បុគ្គលិកកាស៊ីណូហ្កាទ្បាក់ស៊ីហ្គោលហូថែល (Galaxy Gold Hotel) ជាច្រើននាក់ បានលើកគ្នាទាមទារលក្ខខណ្ឌការងារទាំងយប់ ដោយចោទថា ម្ចាស់កាស៊ីណូមិនគោរពតាមគោលការណ៍ច្បាប់ បើកប្រាក់ខែមិនគោរពតាមគោលការណ៍ច្បាប់ បើកប្រាក់ខែមិនគ្រប់ចំនួន
ខេត្តប៉ៃលិន ៖ បុគ្គលិកកាស៊ីណូហ្កាទ្បាក់ស៊ីហ្គោលហូថែល (Galaxy Gold Hotel) ជាច្រើននាក់ បានលើកគ្នាទាមទារលក្ខខណ្ឌការងារទាំងយប់ ដោយចោទថា ម្ចាស់កាស៊ីណូមិនគោរពតាមគោលការណ៍ច្បាប់ បើកប្រាក់ខែមិនគោរពតាមគោលការណ៍ច្បាប់ បើកប្រាក់ខែមិនគ្រប់ចំនួន ។ ពេលកើតមានហេតុការណ៍នេះខណៈអ្នកសារព័ត៌មាន អ្នកថតទូរទស្សន៍ជាច្រើនអង្គភាពចុះទៅយកព័ត៌មាន ស្រាប់តែស្ត្រីមេការម្នាក់បញ្ជាឱ្យសន្តិសុខចាប់ប្រកួចកអាវអ្នកកាសែត បញ្ជាឱ្យលុបរូបភាពចោលទាំងអស់ និងបានគំរាមកំហែងថែមទៀតផង ។
ហេតុការណ៍បុគ្គលិកកាស៊ីណូខាងលើ នាំគ្នាតវ៉ាទាមទារលក្ខខណ្ឌការងារនេះ បានកើតទ្បើងកាលពីវេលាម៉ោង៩និង២៥នាទីយប់ ថ្ងៃទី២ ខែមករាកន្លងទៅ នៅមុខកាស៊ីណូស្ថិតនៅជាប់ផ្លូវជាតិលេខ៥៧ ក្បែរច្រកទ្វារអន្តរជាតិព្រំ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានបានឱ្យដឹងថា នៅយប់ថ្ងៃកើតហេតុ គេឃើញបុគ្គលិកកាស៊ីណូខាងលើ ដែលទើបនឹងបើកដំណើរការបានប្រហែលជិត១ឆ្នាំ នាំគ្នាចេញពីក្នុងកាស៊ីណូមកឈរត្រៀបត្រាតវ៉ានៅខាងមុខកាស៊ីណូ ទាមទារលក្ខខណ្ឌការងារ ដោយអះអាងថាថៅកែមិនគោរពកិច្ចសន្យា គឺក្នុង១ខែត្រូវបើកប្រាក់បៀវត្សរ៍ឱ្យបុគ្គលិកម្នាក់ៗចំនួន៨ពាន់បាត(ប្រាក់ថៃ) ធ្វើការរយៈពេល៨ម៉ោង និងក្រោយមកបញ្ចុះត្រឹម៧ពាន់បាត ។ ប៉ុន្តែស្រាប់តែសរសេរនៅក្រដាសបិទបង្ហាញនៅមុខកាស៊ីណូចុះរហូតនៅសល់ត្រឹមតែ៥ពាន់បាតប៉ុណ្ណោះក្នុង១ខែ ខណៈពួកគេធ្វើការរហូតដល់១០ម៉ោងក្នុង១ថ្ងៃ ទើបកើតទុក្ខមិនសុខចិត្ត ក៏លើកគ្នាតវ៉ាតែម្តង ។
