រប់គ្រងសាខាHome Sport នៅជិតសាលាណត្សប្រ៊ីដ និងទូរទស្សន៍អាស៊ីអាគ្នេយ៍ បានថ្លែងប្រាប់ថា MOU រវាងHome Sport និងភាគីថៃ ជាមួយក្រុមបឹងកេត បានឈានជិតដល់គោលដៅហើយ ដោយរង់ចាំតែធ្វើកិច្ចសន្យាចុងក្រោយ ដើម្បីសម្រេចលទ្ធផលផ្លូវការប៉ុណ្ណោះ ។ លោកថា នេះជាឱកាសទី១ដែលក្រុមបាល់ទាត់នៅក្នុងប្រទេសកម្ពុជាមានលទ្ធភាពរកបានអ្នកឧបត្ថម្ភជាពិសេសដែលមានន័យថាក្រៅពីទទួលបានថវិកាសម្រាប់ពង្រឹងសមត្ថភាពរបស់ក្រុមហើយ គឺថែមទាំងងាយស្រួលក្នុងការពង្រីកកេរ្តិ៍ឈ្មោះរបស់ក្រុមទៅកាន់អ្នកគាំទ្រទៀតផង។ លោកថា ភាគីថៃបានឯកភាពរួចហើយតាមរយៈHome Sport ក្នុងការផលិតសម្ភារផ្គត់ផ្គង់ដល់ក្រុមនេះ និងគ្រោងបោះសម្លៀកបំពាក់ រួមទាំងសម្ភារសម្គាល់ក្រុមបឹងកេតផងដើម្បីឲ្យហាង Home Sport ចរាចរដាក់លក់។
ជំហាននេះ ក៏មានន័យថាសម្រាប់អ្នកគាំទ្រក្រុមបឹងកេត គឺមិនពិបាកក្នុងការស្វែងរកសម្លៀកបំពាក់ និងសម្ភារដើម្បីគាំទ្រដល់ក្រុមនេះ ក្នុងពេលខាងមុខនោះផងដែរ ។ លោកមានប្រសាសន៍ថា៖ «រាល់ថ្ងៃយើងដឹងហើយថាក្រុមបឹងកេតគាត់ល្បី ប៉ុន្តែអ្នកគាំទ្ររបស់គាត់អត់មានលទ្ធភាពដើររកទិញសម្លៀកបំពាក់របស់ក្រុមគាត់មកពីណាដើម្បីពាក់គាំទ្រនោះទេ អ៊ីចឹងហើយទើបHome Sport សម្រេចស្វែងរកអ្នកជ្រោមជ្រែងគាត់ ហើយជាលទ្ធផលគឺក្រុមហ៊ុនផលិតសម្លៀកបំពាក់ និងសម្ភារកីឡាដ៏ធំរបស់ថៃដែលជាដៃគូពាណិជ្ជកម្មរបស់ Home Sport បានជួយផលិតសម្លៀកបំពាក់ឱ្យក្រុមនេះ ដោយហាងរបស់ខ្ញុំគ្រាន់តែជាអ្នកទទួលចែកចាយ ដើម្បីឱ្យអ្នកគាំទ្ររបស់គាត់ងាយស្រួលដើររកទិញប៉ុណ្ណោះ!» ។ លោកថា ក្រុមហ៊ុនថៃនៅមិនទាន់ច្បាស់ថា ត្រូវនឹងចែកភាគរយជាមួយក្រុមបឹងកេត ក្នុងការលក់សម្លៀកបំពាក់របស់ក្រុមនេះ ឬយ៉ាងណានោះទេ ប៉ុន្តែអ្វីសម្រាប់ Home Sport គ្រាន់តែជាអ្នកដាក់លក់សម្លៀកបំពាក់បែបនេះឱ្យក្រុមបឹងកេត និងប្រគល់លុយទៅឱ្យក្រុមបឹងកេតជាអ្នកចាត់ចែងបន្ត ។
លោកមានប្រសាសន៍ថា៖ «ឥឡូវហ្នឹងបើតាមខ្ញុំដឹងគឺខាងក្រុមហ៊ុនថៃគេផ្ដល់ការបោះពុម្ព និងការផលិតដើម្បីឱ្យសម្លៀកបំពាក់របស់ក្រុមបឹងកេតបានចរាចរលក់ដល់អ្នកគាំទ្រ ហើយបើតាមខ្ញុំដឹងដូចជាក្រុមហ៊ុនថៃហ្នឹងគេផលិតដោយឥតគិតភាគរយផង ព្រោះគេអត់ចង់ជួយជាលុយមកក្រុមតែម្ដងនោះទេ គឺគេជួយជាផលិតផលវិញ ដោយសារគេយល់ថាបើធ្វើអញ្ចឹងនឹងល្បីផលិតផលរបស់គេផង ហើយក្រុមបឹងកេតក៏ទទួលបានថវិកាពីការលក់សម្លៀកបំពាក់ហ្នឹងដើម្បីយកមកប្រើក្នុងក្រុមផង ។ ប៉ុន្តែសម្រាប់ភាពជាក់ស្ដែង តើក្រុមហ៊ុនថៃនឹងកែប្រែសុំកាត់ភាគរយវិញឬអត់នោះនៅមិនទាន់ច្បាស់ទេ ទាល់តែចាំមើលសិន!» ។ យ៉ាងណាក៏ដោយលោកអះអាងថា ក្រុមបាល់ទាត់បឹងកេត ទទួលបានផលប្រយោជន៍ពីMOU នេះច្រើនជាងគេ ដោយសារនឹងធ្វើឲ្យកេរ្តិ៍ឈ្មោះក្រុមកាន់តែល្បី ហើយអាចទទួលបានចំណូលក្នុងការអភិវឌ្ឍក្រុមទាំងមូលទៀតផង ។
លោកបែរ មករា ប្រធានក្រុមបឹងកេត បានអះអាងថា កិច្ចចរចាពាក់ព័ន្ធនឹងបញ្ហានេះ ឈានដល់ការឯកភាពគ្នាដោយមាត់និងមាត់ហើយ ប៉ុន្តែមិនទាន់បានចុះMOU នៅឡើយទេ ដោយទំនងរហូតដល់អំឡុងខែកុម្ភៈខាងមុខឯណោះ ទើបកំណត់ពេលចុះហត្ថលេខា ។ យ៉ាងណាក៏ដោយលោកហាក់មិនចង់ទម្លាយព័ត៌មានឱ្យមានការភ្ញាក់ផ្អើលនោះទេ ដោយអះអាងថា បញ្ជាក់មិនទាន់បាននិងស្នើឱ្យរង់ចាំ ។
ប្រភពច្បាស់ការណ៍បានអះអាងថា ក្រុមបាល់ទាត់បឹងកេត នឹងទទួលបានអត្ថប្រយោជន៍ពីMOU នោះបើនៅតែរក្សាលំដាប់ជាក្រុមកំពូលក្នុងរយៈពេលយូរ ។ ជាមួយគ្នានោះដែរ លោកឈី ហុកលីក៏អះអាងថា នឹងស្វះស្វែងឱ្យក្រុមហ៊ុនដែលបានសម្រេចជួយដល់ក្រុមបឹងកេតធ្វើបែបនេះចំពោះក្រុមបាល់ទាត់ផ្សេងទៀត ដើម្បីបំផុសឱ្យអ្នកគាំទ្រកាន់តែពុះកញ្ជ្រោលនឹងវិស័យបាល់ទាត់ទ្វេដង ៕
ចែករំលែកព័តមាននេះ