រាជធានីភ្នំពេញ ៖ រស់ វិបុល មកពីក្លិបសាលវ័ន្តកីឡា បានយកឈ្នះពិន្ទុកីឡាករថៃសងឃុំ ប្រាក់ឌូឆៃ ចំណែក ភិន សុទី មកពីក្លិបខ្លារខិនមានរិទ្ធ ចាញ់ពិន្ទុកីឡាករថៃប្ល័ង្គថង សរ.ឆាបូសាយ ទាំងមិនអស់ចិត្តនៅក្នុងការប្រកួតជាលក្ខណៈមិត្តភាពនៅលើសង្វៀនស៊ីធីអិន កាលពីយប់ថ្ងៃសៅរ៍ទី២ មករា កន្លងមកនេះ ។
ការប្រកួតរវាង រស់ វិបុល និងសងឃុំ ប្រាក់ឌូឆៃ មានការចាប់អារម្មណ៍ជាងគេ ដោយសារកីឡាករទាំង២បើកការវាយសម្រុកដាក់គ្នាយ៉ាងសាហាវ តាំងពីទឹកទី១ម្ល៉េះ ។ រស់ វិបុល ទោះបីគេមានប្រៀបខាងកម្ពស់ក៏ពិតមែនតែត្រូវកីឡាករថៃវាយឡើងចង់ទ្រមខ្លួន ដោយម៉ាត់ចូលមុខពេញៗ និងបុកចូលពោះទឹកជាច្រើនជង្គង់ទៀតផង ។ គ្រាន់តែចូលដល់ទឹកទី២ភា្លម រស់ វិបុល បានសម្រុកចូលកៀកវាយម៉ាត់សំដៅមុខ និងប្រើជើងទាត់ដូចព្យុះបង្ខំឱ្យកីឡាករថៃរូបនេះដកថយអែបខ្សែរេញជាប់រហូត និងមានឱកាសវាយបកសងវិញបានម្ដងម្កាលវិញប៉ុណ្ណោះ ។
នៅទឹកទី៣ កីឡាករទាំង២មានឱកាសវាយគ្នាទៅវិញទៅមក និងបានបញ្ចេញស្នៀតពិសេសៗដើម្បីផ្ដួលគ្នាទៀតផង ប៉ុន្តែកីឡាករថៃហាក់ចាញ់ប្រៀបកម្លាំងបន្តិច ជាហេតុធ្វើឱ្យរស់ វិបុលមានឱកាសគ្រប់គ្រងការប្រកួតបានល្អជាង ។ ចូលដល់ទឹកទី៤ និងទី៥រស់ វិបុល កាន់តែបង្កើនការវាយលុកយ៉ាងសាហាវលើសដើម ប៉ុន្តែមិនអាចផ្ដួលកីឡាករថៃឱ្យសន្លប់បានឡើយ ទើបលទ្ធផលចុងក្រោយគេបានត្រឹមតែយកឈ្នះពិន្ទុប៉ុណ្ណោះ ។
ចំណែក ភិន សុទី វិញ ត្រូវកីឡាករថៃជាគូប្រកួតវាយស្ទើរតែមិនអាចតដៃរួចតាំងពីនៅក្នុងទឹកទី១មកម្ល៉េះ ប៉ុន្តែអ្នកប្រដាល់រូបនេះចិត្តសឿងគ្រាន់បើ គេនៅតស៊ូប្រកួតលុះដល់ទឹកចុងក្រោយហើយបានចាញ់ត្រឹមពិន្ទុ ។
រីឯលទ្ធផលគូផ្សេងទៀត កីឡាករសុខ ចិន្ដា មកពីក្លិបឃ្លាំងមឿងកីឡា បានយកឈ្នះពិន្ទុកីឡាករទេស ជីវ៉ា មកពីក្លិបកងពលតូចលេខ៧០ និងកីឡាករសោម ចន្ថា មកពីក្លិបគីសែមានរិទ្ធ ក៏បានយកឈ្នះពិន្ទុកីឡាករទេស ឧត្ដម មកពីក្លិបកងពលតូចលេខ៧០ដែរ ៕
ចែករំលែកព័តមាននេះ