រាជធានីភ្នំពេញ ៖ ការប្រកួតបាល់ទាត់ដណ្ដើមពានរង្វាន់លោកប៉ា សុជាតិវង្ស អភិបាលរាជធានីភ្នំពេញដើម្បីអបអរខួបអនុស្សាវរីយ៍លើកទី៣៧ ទិវាជ័យជម្នះ៧មករា (៧មករា១៩៧៩-៧មករា២០១៦)ដែលបានធ្វើឡើងរយៈពេល២ថ្ងៃចាប់ពីថ្ងៃសៅរ៍ទី២ មករា នៅទីលានបាល់ទាត់វិទ្យាល័យជាស៊ីមបឹងកេងកង បានបញ្ចប់ជាស្ថាពរហើយកាលពីរសៀលថ្ងៃអាទិត្យទី៣ មករា កន្លងមកនេះ។ ពិធីបិទការប្រកួតត្រូវបានគេរៀបចំធ្វើក្រោមអធិបតីភាពលោកប៉ា សុជាតិវង្ស អភិបាលរាជធានីភ្នំពេញ ។
តាមរបាយការណ៍របស់លោកស្រីហួត យ៉ារី ប្រធានមន្ទីរអប់រំ យុវជន និងកីឡារាជធានីភ្នំពេញឱ្យដឹងថា នេះគឺជាលើកទី១ហើយដែលសាលារាជធានីភ្នំពេញ ផ្ដួចផ្ដើមគំនិតឱ្យមានការប្រកួតជាលើកដំបូងនេះឡើងដោយមានកីឡាករតែ៦ក្រុមប៉ុណ្ណោះចូលរួមប្រកួត គឺក្រុមវ័យចាស់សាលារាជធានីភ្នំពេញ, ក្រុមវ័យចាស់អាស៊ាន, ក្រុមវ័យចាស់មន្ទីរអប់រំ យុវជន និងកីឡារាជធានីភ្នំពេញ, ក្រុមវ័យចាស់ច្បារអំពៅ, ក្រុមវ័យចាស់វិទ្យាល័យព្រះស៊ីសុវត្ថិ និងក្រុមវ័យចាស់៧មករា។ ក្រុមទាំង៦បែងចែកជា២ពូលប្រកួតតាមរូបមន្តជម្រុះតាមពូល ដោយយកមួយពូល២ក្រុមឡើងមកប្រកួតនៅវគ្គពាក់កណ្ដាលផ្ដាច់ព្រ័ត្រ និងផ្ដាច់ព្រ័ត្រជាបន្តទៀត។
ឆ្លងកាត់ការប្រកួតយ៉ាងស្វិតស្វាញអស់រយៈពេល២ថ្ងៃមកនេះ ក្រុមវ័យចាស់៧មករា ជាអ្នកលើកពាន បន្ទាប់ពីបានលត់ក្រុមវ័យចាស់អាស៊ានឱ្យចាញ់នៅក្នុងវគ្គផ្ដាច់ព្រ័ត្រដោយលទ្ធផល៦-៣រួចមកនោះ ។
ការប្រកួតនៅក្នុងតង់ទី១ដែលមានរយៈពេល៤០នាទីនោះ ក្រុមទាំង២មានឱកាសរកបាន១គ្រាប់ម្នាក់ស្មើគ្នា ។ លុះចូលដល់តង់ទី២ ក្រុមទាំង២រកបាន១គ្រាប់ម្នាក់ដូចគ្នាទៀត ធ្វើឱ្យចប់ការប្រកួតទាំងពីរតង់ដែលមានរយៈពេល៨០នាទីក្រុមទាំងពីរទទួលបានលទ្ធផលស្មើគ្នា២-២ ។ ដើម្បីរកក្រុមឈ្នះលើកពាននេះ គណៈកម្មការរៀបចំការប្រកួតតម្រូវឱ្យក្រុមទាំង២ទាត់បាល់ប៉េណាល់ទី១១ម៉ែត្រ៥នាក់ម្ខាងប៉ុណ្ណោះ ។ ជាលទ្ធផល ក្រុមវ័យចាស់អាស៊ានធ្វើបានសម្រេចតែ១គ្រាប់ប៉ុណ្ណោះ ខណៈក្រុមវ័យចាស់៧មករាធ្វើបានសម្រេចរហូតដល់ទៅ៤គ្រាប់ ។ ដូច្នេះក្រុមវ័យចាស់អាស៊ានធ្លាក់មកនៅចំណាត់ថ្នាក់លេខ២ និងចំណាត់ថ្នាក់លេខ៣បានទៅលើក្រុមមន្ទីរអប់រំ យុវជន និងកីឡារាជធានីភ្នំពេញ បន្ទាប់ពីបានយកឈ្នះក្រុមវ័យចាស់ច្បារអំពៅក្នុងលទ្ធផល៥-២រួចមកនោះ ។
