ដើម្បីចូលរួមចំណែកជាមួយក្រសួងសុខាភិបាលក្នុងការផ្សព្វផ្សាយ និងបញ្ជ្រាបចំណេះ ដឹងផ្នែកសុខភាពឱ្យកាន់តែទូលំទូលាយដល់ប្រជាជនដែលរស់នៅតាមទីជនបទ កាលពីចុងសបា្ដហ៍កន្លងទៅនេះ លោកឧកញ៉ា វេជ្ជបណ្ឌិត គួច ម៉េងលី ជាវេជ្ជបណ្ឌិតផ្នែកវេជ្ជសាស្ដ្រ ជំនាញវេជ្ជសាស្ដ្រទូទៅ និងអនុបណ្ឌិតផ្នែកសុខភាពសាធារណៈដែលជានាយកវេជ្ជសាស្ដ្រ គិលានដ្ឋានព្យាបាលចល័តវេជ្ជបណ្ឌិតគួច (Dr. Quach Mobile Medical Clinic) និងក្រុម ការងារនៃវិទ្យាស្ថាន និងសាលារៀនអន្ដរទ្វីប អាមេរិកាំងសរុប២២នាក់ បានចុះសួរសុខទុក្ខ ពិគ្រោះជំងឺ និងពិនិត្យសុខភាពជូនប្រជាជននៅភូមិកោះឫស្សី ឃុំប្រឡាយមាស ស្រុកកំពង់ លែង ខេត្ដកំពង់ឆ្នាំង ។
ស្ថិតនៅក្នុងឱកាសនោះ លោកឧកញ៉ាវេជ្ជ បណ្ឌិតគួច ម៉េងលី បានជួបសំណេះសំណាលសួរសុខទុក្ខជាមួយបងប្អូនប្រជាជនក្នុងភូមិ ហើយបានពិនិត្យ និងព្យាបាលជំងឺជូនប្រជាជនទាំងចាស់ទាំងក្មេងសរុប២៥០នាក់ ដោយឥតគិតថ្លៃ ក្នុងគោលបំណងជួយសម្រួលដល់ទុក្ខលំបាករបស់ពួកគាត់ដែលខ្វះព័ត៌មានស្ដីអំពីការថែទាំសុខភាព និងពុំមានលទ្ធភាពគ្រប់គ្រាន់ ដើម្បីទៅព្យាបាលជំងឺនៅមន្ទីរពេទ្យ ។ លោក ឧកញ៉ាវេជ្ជបណ្ឌិតបានសម្ដែងនូវក្ដីអាណិតអាសូរ និងបានផ្ដល់អនុសាសន៍ផ្ដាំផ្ញើដល់ប្រជាជនទាំងអស់ឱ្យបានយល់ដឹងអំពីសុខភាពសាធា រណៈដែលជាកត្ដាធ្វើឱ្យខ្លួនគាត់ផ្ទាល់សមាជិក គ្រួសារ និងសហគមន៍ មានសុខភាពល្អ ចៀសផុតពីជំងឺដង្កាត់ និងជំងឺឆ្លងផ្សេងៗ ។ លោក ឧកញ៉ាបានមានប្រសាសន៍ថា ប្រជាជនទាំងអស់ត្រូវទទួលទានទឹកឆ្អិនឱ្យបានគ្រប់គ្រាន់ លាងសំអាតដៃនឹងសាប៊ូមុននឹងបរិភោគអាហារ ឬ បញ្ចុកចំណីកូន ងូតទឹកឱ្យបានស្អាតបាត និង ញ៉ាំអាហារឱ្យបានទៀងទាត់ ព្រមទាំងខ្ពុរមាត់ជាមួយទឹកអំបិលក្ដៅឧណ្ហៗជាប្រចាំ ម្យ៉ាងវិញ ទៀត លោកឧកញ៉ាវេជ្ជបណ្ឌិតក៏បានពន្យល់ណែនាំដល់ប្រជាជនក្នុងភូមិអំពីមូលហេតុដែលបណ្ដាលឱ្យពួកគាត់មានជំងឺមកយាយីជាប្រចាំដូចជា ក្ដៅខ្លួន ផ្ដាសាយ ឈឺបំពង់ក ឈឺក្រពះ ឈឺក្បាល ។ល។ លោកបានណែនាំបំភ្លឺអំពីដំណោះស្រាយសង្គ្រោះបឋមងាយៗពេលមានបញ្ហាសុខភាពបន្ទាន់ និងពេលគ្មានសេវាសុខភាពនៅក្បែរ ។
ប្រជាជនទាំងអស់ដែលមានវត្ដមាននៅក្នុងឱកាសនោះ មានចិត្ដរំភើបរីករាយយ៉ាងក្រៃលែង និងសម្ដែងនូវសេចក្ដីអំណរអរគុណយ៉ាងជ្រាលជ្រៅចំពោះទឹកចិត្ដសប្បុរសធម៌របស់ លោកឧកញ៉ាវេជ្ជបណ្ឌិត គួច ម៉េងលី និងក្រុមការងារទាំងអស់ ដែលបានផ្ដល់កម្លាំងចិត្ដចុះមកសួរសុខទុក្ខពួកគាត់ដល់លំនៅដ្ឋានប្រកបដោយភាពស្និទ្ធស្នាល ព្រមទាំងបានពិគ្រោះពិនិត្យជំងឺដោយ ឥតគិតថ្លៃដល់ក្រុមគ្រួសាររបស់ពួកគាត់ស្ទើរគ្រប់ៗគ្នា ហើយថែមទាំងផ្ដល់នូវចំណេះដឹងថ្មីៗជាច្រើនពាក់ព័ន្ធនឹងបញ្ហាសុខភាពដែល ចំណេះដឹងទាំងនេះជាទុនមួយដ៏ប្រសើរសម្រាប់ពួកគាត់អនុវត្ដក្នុងជីវិតរស់នៅប្រចាំថ្ងៃ ដើម្បីជួយមិនធ្វើឱ្យពួកគាត់ខាតបង់ថវិកា និងខាតពេលវេលាសម្រាប់ទៅព្យាបាលជំងឺ ហើយផ្ទុយទៅវិញ ថែមទាំងអាចជួយធ្វើឱ្យសេដ្ឋកិច្ចគ្រួសារបានប្រសើរឡើងថែមមួយកម្រិតទៀត ៕
ចែករំលែកព័តមាននេះ