នារីម្នាក់ជិះម៉ូតូស្តាប់កាសសុខៗ ស្រាប់តែ១ក្រុមជិត១០នាក់ធ្វើសកម្មភាពផ្អើ.ល
- ភ្នំពេញ
រាជធានីភ្នំពេញ ៖ នារីម្នាក់ត្រូវបានជនសង្ស័យមួយក្រុមធ្វើសកម្មភាពឆ.ក់ទូរស័ព្ទដៃមួយគ្រឿងបានសម្រេច និងបានធាក់ម៉ូតូ
រាជធានីភ្នំពេញ ៖ នារីម្នាក់ត្រូវបានជនសង្ស័យមួយក្រុមធ្វើសកម្មភាពឆ.ក់ទូរស័ព្ទដៃមួយគ្រឿងបានសម្រេច និងបានធាក់ម៉ូតូរបស់នារីជនរងគ្រោះ បណ្តាលឱ្យរ៉េចង្កូតទៅបុកជញ្ជាំងកញ្ចក់ហាងកាហ្វេដួលរងរបួស ។
ហេតុការណ៍ខាងលើនេះបង្កការភ្ញាក់ផ្អើលកាលពីវេលាម៉ោង៨យប់ថ្ងៃទី៣ ខែសីហា ឆ្នាំ២០២១ នៅចំណុចខាងមុខហាងកាហ្វេយីហោ ហ្សាឌ័រ ឡឺ កាហ្វេ នៅតាមបណ្តោយផ្លូវ៣៣៧ កែងនឹងផ្លូវ៥២៨ ស្ថិតក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញនារីជាជនរងគ្រោះម្នាក់មិនស្គាល់អត្តសញ្ញាណនោះទេ មានវ័យ២៥ឆ្នាំ ជិះម៉ូតូមួយគ្រឿងម៉ាកហុងដាស្គូភី ពណ៌សលាយក្រហម ពាក់ស្លាកលេខ ភ្នំពេញ 1FT-7893 ធ្វើដំណើរតាមបណ្ដោយផ្លូវ៣៣៧ ក្នុងទិសដៅពីលិចទៅកើត។ លុះមកដល់ចំណុចកើតហេតុខាងលើ នារីរងគ្រោះក៏បានជិះម៉ូតូបត់ឆ្វេងទៅផ្លូវ៥២៨ នៅពេលដែលបត់បានបន្តិច ស្រាប់តែលេចមុខជនសង្ស័យមួយក្រុមមានគ្នាជិត១០នាក់ ជិះម៉ូតូ៤គ្រឿងមិនចាំម៉ាក ដោយជិះស្របទិសដៅគ្នាតាមពីក្រោយនារីរងគ្រោះ។
តាមប្រភពដដែលបានបន្តថា បន្ទាប់មកក្រុមជនសង្ស័យក៏បានធ្វើសកម្មភាពឆ.ក់ទូរស័ព្ទដៃមួយគ្រឿងពីនារីរងគ្រោះ ដែលទូរស័ព្ទនោះនាងបានដោតកាសស្ដាប់ជាប់ត្រចៀក និងដាក់ទូរស័ព្ទក្នុងឃ្លុបម៉ូតូខាងមុខ។ បន្ទាប់ពីធ្វើសកម្មភាពឆ.ក់បានសម្រេចហើយ ស្រាប់តែមានបក្ខពួកក្រុមជនសង្ស័យដែលជាអ្នកបិទគូទបានធាក់ម៉ូតូរបស់នារីរងគ្រោះរ៉េចង្កូតជ្រុលទៅឡើងលើខឿនទៅបុកជញ្ជាំងកញ្ចក់ហាងកាហ្វេត្រង់ចំណុចកើតហេតុបែកខូចខាតអស់មួយផ្ទាំង និងបណ្តាលឱ្យនារីរងគ្រោះរងរបួសរយះដៃ ចំណែកឯម៉ូតូបានរងការខូចខាតបន្តិចបន្តួច។ ដោយឡែកក្រុមជនសង្ស័យក៏បាននាំគ្នាជិះម៉ូតូបន្ថែមល្បឿនគេចខ្លួនបាត់ស្រមោលតែម្តង។
ក្រោយពេលកើតហេតុ នារីរងគ្រោះក៏បានទំនាក់ទំនងទៅក្រុមគ្រួសារ ហើយត្រូវបានក្រុមគ្រួសារមកដឹកតាមរថយន្តយកទៅព្យាបាលនៅឯមន្ទីរពេទ្យភ្លាមៗផងដែរ ចំណែកឯម៉ូតូរបស់នារីរងគ្រោះត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលបឹងកក់ទី១ រង់ចាំស្ត្រីរងគ្រោះមកធ្វើការដាក់ពាក្យបណ្ដឹង និងយកម៉ូតូត្រឡប់ទៅវិញនៅពេលក្រោយជាបន្តទៀត៕
ចែករំលែកព័តមាននេះ