ឆ្នាំចាស់ឆ្នាំសកលបានលូនផុតទៅហើយ… ឆ្នាំថ្មីបានឈានមកជំនួសវិញ គឺ2016 ។ ឆ្នាំ2016ដែលមានលេខ 6 នៅខាងចុង តាមអ្នកវិភាគហុងស៊ុយនិយាយថា
ជាឆ្នាំប្រមូល… ប្រមូលទុកមិនមែនប្រមូលចេញដូចលេខ 5 នៃឆ្នាំ2015 ទេ ។
ឆ្នាំចាស់កន្លងទៅ នៅកម្ពុជាយើងមានរឿងអាស្រូវកើតច្រើនស្អេកស្កះ… ជាឆ្នាំពោរពេញទៅដោយបទល្មើសគួរឱ្យកត់សម្គាល់ និងគួរឱ្យរន្ធត់ភ័យខ្លាច… ។
បទល្មើសគួរឱ្យចាប់អារម្មណ៍អ្វីខ្លះទៅហ្ន៎!… នោះគឺបទល្មើសចរាចរណ៍… បទល្មើសកាប់ឈើ កាប់ព្រៃយកដីលក់… បទល្មើសនេសាទ… បទល្មើសគេចពន្ធ… បទល្មើសផ្នែកសន្តិសុខសង្គម មានចោរលួច… ចោរប្លន់… បទល្មើសនយោបាយរត់ចោលស្រុក… បទល្មើសដូរដីរត់ទៅធ្វើពលករប្រទេសគេ… បទល្មើសចាប់រំលោភនិងជួញដូរផ្លូវភេទ… បទល្មើសគ្រឿងញៀន… បទល្មើសល្បែងស៊ីសងគ្រប់ប្រភេទ… អូហ៍ នឹកឃើញមិនអស់ទេ… ។ល។
ឧបទ្រពចង្រៃទាំងឡាយនោះឱ្យវារំលងទៅតាមឆ្នាំចាស់ទៅចុះ… ឱ្យវារលំរលាយទៅហោង… សូមកុំតាមចងពៀរ ។
ឆ្នាំលេខ 6 ចុង ជាលេខប្រមូល… សូមឱ្យរដ្ឋអំណាចសង្គមប្រមូលយកបទល្មើសទាំងឡាយនោះទុកម្តុំផង… កុំប្រលែងម៉ាសេរីដូចឆ្នាំ2015… ដែលជាប្រការមួយខូចពូជ ខូចឈ្មោះ គួរឱ្យខ្មាសអាណាប្រជារាស្ត្រពេកណាស់ ។
មិនមែនលេខ 6… លេខប្រមូលទុក… ប្រមូលដាក់បាវដូចឆ្នាំចាស់ទេ… សូមមេត្តាជួយទប់ផង !
និយាយត្រង់ពេកអីចឹង វាដូចជាអាក្រក់ស្តាប់ពេក… ប៉ុន្តែបើមិននិយាយ… គេថា ដឹងឮ ហើយម៉េចមិនជួយប្រាប់ផង… ។
ជិះទូកជាមួយគ្នា… គួរជួយចូក ជួយចែវ… ជួយទាញក្តោង ទើបបាត់ភ័យ បាត់ព្រួយ… អ្នកណារត់ចោលស្រុក គេបានរួចខ្លួន… រត់អីរត់ទៅ ព្រោះពូជអ្នកនយោបាយខ្មែរច្រើនជំនាន់ហើយ… អ្នកឈ្នះធ្វើមេ… អ្នកចាញ់ធ្វើចោរព្រៃ… វាមិនចម្លែកទេ ! សូមឱ្យឆ្នាំថ្មី… ឆ្នាំសកល… ល្អទៅហោង ៕
អាឡេវ
ចែករំលែកព័តមាននេះ