សូមបញ្ជាក់ថា ដើម្បីលើកទឹកចិត្តដល់ក្រុមដែលធ្លាក់តាំងពីវគ្គប្រកួតជម្រុះ គណៈកម្មការរៀបចំការប្រកួតបានដំឡើងចំណាត់ថ្នាក់លេខ៤ស្ទួនស្មើៗគ្នាទទួលបានប្រាក់រង្វាន់១លានរៀល។ ក្រុមលេខ៣ទទួលបាន១លាន៥សែនរៀល ក្រុមលេខ២ទទួលបាន២លានរៀល និងក្រុមលេខ១ទទួលបាន៣លានរៀល។
លោកប៉ា សុជាតិវង្ស បានមានប្រសាសន៍ថា ការប្រកួតនេះលោកមានគម្រោងបង្កើតឡើងជាយូរមកហើយ និងចងក្រងទុកជាឯកសារចាប់ពីពេលនេះទៅ ព្រោះថាការប្រកួតនេះនឹងត្រូវរៀបចំធ្វើឡើងជារៀងរាល់ឆ្នាំ ហើយឆ្នាំក្រោយៗលោកសង្ឃឹមថា នឹងមានក្រុមមកចូលរួមប្រកួតកាន់តែច្រើនជាងនេះ ។ លោកបានជំរុញដល់បណ្ដាខណ្ឌទាំងអស់ឱ្យនាំគ្នាបង្កើតក្រុមកីឡាឱ្យបានច្រើនមានដូចជាបាល់ទាត់ បាល់ទះ បាល់បោះ វាយកូនឃ្លីលើតុ និងប្រភេទកីឡាជាច្រើនទៀតទៅតាមអ្វីដែលអាចធ្វើបាន។ ការធ្វើបែបនេះដើម្បីជំរុញវិស័យកីឡាឱ្យកាន់តែមានសកម្មភាពផុលផុសឡើង។
លោកអភិបាលរាជធានីភ្នំពេញ ក៏បានជំរុញឱ្យលោក គួច ចំរើន អភិបាលខណ្ឌដូនពេញ ជួយកែលម្អទីលានតារាងបាល់ទាត់ក្នុងវិទ្យាល័យជា ស៊ីមបឹងកេងកង ឱ្យបានល្អតាមស្តង់ដារ ដែលត្រូវចំណាយទឹកប្រាក់ប្រមាណ១០ម៉ឺនដុល្លារអាមេរិក ។ ជាមួយនេះលោកបានបញ្ជាក់ថា ការលេងកីឡាមិនត្រឹមតែនាំមកនូវសុខភាពផ្លូវកាយ និងប្រាជ្ញាស្មារតីប៉ុណ្ណោះនោះទេ គឺថែមទាំងនាំមកនូវទំនាក់ ទំនងសាមគ្គីភាព មិត្តភាព និងសហប្រតិបត្តិការល្អជាមួយគ្នាទៀតផង ។ មិនតែប៉ុណ្ណោះយើងដឹងហើយថា នៅក្នុងឆ្នាំ២០២៣ខាងមុខ កម្ពុជា នឹងត្រូវទទួលធ្វើជាម្ចាស់ផ្ទះរៀបចំការប្រកួតកីឡាស៊ីហ្គេមលើកទី៣២ ។ ដូច្នេះការប្រកួតនេះ គឺជាការរួមចំណែកមួយយ៉ាងសំខាន់ក្នុងការជួយបំផុសដល់យុវជនឱ្យចូលរួមលេងកីឡាកាន់តែច្រើន ដើម្បីស្វែងរកធនធានមនុស្សដែលមានសមត្ថភាពពិតប្រាកដ ចូលរួមប្រកួតដណ្ដើមជ័យលាភីជូនជាតិ ៕
ចែករំលែកព័តមាននេះ