រាជធានីភ្នំពេញ ៖ ក្រោយបញ្ចប់ដោយជោគជ័យក្នុងការប្រកួតប្រដាល់ជើងឯកដែលមានឈ្មោះថា «កំពូលអ្នកប្រដាល់ស្រាបៀរ លីអូ» អស់២រដូវកាល គេចាប់អារម្មណ៍ថាព្រឹត្តិការណ៍ដែលបានរៀបចំនៅលើសង្វៀនទូរទស្សន៍បាយ័នមួយនេះ
រាជធានីភ្នំពេញ ៖ ក្រោយបញ្ចប់ដោយជោគជ័យក្នុងការប្រកួតប្រដាល់ជើងឯកដែលមានឈ្មោះថា «កំពូលអ្នកប្រដាល់ស្រាបៀរ លីអូ» អស់២រដូវកាល គេចាប់អារម្មណ៍ថាព្រឹត្តិការណ៍ដែលបានរៀបចំនៅលើសង្វៀនទូរទស្សន៍បាយ័នមួយនេះ ទទួលបាននូវការចាប់អារម្មណ៍យ៉ាងខ្លាំង ។
យ៉ាងណាក៏ដោយ ក្នុងការបង្ហាញឲ្យឃើញនូវសមាសភាពថ្មីសម្រាប់រដូវកាលទី៣ ដែលទើបបានប្រកាសឡើងកាលពីថ្ងៃទី៣ មករា ម្សិលម៉្ងៃ គេកត់សម្គាល់ថាមិនសូវមានសមាសភាពថ្មីនោះទេគឺនៅតែប្រមូលផ្ដុំដោយកីឡាករដែលធ្លាប់បង្ហាញខ្លួនរួចមកហើយកាលពីក្នុងវគ្គ១ និងវគ្គ២ភាគច្រើននៅឡើយសម្រាប់ការប្រកួតដណ្ដើមជើងឯករបស់ស្រាបៀរលីអូរដូវកាលថ្មីនេះ ។
ពាក់ព័ន្ធនឹងបញ្ហានេះ លោកនាង ស៊ីវត្ថា អ្នករៀបចំការប្រកួតបានប្រកាសនៅថ្ងៃសន្និសីទថា គឺដោយសារតែប្រទេសកម្ពុជាដ្បិតថាមានកីឡាករក្នុងប្រភេទទម្ងន់៦៧គីឡូក្រាមច្រើនក៏ពិតមែន ប៉ុន្តែសមត្ថភាព និងបទពិសោធន៍មិនអាចមកតតាំងគ្នានៅលើសង្វៀនបាន ។ លោកបញ្ជាក់ថា តាមការកត់សម្គាល់វិស័យប្រដាល់មានការរីកចម្រើនកីឡាករថ្មីស្ទើរគ្រប់ប្រភេទទម្ងន់ ប៉ុន្តែជម្រើសដែលអាចឲ្យលោក និងសហព័ន្ធយកមកធ្វើការប្រកួតគ្នាដើម្បីដណ្ដើមយកខ្សែក្រវាត់ គឺមិនច្រើននោះទេ ទើបត្រូវតែបង្ខំចិត្តជ្រើសយកកីឡាករដដែលៗមួយចំនួនដែលបានធ្លាក់ចេញពីការប្រកួតដណ្ដើមខ្សែក្រវាត់របស់ស្រាបៀរលីអូកាលពីវគ្គ១ និងវគ្គ២ឲ្យមកចូលរួមក្នុងព្រឹត្តិការណ៍វគ្គ៣របស់ស្រាបៀរលីអូមួយនេះទៀត ដើម្បីកុំឲ្យការប្រកួតអាក្រក់មើល ។
លោកមានប្រសាសន៍ថា រូបលោកក៏ចង់បានសមាសភាពថ្មី និងចង់លើកស្ទួយកីឡាករថ្មីៗឲ្យបានកាន់តែច្រើនផងដែរ ប៉ុន្តែអ្វីៗមិនអាចចេះតែធ្វើទៅបានទេដោយសារកម្មវិធីប្រដាល់ត្រូវការប្រកួតប្រជែងខ្ពស់ ហើយអ្នកឃ្លាំមើលក៏មិនចង់ទស្សនាកីឡាករថ្មីដែលខ្វះបច្ចេកទេសមកប្រកួតឲ្យល្អមើលនោះដែរ។ លោកនិយាយថា៖«ការប្រកួតជើងឯកលីអូវគ្គ៣ហ្នឹង ខ្ញុំទទួលស្គាល់សមាសភាពចាស់ៗត្រឡប់មកវិញច្រើន ប៉ុន្តែខ្ញុំសូមបញ្ជាក់ថានោះមិនមែនដោយសារបក្សពួក ឬខ្សែស្រឡាយអីទេ ប៉ុន្តែអ្វីដែលសំខាន់គឺកីឡាករទម្ងន់៦៧គីឡូក្រាមហ្នឹង វាអត់សូវមានកីឡាករល្អ ប៉ុន្តែការរៀបចំលើកនេះខ្ញុំក៏ប្រឹងរំលេចរកកីឡាករថ្មីៗដែលមានសមត្ថភាពឲ្យមកចូលប្រកួតបានច្រើនដែរ គឺមិនមែនដាក់ដដែលទាំងអស់ទេ!» ។ លោកថា ការប្រកួតមួយនេះ បានចាប់ផ្ដើមហើយកាលពីថ្ងៃអាទិត្យទី៣ មករា កន្លងទៅ ដោយការប្រកួតនឹងបែងចែកជាពូលហើយមានរូបមន្តប្រកួតគ្នាសន្សំពិន្ទុ និងបន្តប្រកួតគ្នាឆ្លងពូល រហូតទាល់តែស្វែងរកឃើញជើងខ្លាំង២រូបចុងក្រោយ ដើម្បីប្រកួតគ្នាយកលេខ១ និងលេខ២ ។
កីឡាករដែលចូលរួមសម្រាប់ព្រឹត្តិការណ៍ជើងឯកលីអូវគ្គ៣ទាំង៨រូបរួមមាន កីឡាករចៅ ផលឌឿ, កីឡាករ រិន មុន្នី, កីឡាករ ពុទ្ធ ឆាយរិទ្ធី, កីឡាករ ឯម ខ្លឹមខ្មៅ, កីឡាករ ផាន់ ចំណាន, កីឡាករ វីសេរី ចាន់ឌីន, កីឡាករ ហាក់ ចាន់ធី និង កីឡាករ រឿម វណ្ណៈ ។
លោកព្រាប សុវណ្ណ តំណាងរបស់ក្រុមហ៊ុនស្រាបៀរលីអូ បានអះអាងថា ព្រឹត្តិការណ៍ «កំពូលអ្នកប្រដាល់ស្រាបៀរលីអូ» បានទទួលការគាំទ្រយ៉ាងខ្លាំងបន្ទាប់ពីបានបង្កើតឡើងកាលពីថ្ងៃទី១៧ សីហា ឆ្នាំ២០១៣ ។ ព្រឹត្តិការណ៍នេះក៏បានលើកស្ទួយវិស័យកីឡា និងជួយរំលេចកីឡាករជំនាន់ចាស់ និងជំនាន់ថ្មីឲ្យមានឈ្មោះបោះសំឡេងនៅលើសង្វៀននាពេលកន្លងមកផងដែរ ជាពិសេសចំពោះកីឡាករដែលបានទទួលចំណាត់ថ្នាក់ជាជើងឯកកាលពីវគ្គ១ និងវគ្គ២។
លោកនៅតែរំពឹងថាព្រឹត្តិការណ៍«កំពូលអ្នកប្រដាល់ស្រាបៀរលីអូវគ្គ៣»នឹងបញ្ចប់ដោយរកឃើញជើងខ្លាំងដែលមានប្រជាប្រិយភាពភាព ហើយបើជាសមាសភាពរបស់កីឡាករថ្មីដែលមិនធ្លាប់ប្រកួតកន្លងមក គឺកាន់តែប្រសើរ។ ក្នុងនោះក្រុមហ៊ុនក៏ទទូចឲ្យកីឡាករថែទាំសុខភាពក្នុងអំឡុងនៃការប្រកួត ដើម្បីកុំឲ្យបាត់បង់ឱកាសស្វែងរកភាពខ្លាំងនៅវគ្គដណ្ដើមជើងឯកផងដែរ ដើម្បីឲ្យអ្នកទស្សនាកត់សម្គាល់ពីសមត្ថភាព ហើយគាំទ្រពេញទំហឹងសម្រាប់ការរៀបចំលើកនេះ ៕
ចែករំលែកព័តមាននេះ