ខេត្តកំពង់ឆ្នាំង ៖ បុរសម្នាក់បានលង់ទឹកស្លាប់កាលពីវេលាម៉ោង៨និង១០នាទីយប់ថ្ងៃទី៧ មីនា នៅចំណុចព្រែកក្រពើស្គម ស្ថិតក្នុងព្រំប្រទល់ជាប់់គ្នាពីរខេត្ត គឺខេត្តកំពង់ឆ្នាំង និងខេត្តកំពង់ធំ ខណៈដែលបុរសរូបនេះចេញទៅដាក់លបនៅចំណុចនោះ ។ បុរសរងគ្រោះមានឈ្មោះនោ ស៊ីម អាយុ២៤ឆ្នាំ នៅភូមិផាក់សណ្តាយ ប៉ុន្តែបានមកស្នាក់នៅភូមិពាមខ្នង ឃុំផ្លូវទូក ស្រុកកំពង់លែង ដើម្បីប្រកបរបរដាក់លប ។
តាមប្រភពពីលោកបាល់ ជឿន អធិការស្រុកកំពង់លែងបានឱ្យដឹងថា ជនរងគ្រោះបានមកស្នាក់នៅក្នុងភូមិពាមខ្នងនេះ ជាមួយអ្នកប្រកបរបរដូចគ្នា ។ នៅថ្ងៃកើតហេតុវេលាម៉ោងជាង៨ទៅហើយគេមិនឃើញជនរងគ្រោះត្រឡប់មកផ្ទះវិញ អ្នកប្រកបរបរដូចគ្នាក៏នាំគ្នាទៅតាមរកមើល ព្រោះជាទម្លាប់ការចេញទៅដាក់លបនៅម៉ោងត្រឹម៦ល្ងាចគឺត្រឡប់មកវិញ ប៉ុន្តែរហូតដល់ម៉ោងជាង៨យប់ទៅហើយ មិនឃើញវិលត្រឡប់មកទៀតទើបពួកគេនាំគ្នាតាមរក ហើយបានប្រទះឃើញជនរងគ្រោះលង់ទឹកស្លាប់នៅក្បែរទូកដែលចេញទៅដាក់លបនោះ ។
លោកបន្តថា តាមការធ្វើកោសល្យវិច័យជនរងគ្រោះគឺបានខ្យល់គរហើយដួលធ្លាក់ចេញពីទូកចូលទៅក្នុងទឹកបណ្តាលឱ្យលង់ស្លាប់ ។ ក្រោយពិនិត្យរួច ប៉ូលិសបានប្រគល់សពជនរងគ្រោះឱ្យទៅក្រុមគ្រួសារធ្វើបុណ្យតាមប្រពៃណី៕
ចែករំលែកព័តមាននេះ