រាជធានីភ្នំពេញ ៖ ក្រុមអ្នកផឹកស៊ីប្រមាណជាង២០នាក់ និងរថយន្តជាច្រើនគ្រឿងត្រូវបានកម្លាំងគណៈបញ្ជាការឯកភាពខណ្ឌជ្រោយចង្វារឃាត់ខ្លួន ដើម្បីយកសំណាក និងដកហូតទាំងរថយន្ត ខណៈពេលដែលជួបប្រមូលផ្តុំគ្នាផឹកនៅភោជនីយដ្ឋាន តាសេត ល្មើសនឹងវិធានការសុខាភិបាល និងសេចក្តីជូនដំណឹងរបស់រដ្ឋបាលរាជធានីភ្នំពេញ ដើម្បីទប់ស្កាត់ការរីករាលដាល់នៃជំងឺកូវីដ ១៩ ។
ប្រតិបត្តិការនេះបានធ្វើឡើង កាលពីវេលាម៉ោងប្រមាណ៣រសៀលថ្ងៃទី០៥ ខែសីហានេះ នៅចំណុច ភោជនីដ្ឋានតាសេត ដែលស្ថិតនៅ តាមផ្លូវ កែវចិន្តា ក្នុងភូមិ ទី១ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
តាមព័ត៌មាន អោយដឹងថា រថយន្តសេរីទំនើបៗ ប្រមាណជា១៣គ្រឿង ត្រូវបានកម្លាំងសមត្ថកិច្ចធ្វើការហ៊ុំព័ទ្ធ ខណៈពេលដែល ម្ចាស់រថយន្តកំពុងតែអង្គុយផឹកនៅខាងក្នុងល្មើសនឹងវិធានការសុខាភិបាល និងសេចក្តីណែនាំរបស់រដ្ឋបាលរាជធានីភ្នំពេញ ។
ក្នុងនោះមនុស្សប្រុសស្រីចំនួន ២២នាក់ ត្រូវបានកម្លាំងគណៈបញ្ជាការឯកភាពឃាត់ទុករួចហៅក្រុមគ្រូពេទ្យចុះទៅយកសំណាកនៅក្នុងភោជនីយដ្ឋានតែម្តង ។
តាមព័ត៌មានអោយដឹងថា នៅមុនពេលកើតហេតុ ខណៈពេល ដែលកំពុងតែផឹកស៊ីសប្បាយ ស្រាប់តែសមត្ថកិច្ចចុះទៅដល់ ប្រមូលអោយនៅម្តុំតែម្តង ។
តាមព័ត៌មានអោយដឹងថា នៅក្នុងរថយន្តប្រមាណ១៣គ្រឿងមានរថយន្តម៉ាកហ្ស៊ិប ពាក់ស្លាកលេខ ខេមរៈភូមិន្ទ០១ .២. ៩៥៥៨មួយគ្រឿងផងដែរ ។ ក្រៅពីនោះបុគ្គិលិក ក៏ត្រូវក្រុមគ្រូពេទ្យ យកសំណាកផងដែរ ។
គួរបញ្ជាក់ថា តាមសេចក្តីជូនដំណឹងរបស់រដ្ឋបាលរាជធានីភ្នំពេញ អនុញ្ញាតចំពោះតែភោជនីយដ្ឋាន អាហារដ្ឋាន ដែលធានាបាននូវវិធានសុវត្ថិភាពផ្នែកសុខាភិបាល ជាពិសេសការរក្សាបាននូវគម្លាតសុវត្ថិភាពបុគ្គល និងសង្គមអាចដំណើរការអាជីវកម្មជាប្រក្រតី និងអាចទទួលអោយភ្ញៀវចូលទទួលទានបានក្នុងបរិវេណទីតាំង ប៉ុន្តែ ចាំបាច់ត្រូវកំណត់ចំនួនអតិថិជនក្នុងបរិវេណសមរម្យ សមាមាត្រទៅនឹងទំហំទីតាំង ដើម្បីរក្សារអោយបានជាដាច់ខាតនូបគម្លាតសុវត្ថិភាព បុគ្គល និងសង្គម និងដើម្បីធានាអោយមានខ្យល់ចេញចូលគ្រប់គ្រាន់ដោយត្រូវចៀសវាងប្រជ្រៀតគ្នា ឬប្រមូលផ្តុំមនុស្សច្រើនដែលជាហានិភ័យនៃការចម្លងវីរុសកូវីដ១៩។
ភោជនីយដ្ឋាន ដែលត្រូវអនុញ្ញាតក្នុងចំណុចខាងលើដាច់ខាតមិនត្រូវលក់គ្រឿងស្រវឹង ឬអនុញ្ញាតអោយអតិថិជនសេពគ្រឿងស្រវឹងគ្រប់ប្រភេទក្នុងបរិវេណអាជីវកម្មរបស់ខ្លួនឡើយ ។ ប៉ុន្តែភោជនីយដ្ឋានខាងលើបានទទួលភ្ញៀវផឹកស៊ីយ៉ាងសប្បាយល្មើសនិងវិធានការសុខាភិបាល និងសេចក្តី ណែនាំ របស់រដ្ឋបាលរាជធានីភ្នំពេញទៅវិញ អាចបង្កអោយមានហានិភ័យ និងការរីករាលដាលនូវជំងឺកូវីដ១៩៕
ចែករំលែកព័តមាននេះ