ភ្នំពេញ៖ កម្លាំងសមត្ថកិច្ចនគរបាលនៃមន្ទីរប្រឆាំងបទល្មើសគ្រឿងញៀន និងស្នងការដ្ឋាននគរបាលខេត្តកំពង់ស្ពឺ បានចេញបង្ក្រាបបទល្មើស រក្សាទុក ជួញដូរ នឹងដឹកជញ្ជូន នូវសារធាតុញៀនដោយខុសច្បាប់ ២ករណី ដោយរឹបអូសគ្រឿងញៀន បានជាង ៥គីឡូក្រាម។ ក្នុងនោះ មានគ្រឿងញៀនជាង ៤គីឡូក្រាម ត្រូវបានផ្ញើពីខេត្ត មកភ្នំពេញ តាមឡានក្រុង ក្រុមហ៊ុន វីរៈប៊ុនថាំ នៅសាខាផ្សារដើមគ។
ករណីទី១៖ កាលពីថ្ងៃទី៣០ ខែកក្កដា ឆ្នាំ២០២១ វេលាម៉ោង ១៦ និង ៤០ នាទី សមត្ថកិច្ចនគរបាលការិយាល័យទី១ នៃមន្ទីរប្រឆាំងបទល្មើសគ្រឿងញៀន ដឹកនាំដោយលោកឧត្តមសេនីយ៍ទោ អ៊ិន សុង នាយករងមន្ទីរ និងលោក វរសេនីយ៍ទោ ហុង វណ្ណារិទ្ធ នាយការិយាល័យ(ក១) សហការជាមួយកម្លាំងជំនាញស្នងការដ្ឋាននគរបាលរាជធានីភ្នំពេញ ក្រោមការសម្របសម្រួលពីលោក ស៊ិត វណ្ណៈ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ចុះបានស៊ើបអង្កេត និងឈានទៅបង្ក្រាបករណី រក្សាទុក ដឹកជញ្ជូន នឹងជួញដូរនូវសារធាតុញៀនដោយខុសច្បាប់ នៅ ២គោលដៅផ្សេងគ្នា ជាបន្តបន្ទាប់៖ គោលដៅទី១.នៅចំណុចផ្ញើឥវ៉ាន់ ក្រុមហ៊ុន វីរ:ប៊ុនថាំ ស្ថិតនៅតាមផ្លូវមុនីរ៉េត កែងផ្លូវម៉ៅសេទុង សង្កាត់ទួលស្វាយព្រៃ ខណ្ឌបឹងកេងកង និងគោលដៅទី២ នៅវេលាម៉ោង ១៧ និង១០នាទី បន្តឆែកឆេរលំនៅដ្ឋាន ផ្ទះលេខ១០ ភូមិត្នោតជ្រុំ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ។ ជាលទ្ធផល បានឃាត់ខ្លួនជនសង្ស័យម្នាក់ ឈ្មោះ ហ៊ុន សារ៉េត ហៅ រុណ ភេទប្រុស អាយុ ៣១ឆ្នាំ ស្នាក់នៅមិនពិតប្រាកដ។
ក្នុងនោះ សមត្ថកិច្ចចាប់យកវត្ថុតាង៖ សារធាតុញៀនប្រភេទមេតំហ្វេតាមីន (ICE) ទម្ងន់សរុប ៤១១៤ ក្រាម (៤គីឡូ ១១៤ ក្រាម)។ សារធាតុញៀនប្រភេទកេតាមីន (Ketamine) ទម្ងន់សរុប ១២.៣០ ក្រាម។ សារធាតុញៀនប្រភេទអ៊ិចស្តាស៊ី(MDMA) ទម្ងន់សរុប ២១.១០ក្រាម។ សរុបជារួម ៤១៤៧.៤០ ក្រាម។
សម្ភារៈដកហូត៖ ម៉ូតូ ៤គ្រឿង និងទូរស័ព្ទដៃចំនួន២ គ្រឿង។ ក្រោយឃាត់ខ្លួនជនសង្ស័យ និងវត្ថុតាងខាងលើ ត្រូវបានសមត្ថកិច្ចកសាងសំណុំរឿង បញ្ជូនទៅសាលាដំបូងរាជធានីភ្នំពេញ តាមនីតិវិធី។
