មហាជន ជាពិសេសបណ្តាអ្នកលេងហ្វេសប៊ុកបានសម្តែងការភ្ញាក់ផ្អើលយ៉ាងខ្លាំង ក្នុងពេលដែលបានឃើញរូបភាពជាច្រើនសន្លឹកត្រូវបានបង្ហោះ បង្ហាញពីការចូលចែចាវតារាចម្រៀងនាង
រាជធានីភ្នំពេញ ៖ មហាជន ជាពិសេសបណ្តាអ្នកលេងហ្វេសប៊ុកបានសម្តែងការភ្ញាក់ផ្អើលយ៉ាងខ្លាំង ក្នុងពេលដែលបានឃើញរូបភាពជាច្រើនសន្លឹកត្រូវបានបង្ហោះ បង្ហាញពីការចូលចែចាវតារាចម្រៀងនាង វីរ និច្ច មុននឹងឈានដល់ពិធីមង្គលការនាពេលខាងមុខ។ រូបភាពទាំងអស់នោះ ត្រូវបានបង្ហោះដោយបុរសដែលជាអនាគតស្វាមីរបស់ វីរ និច្ច ដែលបានដាក់ឈ្មោះក្នុងគណនេយ្យហ្វេសប៊ុកថា «Khiev Pich ll»។
តាមរយៈរូបភាពដែលបានបង្ហោះនោះ គេសង្កេតឃើញមានការជួបជុំគ្រួសារ និងចាស់ៗទាំងសងខាង ដោយមានទាំងកន្ត្រកផ្លែឈើផងដែរ។ ពិធីនោះក៏មានវត្តមាន វីរ និច្ច និងអនាគតស្វាមីរបស់នាង ជាពិសេសតារាចម្រៀងលោក ខាត់ ជេមន៍ ដែលត្រូវជាពូរបស់ វីរ និច្ច ចូលរួមផងដែរ។
ដោយមិនបញ្ជាក់អ្វីច្រើនអមជាមួយរូបភាពដែលបានបង្ហោះនោះអនាគតស្វាមីរបស់ វីរ និច្ច ក៏បានភ្ជាប់ជាមួយនឹងសារថា «អរគុណប៉ាម៉ាក់ និងគ្រួសារទាំងសងខាងដែលផ្តល់ថ្ងៃនេះអោយកូន»។
តាមរយៈសារ និងរូបភាពទាំងអស់នេះ អាចបញ្ជាក់យ៉ាងច្បាស់ថា តារាចម្រៀង វីរ និច្ច ពិតជាត្រូវបានគេចូលចែចូវស្តីដណ្តឹងប្រាកដមែន។ យ៉ាងណា បើទោះបីជាមិនទាន់មានការអះអាងបញ្ជាក់ណាមួយពីកញ្ញា វីរ និច្ច ក៏ដោយ ប៉ុន្តែដំណឹងនេះ បានធ្វើអោយមិត្តភក្តិ និងប្រិយមិត្តគាំទ្ររបស់នាងជាច្រើនបាននាំគ្នាចូលរួមសម្តែងការអបអរសាទរចំពោះថ្ងៃដ៏ពិសេសរបស់នាងនាពេលនេះ។
គួរបញ្ជាក់ថា តារាចម្រៀង វីរ និច្ច បានចូលប្រឡូកក្នុងវិស័យសិល្បៈចម្រៀងក្នុងផលិតកម្មសាន់ដេ ទើបតែប៉ុន្មានឆ្នាំចុងក្រោយនេះប៉ុណ្ណោះ តាមរយៈពូរបស់នាងគឺលោក ខាត់ ជេមន៍។ បើទោះបីជាចូលប្រឡូកសិល្បៈចម្រៀងរយៈពេលខ្លីក៏ដោយ ប៉ុន្តែនាងក៏មានឈ្មោះបោះសម្លេងល្បីគួសមតាមរយៈបទចម្រៀង ការតុបតែងខ្លួន និងក្បាច់រាំប្លែកៗ។ ទោះជាយ៉ាងណា គេនៅមិនទាន់ដឹងទេថា ក្រោយពី វីរ និច្ច ស្វែងរកម្ចាស់បេះដូង ហើយត្រៀមចូលរោងការនាពេលខាងមុខហើយនោះ នាងអាចនឹងបន្តអាជីពចម្រៀងរបស់នាងទៀតឬយ៉ាងណាឡើយ៕
ចែករំលែកព័តមាននេះ