ប្រភពដដែលបានឱ្យដឹងទៀតថា លុះក្រោយមកមានអ្នកសារព័ត៌មានជាច្រើនអង្គភាពដូចជា ទូរទស្សន៍ប៉ុស្តិ៍លេខ៣ ទូរទស្សន៍អប្សរាANN ទូរទស្សន៍MSJ និងអ្នកកាសែតមួយចំនួនចូលទៅថតយករូបភាព ស្រាប់តែមេការស្រីម្នាក់របស់កាស៊ីណូនេះបញ្ជាឱ្យសន្តិសុខចាប់យកម៉ាស៊ីនថត និងទូរស័ព្ទដៃ បញ្ជាឱ្យលុបរូបភាព និងគំរាមកំហែងដល់អាយុជីវិតថែមទៀតផង ។
បើតាមភ្នាក់ងារយកព័ត៌មានឲ្យទូរទស្សន៍ទាំងអស់ខាងលើ បានឱ្យដឹងថា នៅពេលពួកគេឃើញក្រុមបុគ្គលិកកាស៊ីណូនាំគ្នាតវ៉ានៅមុខកាស៊ីណូបែបនេះ ទើបទៅឈរថតនៅក្បែរចិញ្ចើមផ្លូវសាធារណៈ ដោយមិនបានចូលទៅថតនៅក្នុងកាស៊ីណូទ្បើយ ស្រាប់តែសន្តិសុខកាស៊ីណូដែលស្ថិតក្នុងសភាពស្រវឹងផង ចេញមករករឿងចាប់ក្របួចកអាវបញ្ជាឱ្យលុបរូបភាព ដោយមានថៅកែស្រីម្នាក់ ដែលគេស្គាល់ថាជាប្រពន្ធលោកឧកញ៉ា ជា គា ថៅកែកាស៊ីណូមកុជពេជ្រ ចេញមកបញ្ជានិងគំរាមពួកគេ ។
ក្រុមអ្នកយកព័ត៌មានទាំងនេះរៀបរាប់ទៀតថា នៅពេលនោះពួកគេបានទាក់ទងទៅលោកស្នងការនគរបាលខេត្តជាច្រើនលើកច្រើនសា ដើម្បីឱ្យជួយអន្តរាគមន៍ តែអត់មានអ្នកលើកទូរស័ព្ទ ហើយគ្មានសមត្ថកិច្ចណាម្នាក់ហ៊ានចេញមុខទ្បើយ ដែលគេនិយាយថា ប៉ូលិសខ្លាចថៅកែល្បែងដូចខ្លាចខ្លា ។ លុះក្រោយមកទើបពួកគេទាក់ទងទៅលោកអភិបាលខេត្ត ដើម្បីឲ្យជួយអន្តរាគមន៍ លុះចប់រឿងរ៉ាវ ទើបគេឃើញសមត្ថកិច្ចចេញទៅអើតមើលបន្តិច ក៏នាំគ្នាត្រទ្បប់ទៅផ្ទះវិញយ៉ាងស្ងៀមស្ងាត់ ដូចពាក្យគេថា «សម័យនេះមានប្រាក់ទិញយក្សប្រើ ទិញយក្សយាមទ្វារ ឬទិញយក្សជិះលេងក៏បាន» ។
ចំណែកលោក ឈិន សុភ័ណ នាយករដ្ឋបាលកាស៊ីណូខាងលើ និយាយថា បុគ្គលិកដែលនាំគ្នាតវ៉ាមានតិចតួចប៉ុណ្ណោះ លុះឃើញដូច្នេះក៏បង្កឱ្យមានការផ្អើលឆោទ្បោចេញមកពីក្នុងបន្ទប់ធ្វើការជាច្រើននាក់ថែមទៀត ។ ចំណែកឯសន្តិសុខកាស៊ីណូដែលស្រវឹងចេញមកក្របួចកអាវអ្នកសារព័ត៌មានបង្ខំឱ្យលុបរូបភាពចេញ ខាងលោកនឹងហៅមកជួប ដើម្បីសួរនាំធ្វើការអប់រំ ដោយសុំមិនឱ្យខាងសារព័ត៌មានប្តឹងប្តល់អ្វីទ្បើយ ព្រោះនេះជាការយល់ច្រទ្បំរវាងគ្នានឹងគ្នា ។
ការរំលោភលើអ្នកកាសែតមានតែមនុស្សប្រើច្បាប់ព្រៃប៉ុណ្ណោះ ។ ឯចំពោះការឆ្លើយតបទៅនឹងការតវ៉ារបស់បុគ្គលិកនោះ មិនអាចស្វែងរកព័ត៌មានបំភ្លឺបានទ្បើយ ៕
ចែករំលែកព័តមាននេះ