ករណីទី២៖ កម្លាំងសមត្ថកិច្ចជំនាញការិយាល័យទី៤ នៃមន្ទីរប្រឆាំងបទល្មើសគ្រឿងញៀន បានចុះបង្ក្រាបករណីជួញដូរគ្រឿងញៀនដោយខុសច្បាប់មួយករណី ចាប់ខ្លួនជនសង្ស័យ ៣នាក់ និងរឹបអូសគ្រឿងញៀនជាង ១គីឡូក្រាម នៅខេត្តកំពង់ស្ពឺ។
សេចក្តីរាយការណ៍បន្តថា កាលពីថ្ងៃទី៣០ ខែមិថុនា ឆ្នាំ២០២១ វេលាម៉ោង១៦ និង៣០នាទី កម្លាំងជំនាញមន្ទីរប្រឆាំងបទល្មើសគ្រឿងញៀន(ក៤) ដឹកនាំដោយលោកឧត្តមសេនីយ៍ទោ ឃឹង សារ៉ាត់ នាយករងមន្ទីរ និងមានការចូលរួមពីកម្លាំងសមត្តកិច្ច នៃស្នងការដ្ឋាននគរបាលខេត្តកំពង់ស្ពឺ សម្របសម្រួលដោយលោកជំទាវ ចាត សូរស្មី ព្រះរាជអាជ្ញា នៃអយ្យការអមសាលាដំបូងខេត្ត បានបើកការស៊ើបអង្កេត ឈានទៅបង្ក្រាបករណីរក្សាទុក ដឹកជញ្ជូន នឹងជួញដូរគ្រឿងញៀនមួយករណី នៅចំណុចផ្ទះគ្មានលេខ ភូមិទំនប់ ឃុំគូស ស្រុកសំរោងទង ខេត្តកំពង់ស្ពឺ ។ លទ្ធផល ឃាត់ខ្លួនជនសង្ស័យ ៣ នាក់ រួមមាន៖ ១.ឈ្មោះ ភឿង ពេជ្រ ភេទប្រុស អាយុ ២៦ឆ្នាំ។ ២.ឈ្មោះ តាក់ ថេន ភេទប្រុស អាយុ ២៧ ឆ្នាំ។ ៣.ឈ្មោះ ប៊ុន បាន ភេទប្រុស អាយុ ១៩ ឆ្នាំ។
ក្នុងនោះ សមត្ថកិច្ច ចាប់យកវត្ថុតាង រួមមាន៖ ១.សារធាតុញៀនប្រភេទមេតំហ្វេតាមីន(ICE)ទម្ងន់១០២៣. ៩៣ក្រាម (ជាមួយគីឡូ) ២.ជញ្ជីងថ្លឹងថ្នាំញៀន ២គ្រឿង។
ការបង្ក្រាបករណីរក្សាទុក ដឹកជញ្ជូន និងជួញដូរដោយខុសច្បាប់ទាំងពីរករណីខាងលើនេះ ដោយអនុវត្តតាមបញ្ជាលោកនាយឧត្ដមសេនិយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងលោកនាយឧត្ដមសេនិយ៍ ម៉ក់ ជីតូ អគ្គស្នងការរងទទួលផែនប្រឆាំងបទល្មើសគ្រឿងញៀន ក្រោមការបញ្ជាដឹកនាំផ្ទាល់របស់លោកឧត្ដមសេនីយ៍ឯក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀន។ ក្រោយឃាត់ខ្លួនជនសង្ស័យ និងវត្ថុតាងខាងលើ ត្រូវបានសមត្តកិច្ចកសាងសំណុំរឿង បញ្ជូនទៅសាលាដំបូងខេត្តកំពង់ស្ពឺ តាមនីតិវិធី៕ ឃឹម ប៊ុនណាក់
ចែករំលែកព័តមាននេះ