ខេត្តឧត្តរមានជ័យ៖ ចាប់តាំងពីថ្ងៃទី២ ខែសីហា បន្តដល់ថ្ងៃទី៣ ខែសីហានេះ នៅតំបន់អូរស្មាច់ បានផ្ទុះការឆ្លងរាលដាលជំងឺកូវីដ១៩ ធ្ងន់ធ្ងរ រហូតឈានដល់ការបិទខ្ទប់សង្កាត់អូរស្មាច់ ជាប់ព្រំដែនថៃទាំងស្រុង ហើយដាក់ជាតំបន់ក្រហម ដែលមិនមានការចេញចូលបានឡើយ។
លោក ឌី រ៉ាដូ អភិបាលរងខេត្តឧត្តរមានជ័យ និងជាអ្នកនាំពាក្យរដ្ឋបាលខេត្តឧត្តរមានជ័យ បានប្រាប់កោះសន្តិភាព នៅល្ងាចថ្ងៃទី៣ ខែសីហានេះថា មិនទាន់អាចបញ្ជាក់ថាចំនួនអ្នកឆ្លងកូវីដ១៩ នៅសង្កាត់អូរស្មាច់សរុបប៉ុន្មាននៅឡើយទេ។ តែការឆ្លងនេះ ជាការឆ្លងសហគមន៍ ហើយមានចំនួនច្រើនជាងគេ នៅក្នុងខេត្តឧត្តរមានជ័យ។ ការឆ្លងកូវីដនេះ ក៏មិនទាន់បញ្ជាក់ថា ជាប្រភេទវីរុសបំប្លែងថ្មី ដែលតា ឬយ៉ាងណាទេ ដោយរង់ចាំលទ្ធផលពិសោធន៍ម៉ាស៊ីនធំ នៅភ្នំពេញ នៅឡើយ។
ក្រៅពីការបិទខ្ទប់ នៅសង្កាត់អូរស្មាច់ ក្នុងក្រុងសំរោង នៅពេលនេះ កូវីដក៏បានឆ្លងរាលដាល នៅតំបន់ជាច្រើនទៀត ដែលអាជ្ញាធរខេត្តឧត្តរមានជ័យ បានសម្រេចបិទខ្ទប់ នៅផ្សារឈូក ផ្សារសំរោង និងបរិវេណផ្សារ ត្រូវបានបិទខ្ទប់ នៅផ្សារអន្លង់វែង ផ្សារនៅស្រុកត្រពាំងប្រាសាទ រួមទាំងទីប្រជុំជនជាច្រើនទៀត ត្រូវបានបិទខ្ទប់ ដើម្បីទប់ស្កាត់ការឆ្លងរាលដាលជំងឺកូវីដ១៩ ដែលឆ្លងក្នុងសហគមន៍នេះ។ ក្នុងនោះ នៅអូរស្មាច់ ឆ្លងច្រើនជាងគេ។ នេះបើតាមការបញ្ជាក់របស់លោក ឌី រ៉ាដូ ។
យ៉ាងណាក៏ដោយ ក្នុងសារជាសំឡេង ដែលគេចែកចាយនៅថ្ងៃទី៣ ខែសីហានេះ បានប្រកាសឲ្យអាជ្ញាធរគ្រប់លំដាប់ថ្នាក់ ត្រូវបង្កើនការប្រុងប្រយ័ត្ន ខណៈដែលនៅអូរស្មាច់ ផ្ទុះការឆ្លងរាលដាលជំងឺកូវីដ១៩ ប្រភេទ បំប្លែងថ្មី ដែលតា ក្នុងសហគមន៍ ដែលទើបរកឃើញនៅថ្ងៃនេះ ចំនួន ៥០នាក់ហើយ។ នៅអូរស្មាច់ ក៏ត្រូវបានបិទខ្ទប់ និងដាក់ជាតំបន់ក្រហមផងដែរ។
សូមរម្លឹកថា ខេត្តឧត្តរមានជ័យ នៅជាប់ព្រំដែនថៃ ជាខេត្តមួយ ស្ថិតក្នុងខេត្តចំនួន ៨ ដែលរាជរដ្ឋាភិបាល បានសម្រេចបិទខ្ទប់ រយៈពេល ១៤ថ្ងៃ គិតចាប់ពីថ្ងៃទី២៩ ខែកក្កដា រហូតដល់ថ្ងៃទី១២ ខែសីហា ឆ្នាំ២០២១។ ការបិទខ្ទប់ខេត្តជាប់ព្រំដែនថៃទាំងនេះ ដើម្បីទប់ស្កាត់ការឆ្លងរាលដាលមេរោគកូវីដ១៩ ដែលរកឃើញច្រើន លើពលករខ្មែរមកពីប្រទេសថៃ។
នៅលើហ្វេសប៊ុកផេក កាលពីថ្ងៃទី២ ខែសីហា ឆ្នាំ២០២១ រដ្ឋបាលខេត្តឧត្ដរមានជ័យ បានចេញសេចក្ដីសម្រេចបិទខ្ទប់ជាបណ្តោះអាសន្នទីតាំងចំនួន ០២កន្លែង ស្ថិតនៅត្រាំប៉ោង ឃុំព្រះប្រឡាយ ស្រុកត្រពាំងប្រាសាទ។ ការបិទខ្ទប់នេះ ដើម្បីទប់ស្កាត់ការឆ្លងរាលដាលជំងឺកូវីដ១៩។
កាលពីថ្ងៃទី២ ខែសីហា រដ្ឋបាលខេត្តឧត្ដរមានជ័យ ក៏ចេញសេចក្ដីសម្រេចបិទខ្ទប់ជាបណ្តោះអាសន្នទីតាំងចំនួន ០៨កន្លែង និងបញ្ចប់ការបិទខ្ទប់ចំនួន ០២កន្លែង ស្ថិតនៅក្រុងសំរោង ខេត្តឧត្តរមានជ័យ។
រដ្ឋបាលខេត្តឧត្ដរមានជ័យ បានប្រកាសកាលពីថ្ងៃទី២ ខែសីហា ឆ្នាំ២០២១ ថា ករណីឆ្លងកូវីដ-១៩ កើនឡើងដល់ ៤.៩២៥ករណី ខណៈរកឃើញថ្មី ៧៩ករណី (៧២ករណី សហគមន៍ និង ៧ករណី នាំចូលពីប្រទេសថៃ) និងជាសះស្បើយចំនួន ៥៥នាក់បន្ថែមទៀត។
ជាមួយគ្នានោះ គណៈបញ្ជាការឯកភាពរដ្ឋបាលខេត្តឧត្ដរមានជ័យ កាលពីថ្ងៃទី២ ខែសីហា ឆ្នាំ២០២១ ក៏បានបើកកិច្ចប្រជុំពិភាក្សាការងារវាយតម្លៃ និងកំណត់យន្តការអនុវត្តនៅតំបន់បិទខ្ទប់ ជា “តំបន់ក្រហម” “តំបន់លឿងទុំ” និង”តំបន់លឿង”។ ការកំណត់តំបន់ទាំងនេះ ជាយុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩ នៅទូទាំងប្រទេស សម្រាប់រយៈពេល ១៤ថ្ងៃ គិតចាប់ពីម៉ោង ២៣ និង ៥៩នាទី ថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១៕
ចែករំលែកព័តមាននេះ