មនុស្សក្រិនក្នុងប្រទេសអីុរ៉ាក់ ប្រមូលផ្តុំគ្នាក្នុងទិវា «មនុស្សក្រិនប្រចាំឆ្នាំ» ដែលរៀបចំឡើងដើម្បីទ្រទ្រង់សិទ្ធិមនុស្សក្រិន កាលពីពេល ថ្មីៗកន្លងមក ។ មនុស្សស្រីក្រិនជាច្រើននាក់អះអាងថា រងការរើសអើង ព្រោះតែលក្ខណៈខុសប្រក្រតីផ្នែករាងកាយរបស់ពួកនាង ។
លោកហ៊ូសសេន ចាលីល ប្រធានគណៈកម្មការផ្នែកវប្បធម៌របស់សមាគមមនុស្សក្រិន នៃប្រទេសអីុរ៉ាក់និយាយថា លោកបានព្យាយាមដាក់សំណើអំពាវនាវដល់អង្គភាពរបស់រដ្ឋាភិបាល កាលពី១២ឆ្នាំកន្លងមក ប៉ុន្តែរហូតមកដល់ពេលនេះគ្មានអង្គភាពណាមួយទទួលសំណើនោះទេ ។
នាងនូ ហ៊ូសសេន អាយុ២៤ឆ្នាំ មានជំនាញខាងគណនេយ្យ តែគ្មានការងារធ្វើបាននិយាយថា នាងចង់ឱ្យការអំពាវនាវរបស់ពួកនាងបានដឹងឮនៅក្នុងសង្គម ។ ពួកនាងមិនបានអំពាវនាវអ្វីច្រើន ក្រៅពីរកភាពយុត្តិធម៌ ការស្មើភាពលើការងារ កន្លែងស្នាក់នៅ និងសិទ្ធិដូចមនុស្សធម្មតា ។ បញ្ហាចម្បងរបស់មនុស្សក្រិន គឺការរកការងារធ្វើ ដោយភាគច្រើននិយាយក្នុងក្តីអស់សង្ឃឹមថា ពួកគេត្រូវបដិសេធ ព្រោះជាមនុស្សក្រិន ដោយមិនគិតពីសមត្ថភាព ។
លោកអាលី អាប់ឌុល មនុស្សក្រិន អាយុ៣០ឆ្នាំ និយាយថា «គ្មាននរណាម្នាក់មានការងារធ្វើទេលើកលែងតែអ្នកមានកម្ពស់ខ្ពស់ ។ ខ្ពស់ ឬទាបមិនខុសគ្នាទេ ទាបពិតមែន ប៉ុន្តែមានសមត្ថភាព និងចិត្តគំនិតល្អ» ៕
ចែករំលែកព័តមាននេះ