អតីតតារាសម្តែងដ៏ល្បីល្បាញអ្នកនាង អម្ពរ ទេវី បានថ្លែងសារសម្តែងការក្តុកក្តួលចិត្ត និងសោកស្តាយយ៉ាងខ្លាំងចំពោះមរណភាពរបស់លោក ហ៊ុយ ពុធ ដែលបានទទួលមរណៈក្នុងជន្មាយុ៨២ឆ្នាំ ។ អ្នកនាង អម្ពរ ទេវី បានចាត់ទុកមរណភាពរបស់អ្នកដឹកនាំជើងចាស់លោក ហ៊ុយ ពុធ នាពេលនេះ គឺជាការ
រាជធានីភ្នំពេញ ៖ អតីតតារាសម្តែងដ៏ល្បីល្បាញអ្នកនាង អម្ពរ ទេវី បានថ្លែងសារសម្តែងការក្តុកក្តួលចិត្ត និងសោកស្តាយយ៉ាងខ្លាំងចំពោះមរណភាពរបស់លោក ហ៊ុយ ពុធ ដែលបានទទួលមរណៈក្នុងជន្មាយុ៨២ឆ្នាំ ។ អ្នកនាង អម្ពរ ទេវី បានចាត់ទុកមរណភាពរបស់អ្នកដឹកនាំជើងចាស់លោក ហ៊ុយ ពុធ នាពេលនេះ គឺជាការបាត់បង់អ្នកដឹកនាំរឿងដ៏ឆ្នើមមួយរូប ក្នុងនោះលោកក៏ជាអ្នកមានគុណលើករូបនាងដំបូងបំផុតដែលនាំអោយនាងទទួលបានជោគជ័យលើវិស័យសិល្បៈនេះផងដែរ។
អ្នកនាង អម្ពរ ទេវី បានបង្ហោះតាមគណនេយ្យហ្វេសប៊ុករបស់ខ្លួនពីទឹកដីអាមេរិកថា «នាងខ្ញុំ អម្ពរ ទេវី សូមលំអោនកាយគោរព និងសូមចូលរួមរំលែកនូវមរណៈទុក្ខដ៏សែនក្រៀមក្រំជាមួយគ្រួសារនៃស.ពលោកពូ ហ៊ុយ ពុធ ។ នាងខ្ញុំមានអារម្មណ៍ក្ដុកក្ដួល និងសោកស្ដាយណាស់ ដែលបាត់បង់លោកពូដែលជាកំពូលអ្នកនិពន្ធ និងដឹកនាំរឿងដ៏ល្បីល្បាញនៃខ្សែភាពយន្តខ្មែរ»។
នាងបញ្ជាក់ថា «លោក ហ៊ុយ ពុធ លោកគឺជាអ្នកមានគុណរបស់នាងខ្ញុំមុនបង្អស់ ជាមួយនឹង លោកអ៊ុំ ម៉ៅ អាយុទ្ធ ក្នុងចំណោមអ្នកមានគុណជាច្រើន ដែលបានជួយរុញច្រាននាងខ្ញុំឲ្យ ទទួលបាននូវភាពជោគជ័យ និងភាពល្បីល្បាញនៅលើវិសយ័ខ្សែភាពយន្តខ្មែរនាទស្សវត្ត ឆ្នាំ១៩៩០ ។
នាងថា ខ្សែភាពយន្តដំបូងរបស់លោកដែលធ្វើឲ្យនាងខ្ញុំបានទទួលជោគជ័យ គឺរឿង «ស្នេហ៍រហែកជ្រែកវិញ្ញាណ»។
បើតាមអ្នកនាង អម្ពរ ទេវី ថា គុណរបស់លោកបានដក់ជាប់ក្នុងបេះដូងនាងខ្ញុំរហូតតទៅ នាងខ្ញុំសូមលើកម្រាមដៃបួងសួងដល់វត្ថុស័ក្ដិសិទ្ធិលើលោក សូមឲ្យដួងវិញ្ញាណក្ខន្ធលោកបានទៅកាន់ឋានសុគតិភព កុំបីឃ្លាងឃ្លាតឡើយ»។
ជាការកត់សម្គាល់ មរណភាពរបស់លោក ហ៊ុយ ពុធ នាពេលនេះមិនមែនតែអ្នកនាង អម្ពរ ទេវី ម្នាក់ទេ ដែលបានបង្ហោះសារសម្តែងការសោកស្តាយ ពោលគឺក៏នៅមានអ្នកសិល្បៈជាច្រើននាក់ទៀតដែលបានស្គាល់រូបលោកក៏បានបង្ហោះសារសម្តែងការសោកស្តាយនេះដូចគ្នា។
គួរបញ្ជាក់ថា អ្នកដឹកនាំភាពយន្ត និងចម្រៀងជើងចាស់លោក ហ៊ុយ ពុធ ទទួលមរណភាពក្នុងជន្មាយុ៨២ឆ្នាំកាលពីយប់ថ្ងៃទី២ ខែសីហា ឆ្នាំ២០២១ ក្នុងជន្មាយុ៨២ឆ្នាំ ដោយសាររោគាពាធ និងភាពចាស់ជរា។ ដំណឹងមរណភាពរបស់លោក ហ៊ុយ ពុធ ត្រូវបានផ្សព្វផ្សាយពេញបណ្តាញសង្គមហ្វេសប៊ុក ត្បិតលោកគឺជាអ្នកដឹកភាពយន្ត និងចម្រៀងកាយវិកានៅក្នុងផលិតកម្មហង្សមាស ដែលមានស្នាដៃជាច្រើន។
គួរបញ្ជាក់ទៀតថា ស.ពរបស់លោក ហ៊ុយ ពុធ ត្រូវបានក្រុមគ្រួសារតម្តល់ធ្វើបុណ្យតាមប្រពៃណីព្រះពុទ្ធសាសនានៅផ្ទះលេខ 93B ផ្លូវលំ ភូមិព្រះពន្លា សង្កាត់ព្រែកប្រា ខណ្ឌច្បាអំពៅ។ ដំណឹងមរណភាពរបស់លោក ហ៊ុយ ពុធ នាពេលនេះបានក្លាយជាដំណឹងដល់សោកស្តាយបំផុតសម្រាប់វិស័យសិល្បៈខ្មែរ ត្បិតលោកគឺជាធនធានមួយដ៏ល្អដែលមានស្នាដៃ និងបម្រើសិល្បៈស្ទើរពេញមួយជីវិត។ ហើយនៅឆ្នាំ១៩៩០ លោកបានបង្កើតក្រុមផលិតភាពយន្តដោយខ្លួនឯង ដោយកុនដំបូងដែលលោកបានផលិតនោះ គឺរឿង «ស្នេហ៍រហែកជ្រេកវិញ្ញាណ» ឬ «ជីវិតអ្នកចម្រៀង» ដែលសម្តែងដោយលោក សំ វិជ្ជា និងអ្នកនាង អម្ពរ ទេវីផងដែរ។
សូមរំលឹកថា ៖ អ្នកដឹកនាំរឿង និងចម្រៀងជើងចាស់លោក ហ៊ុយ ពុធ ទទួលមរណភាពហើយ ៕
ចែករំលែកព័តមាននេះ